RSS訂閱 魚缸琴日大爆發之後，今朝早要回下氣先。今日博客同大家睇下京東物流(02618)。
截至2021年6月止六個月，集團營業額升53.7%到484.72億銀人仔，但有153.6億銀人仔股東應佔虧損，業績轉盈為虧。不過，集團話嚟自一體化供應鏈客戶嘅收入係咁加，其他客戶營業額增幅更加顯著，為收入帶嚟增長動力。集團又話，隨住供應鏈解決方案增加，為客戶提高生產力和效率，有望改善長期盈利能力。
大行富瑞估計，京東物流喺數據洞察同協同網絡嘅支持之下，集成供應鏈物流解決方案會保持穩健增長勢頭，幫到客戶提高生產力同效率。該行又話，京東物流潛力巨大，長期利潤率亦可繼續改善。
公司早排同多間企業簽訂合作協議，包括同中國供銷農產品批發市場控股同新鄉雨軒清真食品股份，共同開通冷鏈專線，喺農產品一體化供應鏈領域展開戰略合作。另外，公司又同沃爾沃汽車簽署戰略合作協議，會一齊打造中高端汽車售後一體化供應鏈服務，聯合打造嘅全國八大物流中心亦全面開倉。
根據神州傳媒報道，今年春節期間，京東物流、EMS、順豐等主要速遞企業都唔會「收爐」，會提供「春節無休服務」，服務範圍包括疫情等特殊地區以外嘅地方。報道又quote各間受訪速遞企業話，春節期間會視乎各地業務量預測情況，合理安排員工輪崗值班，確保春節期間快遞服務安全、暢通。呢排Omicron爆得咁厲害，加上就嚟到農曆新年，啲人都可能傾向喺上網買嘢，令京東物流呢類公司嘅需求增加。
睇公仔圖，股價近幾日窄幅上落，不過10天線已經升穿20天線，MACD牛差距亦擴闊。早段股價曾經觸及10天線，博客認為可以喺現價入手博反彈，短期目標睇12月嘅最高位29.05銀，如果跌穿25.2銀就止蝕離場。
《編者按》本欄搜羅即市傳聞，惟消息未經證實，《經濟通》亦不保證內容之準確性。
樂本健【秋日開倉26 - 27/9】保健品低至$20！► 火速行動
