RSS訂閱 《笑傲缸湖》有時Ｄ阿媽，成日罵仔女讀書唔叻，運動又唔叻，淨係識得打機，玩乜比賽都
唔使旨意攞獎。嘿嘿，盈盈想安撫呢Ｄ父母，因為依家打機叻，都可以做到世界冠軍！
就算唔打機，都相信聽過東瀛任天堂（Ｎｉｎｔｅｎｄｏ）嘅大名！公司之前出嘅
Ｓｗｉｔｃｈ賣斷市，就知道公司Ｄ遊戲擁有幾多粉絲啦！依家任天堂就宣布，將會喺１０月７
日舉行第三屆任天堂世界錦標賽，而資格賽選拔活動就會喺８月１９日開始，即係下個星期六。
錦標賽舉行地點位於花旗國嘅紐約，至於選拔賽呢，就分別係８月１９至２０日、２６至２７日
、９月２至３日、９至１０日喺紐約、舊金山區、芝加哥、洛杉磯等地方指定嘅Ｂｅｓｔ
Ｂｕｙ店舉行。咁參賽者要比賽Ｄ咩呢？就係鬥《馬里奧賽車》啦！參加者速度愈快，就愈大機
會入選，大家記得練習多Ｄ啦！
只係說也奇怪，第一、二屆嘅賽事分別喺１９９０年同２０１５年舉行，舉辦嘅日子都好難
捉摸，因為都唔係定期舉行嘅，換言之今次機會亦算係「難得」。而更「難得」嘅係，選拔地區
只得花旗國，但明明呢個係「世界」賽嚟嘛，點解香江就未見到有選拔賽舉行嘅呢？！
《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
