RSS訂閱 《笑傲缸湖》一場新冠疫情持續咗兩年幾，令到出門旅行甚至只係出差都成為一種奢侈活動
。不過正所謂「有錢駛得鬼推磨」，航空公司停航咩？啲有錢人租架私人飛機咪幾時同去邊都得
囉。有調查話，租用私人飛機嘅生意喺呢兩年嘅疫情下大增，甚至有商家睇到龐大商機。唔知喺
疫情仲未知幾時完嘅呢一刻，呢盤生意以天生鍾意去旅行嘅香港人為對象又有無得做呢？
聽航空數據研究公司ＷＩＮＧＸ講，私人飛機嘅用量近年增加咗，喺２０２１年尤其係咁。
喺歐美嘅增長帶動下，舊年全球私人飛機航班就達到有紀錄以來最高嘅３３０萬次，較２０１９
年嘅高位上升７％。
外國啲超級富豪講，喺疫情下租私人飛機出門真係好正㗎，唔單只唔使趕住去機場
ｃｈｅｃｋ－ｉｎ、避免隨時令人不快嘅機場保安檢查又或者機上體驗，而且就算遇到疫情都可
以隨時飛去邊都得，呢種既輕鬆又自在嘅體驗係大型商用客機俾唔到嘅。
不過，私人飛機生意而家都唔係毫無挑戰個喎。例如燃料價格上升，而且昂貴嘅出門成本仲
會令好多客都開公數支付（例如６個人來回倫敦同西班牙伊比薩島就要使大約２﹒８萬蚊美金，
即係約２２萬港紙），較少人真係自掏腰包。
美國公司ＪＳＸ睇到私人飛機客運服務咁渴市，但成本不菲，於是就推出「半私人飛機」客
運服務。呢種飛機每架載６至２０人，乘客有機會同陌生人同機，而且每程費用仲低至１２５蚊
美金（即係約港紙９８１蚊）添。
而為咗應對環保大趨勢，私人飛機業界都會用生物燃料，同埋探索使用電動、氫氣同混合動
力機種。
盈盈都幾佩服啲商家，喺疫情嘅「危」中都見到「機」。雖然話飛少啲係環保啲，科技又等
人隔住個芒都可以瞬間見面，但點都唔可以取代到人同人之間親身接觸嘅嗰種體驗，尤其係去外
國體驗當地風土人情，又或者生意人親自去外地傾生意嚟表現誠意嗰陣，私人飛機真係可以話建
奇功喇。盈盈相信「萬丈高樓平地起」，當初電腦同手提電話咪又係賣到貴一貴，但而家咪又係
人人都買得起！所以只要生意人肯不斷諗計，話唔定私人飛機第時就係「空中的士」嘅代名詞喇
！《任盈盈》
《編者按》本欄搜羅即市傳聞，惟消息未經證實，《經濟通》亦不保證內容之準確性。
【與拍賣官看藝術】常玉作品屢創天價，背後其實藏著跌宕起伏的人生► 即睇
