RSS訂閱 呢排「地攤經濟」熱潮席捲孖屐，內需佬都連帶炒起，不過博客就唔建議高追啲啤酒佬同隻「地攤神車」啦，反而留意番呢排整固緊嘅恒安國際（０１０４４），因為佢有基本面支持，而且疫情過後相對會提振對衛生用品嘅需求！
講起恒安國際，其實佢都係今次疫情嘅「受惠股」，因為市民衛生意識提高，以及疫情期間大部分時間都留喺屋企，增加對家居清潔同個人衛生用品嘅需求。恒安業務有超過五成收入喺來自紙巾，當中涵蓋紙面巾、衛生紙、紙餐巾、廚房紙巾同擦收紙等各類生活用紙，仲有當然唔少得嘅消毒殺菌濕紙巾啦。而且其他業務中好似家居用品入面嘅抹布、百潔布等產品，相信無論喺疫情期間同之後嘅需求都會有所提高。
另外，集團５月中宣佈，旗下福建嘅口罩生產基地已經拎到批文，口罩生產將會恒常化，依家每日可以生產２００至３００萬個，相信可以為公司擴展多元業務嘅收入。公司又預料旗下產品喺疫情之下有固定需求，造紙嘅原材料木漿嘅價格走勢亦會相應平穩，都利好公司前景。
最近大摩亦發表咗份報告，唱好恒安股價喺３０日之內會上升，並給予「增持」嘅評級，目標價睇７８銀，原因喺近排股價下滑令估值變得平咗，而且受惠渠道補庫存、線上增長及低基數效應，第二季嘅業務表現會唔錯。依家恒安預測市盈率大約１６倍，對比起今日再破頂嘅同業維達（０３３３１）要平，後者目前預測市盈率大概係２１倍。
睇埋個公仔圖，恒安近日連開多支陰燭，但百天線（約６０﹒５銀）有支持，如果要吸納可以等佢回落至６０銀左右水平，短線上望６６銀，呢個亦係近排嘅阻力位。中長線部署就以大摩嘅他屐作參考，即係睇住７８銀先；同樣６０銀買入，見突破４月嘅高位約６８銀可以再加注。
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
