RSS訂閱 今日睇住神州個市，見到討論區有人係度傾：「喂！你有無買係Ａ場Ｐｅｐｐａ Ｐｉｇ概念股啊？今日爆升啊！」
盈盈雖然老餅，但都知道Ｐｅｐｐａ Ｐｉｇ基本上成為咗兒童界國際語言，你只要一播呢套卡通，啲小朋友就肯定全部乖乖地。呢隻份紅小豬點解咁神奇，盈盈真係唔知啦！但點解犀利到有「Ｐｅｐｐａ Ｐｉｇ概念股」？盈盈反而有興趣想知道下！
呢隻Ｐｉｇ就犀利囉！根據英國官方「ｅＯｎｅ」係２０１７年年度報告顯示，Ｐｅｐｐａ Ｐｉｇ（佩奇）每年創造超過１２億美金全球零售額、擁有８００多個全球授權商。市場預計到２０２０年，零售額預計將達到２０億美金。
截至２０１８年５月２５日，卡通《小豬佩奇》分別在優酷、愛奇藝、芒果ＴＶ實現１３８億、１４１億、３﹒３億點擊量，預計未來幾年有機會繼續增長。重點係呢套卡通係中央台少兒頻道有播，意味呢套卡通「政治正確」，國家肯定。
原來呢來Ｐｅｐｐａ Ｐｉｇ嘅公司製作賀歲卡通《小豬佩奇過大年》，大年初一係神州上畫，而噚日（１７日）官方釋出一條長達８分鐘嘅宣傳片，係微信朋友圈廣為流傳，而且滿是洋蔥﹒﹒﹒﹒﹒﹒缸友你哋都係自己去搵啦！但就係因為呢條宣傳片爆紅，所以三隻同佩奇豬有關嘅概念包括奧飛娛樂（深：００２２９２）、邦寶益智（滬：６０３３９８）、幸福藍海（深：３００５２８）都急升３至１０巴仙不等。
點解呢啲洋鬼子卡通可以入到神州之餘又可以爆紅？有內地學者指出，Ｐｅｐｐａ Ｐｉｇ主要講一個家庭內發生嘅可愛事，家庭價值觀與華人接近，入面嘅角色都豎立良好家庭形象，可以為小朋友建立良好價值觀，所以唔少內地商家已經睇中呢個商機，呢隻豬嘅ＩＰ權一定衍生好多周邊產品，到時真係賺到笑！
目前係英國已經有Ｐｅｐｐａ Ｐｉｇ嘅主題樂園，分析話呢套賀歲片只係試水溫，如果大賣的話唔排除係神州開多個主題樂園，哇！到時真係Ｆａｔ Ｆａｔ囉。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】本港主要銀行跟隨美聯儲減息，你對樓市前景有否信心？► 立即投票
