《Online有話兒》波叔救國泰，唔通有古怪？

　　波叔（陳茂波）噚日宣布「救國泰」方案，大拿拿400億用「土地基金」科水，真係夠爽又夠快，不過繞過立法會，政界梗係嘈到拆天；而且，個基金救完國泰仲有1900億可以用，以後邊間企業唔掂就可以搵政府伸手拎，唔使好似海洋公園搞到咁辛苦。

（資料圖片）

　　噚日波叔喺記者會上，解釋點解政府要出手救國泰，原因好簡單：

「唔係隨便一個人或者一間公司，佢有錢埋嚟就可以成立一間航空公司，入場嘅門檻好高，除咗錢之外仲有航權。」　

（Shutterstock圖片）

　　航權呢下就真係難搞，因為國泰擁有部分中途轉機嘅航權，此外都負責相當多嘅載貨量，仲係唔同目的地都可以自由裝卸。假如國泰真係執咗，講緊唔係無得去日本咁簡單，而係好多物流會突然中斷，間接提高出入口同轉口嘅成本。

　　對於點解咁突然公布呢個消息，波叔都有解釋：

「由於國泰，背後大股東太古、國航都係一間上市公司，中間涉及好多Price Sensitive(價格敏感)，有好多資料都對股價敏感，因此目前呢個方法（採用土地基金），可以保障到公帑可以適當運用，同時間喺一個合適嘅機制入面進行呢個決定。」

　　有政府幫手，國泰都鬆一口氣，主席賀以禮喺接住波叔記者會之後，佢自己都開返個記者會，佢係會上表示：

「國泰具有70年的品牌優勢，大灣區亦有助推動經濟發展。如果無資本重組會很快會花光所有現金，而沒有政府投資，國泰將會倒閉。」

（Shutterstock圖片）

　　聽落個故事就梗係好美好，不過，世界上好多福爾摩斯。有人計過數，國泰2019年財報顯示，有大概150億港紙cash，計埋大股東太古、國航如果肯救亡，區區幾百億點會拎唔出。

　　中環人有解讀，幾年前國航想吞咗國泰好耐，屬於面子工程，不過始終傾唔掂數；而家國泰病病地之際，由政府做白武士，交易完成後，國航、卡塔爾航空、港府夾埋總持股量多過太古，英國佬單一大股東地位蕩然無存。

　　另外，國泰發行比政府嘅優先股年息高達9％，埋單10年計，收息高達百幾億，肥過肥仔水，呢單「刁」無死錯人嘅！

撰文：李皆穎

【etnet一App通天下】獨家「銀行匯率比較」功能：匯市靚價一眼通，一按直達交易商，買入賣出好輕鬆！

立即下載>>

etnet財經﹒生活App 

iOS : https://apple.co/2PCaN4b 

Android: http://bit.ly/38h135T

etnet MQ強化版App 

iOS : https://apple.co/2VEjoHl 

Android: http://bit.ly/32RGk7G

【你點睇】美眾院通過法案，香港駐美經貿辦恐遭關閉，你是否支持中方對此作出強烈反制？► 立即投票