RSS訂閱 ＳｐａｃｅＸ致力帶地球人上月球就係人都知，而第一次「私人繞月之旅」最快可以喺２０２３年實現。第一個落訂嘅乘客就係嚟自東瀛嘅億萬富翁前澤友作，佢會搭乘馬斯克同ＮＡＳＡ合作研發嘅獵鷹火箭同龍飛船，圍繞月球一周之後返地球。前澤友作最新公布打算喺全球揀８個人陪佢飛，仲一毫子都唔使畀添。
首先要講講前澤友作，佢係賣ＣＤ起家，仲係一個藝術收藏家。創立咗服裝購物網站ＺＯＺＯＴＯＷＮ，母公司ＺＯＺＯ２００７年喺東京交易所上市，２０１９年９月因為資金問題，佢將ＺＯＺＯ超過五成股份賣畀日本雅虎公司，淨係留低６巴仙股份。之後成立咗一間新公司Ｓｔａｒｔ Ｔｏｄａｙ做社長。依家身家有近３００億港紙。
關於呢次太空旅行，佢邀請嘅對象初初話要係一名女性嘅人生伴侶，之後以心理準備不足為由取消。中間話過要請６至８名藝術家，到依家就開放畀全人類申請，不過要符合兩個關鍵標準，首先係乘客可以通過進入太空去推進任何活動，其次係願意並能夠支持其他有類似抱負嘅宇航員。
靠翻譯網站睇返啲日媒報道，成個輪選過程有５個ｓｔｅｐｓ，好似要考試同面試。盈盈貼心咁連網址都畀埋缸友啦，ｈｔｔｐｓ：／／ｄｅａｒｍｏｏｎ﹒ｅａｒｔｈ／ｊａ／ｐｒｅ－ｒｅｇ﹒ｈｔｍｌ＃ｊａ，今次招募嘅報名截止日期係今個月１４號，鍾意嘅不妨去撞下彩。
話說，廣東話有兩個諺語形容啲身先士卒嘅人，一個係「飲頭啖湯」，第二個係「行先死先」，所以報名之前真係要權衡下利弊，祝各位好運！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
etnet榮獲HKEX Awards 2023 「最佳表現證券數據供應商」大獎► 了解詳情
