RSS訂閱 話說自從上個月底阿爺突然話鬆綁地攤嘅管理，有唔少地方就積極響應號召；而星期一（１日）神州總理李克強去山東考察時再為「地攤經濟」撐腰，「地攤經濟」就徹底火了。嚟來嚟多地方跟風，齊谷「地攤經濟」。搞到近排無論喺神州各大社交媒體，定係平時大家吹水嗰陣，都喺到話如果擺地攤要賣咩。
地攤概念反應咁火熱，一眾電商平台當然唔會錯過依個吸金機會。自從前幾日五菱自薦嘅擺攤神車「五菱榮光售貨車」爆紅後，拼多多噚晚８點半就公布上線「五菱榮光售貨車」，首批上綫售貨車共有１００台，並會為每台車補貼３０００蚊人仔嘅加油卡。結果開始唔夠２個鐘，１００台車就全部掃曬。之後，拼多多就表示，為保障消費需求已經緊急補貨２００台。截止今日下晝３點，擺攤神車已經陸續加開咗三批，頭三批一共８００台已經賣曬，而而家進行中嘅第四批共５０台已經賣出接近一半。
除咗拼多多，而家正火熱搞緊６１８購物節嘅天貓都做埋一份。佢今日都宣布上線「擺攤專用車」專場，包括五菱宏光、五菱寶駿、東風小康在內嘅６大擺攤專用車，宜家落訂車企方面仲會有返１０００人仔嘅補貼添！
對於今次嘅地攤經濟，一眾電商可以話係出錢又出力啊！美團跑喺最前線，佢上月底就啟動「春風行動」百萬小店計劃幫補小店；阿里巴巴１６８８跟住就推「地攤經濟」幫扶計劃，將提供超過７００億人仔免息賒購；京東就推「星星之火」地攤經濟扶持計劃，為每個小店提供最高１０萬銀無息賒購；而ＱＱ旗下嘅微信就發布「全國小店煙火計劃」，為小店提供輸出四大全新數字化政策。
除此之外，推出扶持計劃嘅仲有蘇寧同百度等，唔知道喺各方一齊推動之下，「地攤經濟」會唔會如同總理話嘅星星之火，可以燎原呢？《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【你點睇】的士記分制將於周末生效，你認為該制度可否幫助的士提升服務質素？► 立即投票
