《古臣周記－古臣》價值終歸得反映，守得雲開見月明

　　《古臣周記》過去嘅周末真係熱死人，阿臣唔敢出街，淨係夠膽留喺屋企。不過，由於一樣
係咁熱，阿臣不得不開冷氣，但個心又好唔舒服，因為又做咗件唔環保嘅事情，加劇全球暖化。
近日見到奧迪汽車商打算研發電動車，希望全球電動車可以取代晒所有燃油汽車。阿臣行街睇過
啲Ｔｅｓｌａ電動車，都真係好靚好型！大家有錢買電動車仲好，為下一代著想下！

＊和記電訊賣業務大升，長和終於識得郁＊
　　
　　阿臣之前同大家提及過嘅和記電訊（００２１５），今個星期有新消息，話公司向
Ｉ　Ｓｑｕａｒｅｄ　Ｃａｐｉｔａｌ悉售和記環球電訊（ＨＧＣ）股權，總值１４４﹒９７億
銀，和記電訊預期出售所得溢利５７﹒５億銀。大摩就憧憬公司派特息，又升目標價，睇３﹒５
銀。可惜，阿臣子彈唔算好多故無入貨，有貨嘅缸友應該賺到笑吧？呢次令阿臣體會到，大股有
大股嘅魅力所在，有時候大股一樣可以郁好多，呢兩個月和記就已經飛起近三成啦！
　　至於阿臣好早就買咗嘅長和（００００１）終於喺今個星期追落後，股價見近兩年新高，最
高暫時見１０４﹒９銀。阿臣會繼續持貨，雖然等待長和上升呢段時間，同系電能
（００００６）、長建（０１０３８）表現仲好，如果先買呢兩者，沽完貨獲利後再買長和，阿
臣利潤仲豐厚，家陣阿臣確係輸咗機會成本。不過，阿臣操盤同資金都有限制，長和最後有得升
，都算係守雲開見月明，阿臣滿足了。

＊後生仔搞生意獨當一面，１００毛搵唔少＊

　　阿臣都有支持開嘅１００毛，佢母企毛記葵涌話打算上市，３位８０後老細終於為年青人殺
出一條血路，證明新時代係要有新嘅生意，而後生仔，憑創意加努力，一樣可以捱到做上市公司
老闆！不過，１００毛母企諗住主板上市，就即係佢過到主板上市嘅要求。根據上市規則盈利測
試要求，過去三個財政年度股東應佔溢利要至少５０００萬，最近一年盈利至少２０００萬。而
毛記就話截至今年３月底止年度收入達９５２３萬銀，睇落真係好犀利。
　　不過，毛記上市保薦人為大凌集團（００２１１）旗下嘅長雄證券，阿臣上網一搵，先知道
原來長雄證券早喺２００６年就被證監會譴責，話無做好內部監控。而長雄證券曾經包銷過嘅一
隻股票，名為人人控股（除牌前編號０００５９），就試過大玩「２５合２」再「２供１７」嘅
財技，而大凌集團亦試過供股合股。雖然歷史劇本係咁寫啫，又唔代表將來歷史一定會重演嘅，
只不過阿臣性格謹慎，對於新上市嘅股份，如果唔係過咗最長１年嘅禁售期，都唔會考慮長期持
有。因為如果一年後大股東係咁拋售，就隨時中伏啦。相反大股東無沽貨，而公司業務又好似有
啲睇頭嘅，再買都未遲呀係咪先？
　　
　　表列截至８月２日止投資組合表現：

　　股份　　　　　股數　　　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　長和　　　　５００股　　　　　９９﹒６元　　　１０４﹒８元　　　　５２４００元　

　　美股：
　　Ｔｅｓｌａ　　　２股　　　　　３１６美元　　　３１９﹒６美元　　　６３９﹒２美元
　　　　　　　　　　　　　　　　　　　　　　　　　　　　　　　　＃（約４９９５港元）
　　－－－－－－－－－－－－－－－－－－－－－－－－－－－－－－－－－－－－－－－－
　　＃以美電７﹒８１４０計算

　　股票市值　：５７３９５元
　　剩餘現金　：２１９３４元
　　組合淨值　：７９３２９元

　　組合本月收益表現：＋　１﹒１％（截至上月底止組合淨值：７８４３６元）
　　組合累計收益表現：＋２２﹒０％（本金６５０００元）（２０１６年８月開倉）

　　＊數據截至今日１１：３０ａｍ