RSS訂閱 近排虛擬貨幣炒價大上大落，連一啲少人炒嘅類別都突然飆升，好似玩味十足嘅Ｇｏｇｅｃｏｉｎ（狗狗幣）喺上個禮拜五（１６日）曾經炒上０﹒４３美金嘅歷史新高，總市值重上埋４００億美金，真係唔好限制自己想像力。
狗幣炒上，係因為狗幣原來誕生８年，重要係４月２０號迎接「狗狗幣日」，不過呢陣風吹完之後就散水，之後幣價下跌一成半有多。高追就梗係慘慘豬啦，不過有人愁就自然有人歡喜，有人就因為狗幣突然起飛而賺到笑，重好好心咁將所得部分收益捐返畀狗狗添！
上個禮拜六係佛羅里達州一間動物收容所表示，收到一位化名「狗狗社區」（Ｄｏｇｅ Ｃｏｍｍｕｎｉｔｙ）嘅女士捐款，呢位女士聲稱投資狗幣而大賺一筆，所以呢間收容所嘅領養費都由佢埋單！另外佢都會捐去畀哈利法克人道協會（Ｈａｌｉｆａｘ Ｈｕｍａｎｅ Ｓｏｃｉｅｔｙ），捐款同樣都係用以支付領養費。
正所謂「取之以狗，用之以狗」，協會主管表示，呢位女士投資加密貨幣係非常聰明嘅事，令佢獲得意外之財，而呢筆錢改變佢嘅生活之餘，又可以做返啲好事。但空間係有限，而流浪緊嘅狗狗係無限，正正因為收容所空間有限，而且支出龐大，所以主管話捐款前嘅狗狗領養費可以免單，但之後嘅領養費都要照畀。
由一個玩笑開始，令到咁多流浪狗狗都可以受惠，有時候賺到錢都要同人分享快樂，盈盈對於呢位女士嘅行為都畀個Ｌｉｋｅ，如果佢可以捐埋錢畀我呢個「單身狗」就好啦！盈盈都需要人幫助。《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
