RSS訂閱 《笑傲缸湖》今年花旗國銷售諮詢公司搞咗個ＭＢＬＭ（品牌親密度）測試，係上年對
６２００個人做咗有關調查。受訪者年齡介乎１８至６４歲，家庭收入最少要有３﹒５萬美金。
結果就發現，蘋果跌出咗當地人最鐘意嘅牌子，而米奇老鼠（迪士尼）就取而代之，成為咗市民
心目中嘅Ｎｏ﹒１。
該諮詢公司分析，蘋果同埋亞馬遜喺後生仔「孖屐」上面，成績依然理想。其中，年薪１０
萬到２０萬美金嘅年輕人入面，蘋果就穩佔首位；而年薪低過１０萬美金既就表示，亞馬遜先係
佢地心目中嘅冠軍人選！
ＭＢＬＭ同日解釋，迪士尼勝出主要由於，佢能夠引起懷舊情懷，加上「男女老少」皆宜，
每個年齡層都可以從中搵到共鳴。相反，蘋果就因為廣為人知嘅小失誤，加上消費者開始對電子
產品產生厭倦，認為蘋果明顯失去咗光環。
事實上，蘋果過去一年處理過各式各樣嘅災難，例如喺電池效能弱化，其後被指影響電話性
能嘅爭議，而蘋果最後選擇提供優惠畀需要電池更換服務嘅用家，希望可以挽回民心。另外，一
系列嘅法律訴訟亦對蘋果帶嚟一定嘅打擊架。
除咗上面所講，「唉瘋」又愈嚟愈唔賣得，而今日最新出爐嘅監管文件上面就顯示，股神巴
菲特旗下巴郡所持有嘅蘋果股份，由２﹒５２５億股減至２﹒４９６億股，下降１巴仙。另外，
金融大鱷索羅斯旗下嘅對沖基金，同日亦清倉蘋果。兩位股神齊齊掟貨，蘋果真係禍不單行！不
過，喺巴郡嘅總體持股量入面，蘋果依然係所有投資入面佔比最大！
唔知蘋果未來會唔會推出令果迷耳目一新嘅新產品，用誠意感動返大家呢？盈盈就唔係咁樂
觀啦，事關三星同華為下個星期就會公布新「摺ｍｏｎ」手機，似乎蘋果喺手機創新方面都繼續
食塵，令作為果迷嘅盈盈大感失望！
表列是次品牌親密度測試排名前十位的公司：
－－－－－－－－－－－－－－－－－－－－－－－－－－－－－－－－－－－－－－－－－－
１）迪士尼 ６）哈雷戴維森（Ｈａｒｌｅｙ Ｄａｖｉｄｓｏｎ）
２）蘋果 ７）ＰｌａｙＳｔａｔｉｏｎ
３）亞馬遜 ８）Ｙｏｕ Ｔｕｂｅ
４）雪佛蘭（Ｃｈｅｖｒｏｌｅｔ） ９）福特 （Ｆｏｒｄ）
５）網飛 （Ｎｅｔｆｌｉｘ） １０）福來雞 （Ｃｈｉｃｋ－ｆｉｌ－Ａ）
－－－－－－－－－－－－－－－－－－－－－－－－－－－－－－－－－－－－－－－－－－
《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
