《古臣周記－古臣》炒股經驗滿一年，回報率２１巴仙！

　　《古臣周記》「去年今日此門中，人面桃花相映紅。」回想過去一年，真係變化萬千，古臣
從一個初哥到累積咗一年嘅投資經驗，已經係一個好大嘅變化。雖然「庫房」進帳就唔多，不過
喺經驗上、知識上都提高咗唔少。唔經唔覺，轉眼間本欄就一年啦，古臣借呢個機會做一個回顧
啦！

＊選得對，放得錯＊

　　遙想去年八月，古臣第一隻買嘅股就係ＱＱ（００７００）。嗰陣ＱＱ仲係２０３蚊左右，
而古臣當時亦都擺多一萬銀落個「阿臣基金」度，為日後買貨添加火力。之後ＱＱ表現當然十分
好，古臣初期都覺得自己無買錯股票，但係操作上就仲係未夠班。何解？因為嚟到依家ＱＱ已經
升破３００蚊，古臣當時買入一手，亦即１００股，無放嘅話，唔計股息回報，依家一手都賺大
約一萬銀，一年回報率約五成。現實上，古臣喺上年１１月時就用１９５﹒４銀蝕放ＱＱ，「選
得對、放得錯」，真係令古臣後悔莫及。古臣因此明白到時間對投資來講係幾咁重要。難怪師兄
Ｐｈｉｌｉｐ都話：「你買細價股，莊家要炒上幾倍最少都要幾個月到一年啦，更何況你買大價
股，有乜股票可以唔長揸就令你發達？」
　　
＊經歷起與跌，幸好跑贏大市＊　　

　　話返轉頭，嗰陣古臣都係因為經歷緊大跌市，而買入ＱＱ嘅入貨位又唔夠低，所以持貨信心
當然唔大，而幾經檢討後，古臣明白到下次入貨價夠低嘅話，不妨持貨再耐啲！
　　其後古臣經歷咗花旗國大選，更經歷咗２０１７年七個月連升嘅大牛市！古臣好彩都賺到少
少錢。匯控（００００５）、中交建（０１８００）都有少少升幅，而最令古臣賺得多嘅都係金
隅（０２００９），為古臣人生第一次帶來四成回報。
　　總結一年嘅回報，古臣粗略計算過，截至噚日（１５日）有２１巴仙嘅回報，而魚缸回報就
有１９巴仙。睇嚟阿臣要繼續努力先得，因為連升七個月咁好嘅勢頭，古臣都只係跑贏大市少少
，所以仲有更多進步空間！而呢一年內古臣亦儲到錢，所以打算再注資１萬蚊落倉位度。不過，
經歷咗上星期四五嘅大跌市，古臣都有少少被嚇親，但古臣覺得北韓始終未有同美國開戰嘅條件
，所以孖屐嘅恐慌應屬短暫。咁好彩超人一號（００００１）仲未跌穿古臣嘅入市位，所以阿臣
會繼續持貨！希望未來一年古臣能更進一步！

　　表列截至８月１６日止投資組合表現：

　　股份　　　　　股數　　　　　買入價　　　　　　現價　　　　　　　總值
　　－－－－－－－－－－－－－－－－－－－－－－－－－－－－－－－－－－－－－－－－
　　港股：
　　長和　　　　５００股　　　９９﹒６元　　１０１﹒１０元　　　　５０５５０元　

　　美股：
　　Ｔｅｓｌａ　　　２股　　　３１６美元　　３６２﹒３３美元　　７２４﹒６６美元
　　　　　　　　　　　　　　　　　　　　　　　　　　　　　　　＃（約５６６９港元）
　　－－－－－－－－－－－－－－－－－－－－－－－－－－－－－－－－－－－－－－－－
　　＃以美電７﹒８２２７計算

　　股票市值　：５６２１９元
　　剩餘現金　：３１９３４元（開始注資１００００元）
　　組合淨值　：７８１５３元

　　組合本月收益表現：－　０﹒４％（截至上月底止組合淨值：７８４３６元）
　　組合累計收益表現：＋２０﹒２％（注資前本金６５０００元計）（２０１６年８月開倉）

　　＊數據截至今日１１：４０ａｍ