《小傳日記》四連升斷纜，成交仍然淡！

　　《小傳日記》花旗魚缸噚晚（３日）復市，喺科技股強勢下，道指成功紅盤高收１１９點，
報１９８８１點，讚！不過可唔可以再下一城，突破二萬大關，就要拭目以待。始終孖屐依家都
將焦點放喺侵侵（特朗普）上任後，能否兌現競選時嘅政鋼，同埋對中國嘅態度會唔會有大改變
，每件事都足以影響全球魚缸。
　　香江呢邊，缸友明顯喺長假期後，都仲係Ｈｏｌｉｄａｙ　ｍｏｏｄ，魚缸成交好靜，全日
只得５２５億銀。恆指亦窄幅上落，埋單收跌１５點報２２１３４，四連升劃上句號；Ａ場就幾
精神，踢高近１巴仙收３１５８，但國指都叨唔到光，行低１８點報９４４０。

＊大摩來讚好舜宇即高高，推ＶＲ頭盔聯想也風騷＊

　　手機設備股今日表現唔錯，舜宇光學（０２３８２）獲大摩升評級同目標價，由「減持」升
到「加碼」，目標價就由３２蚊大升到４２蚊，足足三成一，難怪股價彈起逾７巴仙，收報
３６﹒６銀。街坊瑞聲科技（０２０１８）同傳聞將推ＶＲ頭盔嘅聯想集團（００９９２），亦
分別有逾１巴仙同２巴仙進帳，各報７１﹒４５銀同４﹒９銀。
　　長實（０１１１３）同新地（０００１６）同樣獲里昂升評級，長實就由「跑輸大市」變
「跑贏大市」，但目標價就削到５５蚊，結果跑前逾１巴仙，報４８﹒７５銀；新地由「跑贏大
市」升到「買貨」，輕輕行前０﹒２巴仙，報１００﹒９銀。

＊Ａ股有苗頭ＥＴＦ高收，阿爺多規矩壽仔眉頭皺＊

　　今日內地魚缸表現不俗，Ａ場最多升到去３１６０點，ＥＴＦ成交都即刻多返，安碩Ａ５０
（０２８２３）行前逾１巴仙，報１０﹒８銀，成交多過噚日逾倍；南方Ａ５０（０２８２２）
亦升逾１巴仙，報１１﹒２銀。
　　中保監唔畀內險開發投機風險產品，同埋無實質內容意義、炒作概念嘅噱頭性產品等等。內
險呢排限呢樣限嗰樣，搞到平保（０２３１８）唔識跟祖國魚缸走，要腳軟０﹒３巴仙，收報
３９﹒２５銀；另一藍戰士國壽（０２６２８）都跟住唔見近１巴仙，報２０﹒６銀。

＊半新股鬥碌跌勢得人驚，中銀畀個讚神華見追捧＊

　　噚日（３日）急瀉逾八成六嘅Ｋ　Ｗ　Ｎｅｌｓｏｎ（０８４１１），今日再蒸發逾五成創
上市新低，收報０﹒３５５銀，再次成為今日跌幅王，但仍比配售價０﹒２銀高出近１倍
　　噚日掛牌嘅順興（０１６３７）收市托返上去，仲以２﹒０４銀高招股價七成收市，但今日
就無睇頭啦，開市後無耐飆到２﹒１９銀見上市新高後，隨即急速回落，仲一度低見１﹒５３銀
，最後埋單計無咗近２４巴仙，報１﹒５６銀，好彩仲比招股價１﹒２銀高。
　　ＫＮＫ（０８０３９）上市就嚟夠一個月，可惜今日都無咗近１２巴仙，報１﹒５７銀，但
比配售價０﹒３２５銀仲係高出近４倍！

＊野村叫掃貨中鐵轟隆隆，廣深與中車升得亦輕鬆＊

　　神華（０１０８８）宣布用３５２﹒５億人仔去投資保本理財產品，預期年化收益率逾３巴
仙左右。公司表示咁樣可以提升整體資金收益。中銀國際同瑞銀都出嚟唱好公司，推動股價飛起
逾３巴仙，報１５﹒１２銀。其他賣煤佬就無咁犀利啦，蒙古焦煤（００９７５）、兗州煤
（０１１７１）分別無咗逾１巴仙同飛起近１巴仙，報０﹒３４銀、５﹒３銀。
　　早前阿爺話上年鐵路固定資產投資完成８０１５億銀，而阿爺近期亦啟動第一條義烏到倫敦
直達貨運鐵路線，中鐵（００３９０）被獲野村提升評級至「掃貨」，目標價維持喺７﹒４３銀
今日飆前近３巴仙，報６﹒５１銀。廣深鐵路（００５２５）就飛起３巴仙，報４﹒８銀。中車
（０１７６６）都有近２巴仙落袋。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。