《小傳日記》渣打面青青，一號仔好正；牛市小回氣，缸友唔使驚！

　　《小傳日記》花旗魚缸噚晚（２日）喺蘋果帶領下，成功打破紀錄，首次收於二萬二大關之
上，勁到不得了！可惜，香江實在升咗太耐，多隻重磅藍戰派完成績表後又開始見回吐。今朝
（３日）恆指就未能跟外圍跳起，一開市跣低７３點，之後ＱＱ（００７００）、內險佬都要唞
一唞，大市跌幅一度擴大至２０７點至２７３９９。
　　好彩，沉寂咗好耐嘅祖國移動（００９４１）終於甦醒喇！再加上工行（０１３９８）同建
行（００９３９）撐住，恆指只係微跌７６點收報２７５３１，但三連升就要斷纜了；國指就唔
見５３點報１１００２。
　　雖然成交靜番ＤＤ，上唔番千億，約有８５５億銀左右，但其實魚缸大漲小回嘅格局，小傳
覺得更加健康呀！
　
＊渣打唔派息大行叫掟貨，急跌８巴仙失了那團火＊
　
　　渣打（０２８８８）半年多賺１倍去到近１２億美金，但唔派息，缸友唔多滿意之餘，德銀
話佢撥備前盈利渣過預期，瑞信更話只睇６５銀。環球缸友都決定掟貨，噚晚倫敦嗰邊唔見近半
成，香江呢邊今日都趴低８巴仙，收報８０﹒９銀，全日最低位收市。
　　今日輪到超人系嘅一號超人（００００１）同埋長實（０１１１３）放榜，雖然早排已升咗
唔少，但前者保持強勢續升近１巴仙，報１０８﹒５銀；後者就跣低唔夠半個巴仙，報６５銀。
　　賭仔銀娛（０００２７）就表現唔錯，獲野村重申「買貨」評級，今日跳番起超過１巴仙，
報４７﹒７５銀。
　
＊大象與ＱＱ拍住回回氣，聯通炒混改街坊亦跳起＊
　
　　大象（００００５）噚晚再喺倫敦回購逾１９８萬股，但今日第二次中期息１０美仙除淨，
都係要跟住孖屐腳軟軟，報７８﹒２５銀。ＱＱ（００７００）雖然獲大和升「他屐」到３５０
銀，依然順流衝落逾１巴仙，報３０８﹒６銀。另一大隻藍戰士生發發（００３８８）噚日大收
穫過後，亦回吐返１巴仙，收２２７﹒６銀。
　　聯通（００７６２）繼續炒作混改消息，傳ＱＱ同埋阿里等廿間企業會參與阿媽聯通集團引
入投資者嘅混改，ＱＱ同阿里可能會係最大投資者添。瑞信就重申聯通「跑贏大市」評級，結果
今日彈起２巴仙，收報１１﹒６４銀，係最威水藍戰士。大佬祖國移動都跑前近１巴仙，收
８３﹒７銀；中電信（００７２８）亦唔輸蝕，有半個巴仙進帳，報３﹒６９銀。
　
＊工行好威威內險卻撻低，下周一放榜俊文甚架勢＊
　
　　內險今日就見回吐，新保（０１３３６）跪低超過３巴仙，報５３﹒３銀，係最渣國貨佬；
財險（０２３２８）亦唔見近３巴仙，報１４﹒６銀；一哥平保（０２３１８）就腳軟近１巴仙
，報５９﹒０５銀。
　　魚毛俊文寶石（０８３５１）好叻仔，火箭式爆上３７巴仙，報０﹒３７銀，仲創過兩年高
０﹒４１銀，莫非下星期一（７日）放榜有好消息？另一邊廂，泰錦（０８３２１）表現就差得
多，直插逾２３巴仙，得返０﹒５３銀，但原來都仲高過舊年１０月上市配售價０﹒３５銀逾
５１巴仙。
　
＊去產能出台金屬佬落鑊，重鋼與馬鋼追貨好頻撲＊
　
　　有色金屬佬近期落鑊炒完又炒，俄鋁（００４８６）今日再飆高逾６巴仙，報４﹒７８銀。
有指，神州電解鋁行業去產能即將進入實質階段，未來一個月各省將會公布違規產能名單，去產
能細化措施好快就會出台，祖國鋁業（０２６００）亦應聲跳起近３巴仙，報５﹒２９銀。不過
洛陽鉬業（０３９９３）飛起３巴仙之後，卻倒跌１巴仙，收４﹒２７銀
　　重鋼（０１０５３）仲同緊主要債權人、潛在投資者談判，磋商重整投資方案，全日彈高逾
１１巴仙，埋單１﹒６８銀。街坊馬鋼（００３２３）都唔執輸，行前近６巴仙，收３﹒９９銀
。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。