RSS訂閱 《笑傲缸湖》鴻海集團呢幾日真係多新聞，日前先有傳出話郭台銘話想辭任董事長一職，嚇
到大家心肝都跳出嚟，後來官方證實只係誤傳。
最近最多人追問，就係２０２０年台灣大選，郭總會唔會一齊參選埋一份呢？今日（１６日
）早上郭總出席印太安全對話研討會，郭總接受傳媒採訪表示，寶島２０２０大選十分重要，因
為將會決定未來２０年嘅政治，而郭總撫心自問想幫年輕人，希望用政府經費發展經濟，所以會
喺呢兩日決定會唔會去競爭台灣總統嘅寶座。
說話一出，個個都憧憬郭總去馬並且當選，將對鴻海系股份有正面刺激作用。今日喺台灣證
交所掛牌嘅鴻海精密，股價都一度衝上９１﹒４銀台幣，市值一度突破１﹒２６萬億銀台幣，即
超過３２００億港紙；至於香江呢邊都唔弱，富智康（０２０３８）都一度升１７﹒７巴仙，高
見１﹒１３銀。
郭總都有透露，中國大陸同花旗國係寶島最重要嘅孖屐，而台美經濟都十分緊要。之後佢又
突然妏身「和平使者」，話寶島唔需要咁多武器，指要買一啲防禦性武器就好，因為佢話「和平
」就係最大嘅武器，希望政府留返多啲錢做投資咁話。
至於寶島人又點睇呢？４月份《放言》做過民意調查，如果郭總參選２０２０年大選，支持
度已經跑贏綠營蔡英文同賴清德，同無黨籍嘅柯文哲亦可打成平手；就算喺國民黨黨內，郭總都
係僅僅輸畀韓國瑜２﹒５巴仙。所以話，台灣人其實都好支持佢！但係國民黨派邊個出選，目前
都係太多變數，因為郭總表明，一旦參選，一定會經過黨內嘅初選程序，絕對不會接受徵召。
唔知係咪受花旗國影響，愈來愈多商人都想出嚟參政登大位咁。郭總起家其實同李超人都十
分相似，大家都係開塑膠廠起家，之後開始做電腦零件，目前係世界各地主要國家及地區，例如
美國、日本都有設立據點。而去到２００１年，鴻海營業額超越台積電，成為台灣第一大民營企
業。郭總假如真係可以「凍蒜」（台語當選的意思）的話，可能影響力比韓國瑜更大都唔定，畢
竟佢係世界各地有咁多業務，係咪先？《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
