《小傳日記》劇飛大信封，科通被造空；ＱＱ在尋頂，缸邊最輕鬆！

　　《小傳日記》香江魚缸喺股王ＱＱ（００７００）繼續領軍之下，一路沿著十天線（約
２５１８９）向上衝，今朝高開１４３點後，雖然曾經有Ｄ腳軟軟得番２６點升幅，但之後獲得
內險佬助陣，好快就重拾升勢，仲一度跳起２７５點見２５４５０，衝破埋５月１６日嘅
２５４１３最高位添。埋單計，恆指收市都踢高２１６點或０﹒９巴仙，收２５３９１；國指亦
唔執輸，彈起１０６點或約１巴仙報１０３７４。魚缸全日總成交近８１９億銀。
　　雖然魚缸開開心心，不過今日開市前就有單打擊士氣嘅消息，就係劇飛（００２９３）宣布
今日約有６００名員工將會接到「大信封」，仲有風聲話，最快下個月會有另一輪裁員添。公司
裁員止血，劇飛收市袋走逾２巴仙報１１﹒５８銀。
　
＊劇飛無情雞股價卻有勢，ＭＡ三辣招地主唔算曳＊
　
　　魚缸有風聲話，謎一般嘅神州海航集團諗住入股本地基金佬惠理（００８０６），海航對惠
理嘅估值大嗱嗱有成２０億美金，股價即時飆高到近９巴仙，報７﹒８５銀，跟住就停賽，究竟
係要澄清定係好事近呢？海航系嘅股份今日就無乜反應；航基股份（００３５７）升唔夠１巴仙
；海航實業（００５２１）就冇郁過，報０﹒２７５銀；香港國際（００６８７）跣低２巴仙，
報３﹒９２銀。
　　繼藍戰士瑞聲（０２０１８）被狙擊到停賽後，科通芯城（００４００）成為第二個箭靶，
被神州沽空機構「烽火研究」狙擊，話佢業績充滿「水份」，仲順手畀個「強烈沽售」評級，
「他屐」０﹒５３銀，股價即時高台跳水大插２２巴仙，之後暫時離場唔玩，報７﹒８銀。董事
長就話已經向深圳警方報咗警，並會堅定回購。不過股價插得咁勁，睇嚟都未必挽回到缸友嘅心
了。
　
＊科通被狙擊海航又濕平，萬洲批舊股先跌後精靈＊
　
　　金管局上星期五（１９日）收市後，宣布見樓價再度回升，決定推出三辣招，加強銀行按揭
管理風險。花旗出報告話，今次出招，標誌香江樓價見頂，仲預言年底時，樓價會跌兩成添！不
過缸友一於懶理，一班磚頭佬都只係象徵式行低ＤＤ；而長實（０１１１３）荃灣新盤「海之戀
」仲反應熱爆，股價更跑贏同行，逆市衝高近１巴仙收５７﹒６銀。一於你有你加辣，我有我發
達！
　　當日收市後，恆指公司都宣布季檢結果，有ＤＤ爆冷，現任藍戰紅戰都原封不動，只係大象
同ＱＱ權重比例重咗Ｄ要「瘦身」，但都無阻大象行前１巴仙收６７﹒７銀，ＱＱ更加再向上高
見２７６﹒８銀，收升近３巴仙報２７５﹒４銀。
　
＊藍戰與紅戰不變應萬變，潤啤忽抽上中金在力薦＊
　
　　豬肉佬萬洲（００２８８）被股東ＣＤＨ折讓６巴仙，掟走超過６巴仙貨，套現近５８億銀
。不過可能折讓唔算太大，粉絲們又唔算太驚。萬洲最多只係碌低３巴仙，埋單拗腰幾乎打個平
，收報６﹒９５銀，微跌１仙。
　　潤啤（００２９１）靜咗一排，今日失驚無神大升逾８巴仙收２０﹒１５銀，仲一度去到
２０﹒２５銀歷史新高。原來全靠中金出手唱好，維持目標價２０銀兼入買評級不變，難怪升得
咁勁喇。
　　阿爺話風險可控前提下，支持保險資金投資重大工程，平保（０２３１８）又獲多間大行唱
好，股價開心跳起逾４巴仙收４８﹒２銀；國壽（０２６２８）都有逾２巴仙進帳。
　　
＊阿爺愛保保鋼鐵亦好堅，大賀與彩票升得認真顛＊
　
　　神州鋼材庫存持續插水，螺紋鋼價格升咗近半成，有唔少神州大行仲表示，需求會ｋｅｅｐ
住向好，搞到鋼鐵佬今日好鬼精神，馬鋼（００３２３）升近７巴仙，報２﹒９５銀；鞍鋼
（００３４７）升近半成，報５﹒３５銀；比較冷門嘅西王特鋼（０１２６６）都升咗近半成，
報１﹒１２銀；重鋼（０１０５３）則跑包尾，升咗近３巴仙，報１﹒１５銀。
　　大賀傳媒（０８２４３）今日話要升呢去主板魚缸，股價今日穩坐火箭，仲攞左個好意頭，
最多升咗８８巴仙，魚缸收工前就稍為降落，但埋單都有超過四成升幅，報０﹒６銀。
　　仲有彩票股都落鑊，當中第一視頻（０００８２）話未放棄彩票業務，當堂觸動缸友神經，
將第一視頻掃高近六成收０﹒３１５銀，仲帶挈埋街坊中彩網通（０８０７１）有５１巴仙進帳
添。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。