RSS訂閱 《笑傲缸湖》睇到呢單新聞，令我諗起一句廣告對白：「世事無絕對，只有真情趣！」
美國聯儲局上星期宣布半厘，「揸ｆｉｔ人」鮑翁仲暗示跟住嗰兩次會議都會傾向各加半厘
，即係聯邦基金利率上限到７月時就升到２厘，而之後嘅會議喺９、１１同１２月舉行，由於
１１月８號進行國會中期選舉，或者１１月會暫停加息，但如果９同１２月各加半厘，到年底息
口都上到３厘啦！
美金近期勢不可擋，非美貨幣全線下跌，金甲蟲都唔敢借通脹推高金價，虛擬貨幣亦虛脫！
雖然交易時間全年無休，「一哥」比特幣星期一都由３４２００幾美金單日急插到３萬邊，尋日
仲穿埋，低見２９８４５美金。不過，今日想講嘅係「穩定幣」，即係同美金掛鈎嘅虛擬貨幣。
話說穩定幣ＵＳＴ今周一度跌到０﹒６５美金（原本係以１兌１掛鈎），搞到美國財政長「
耶奶」都要出聲話要立法監管，以保障投資者利益。另一邊廂，俾人咁隊法，ＬＵＮＡ基金會即
刻行動，利用作為擔保嘅２８２０５枚比特幣入市護盤，全力買入ＵＳＴ，最終將ＵＳＴ個價推
返上去０﹒９美金，據聞比特幣就係因為咁而被ＫＯ咁滯。你以為故事咁就大團圓結局？梗唔係
啦！今日ＵＳＴ再插過，而且插得仲深，去到歐洲市初段最低跌到０﹒２７１美金！
所以唔好以為炒虛擬貨幣梗爽，跌起上嚟都唔係人咁品！總之一句講哂，美金強緊揸咩都跌
，博短線反彈都要搵啱對象，唔係多多唔夠輸！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
