《小傳日記》魚缸假前高高收，眾安在「震」好醜醜！

　　《小傳日記》國慶、中秋黃金周兩大假期前，Ａ場將會由１０月１號至８號停賽，而香江魚
缸就喺２號同５號休息兩日。至於缸友好關注嘅「北水」，即係港股通就喺噚日（２８日）起已
經暫停，要等到下個月９號先開通。
　　無「北水」滋潤下，香江魚缸今朝（２９日）都有Ｄ悶悶不樂，恆指高開７０點後就無咩變
動，不過尾市ＱＱ（００７００）、同中資金融佬都有番Ｄ力，大市抽升番１３２點完場，收報
２７５５４，不過就仲未上唔番廿天線（約２７７８３）；國指就踢高３５點報１０９１０。魚
缸悶咗成日，尾市先熱鬧番Ｄ，成交都唔會多得去邊，埋單約有７３４億銀咋。
　　不過悶還悶，有「三馬」撐腰，超購近４００倍嘅眾安在綫（０６０６０）掛牌第二日，繼
續成為缸友焦點。只可惜，眾安今日仲係唔爭氣，由開場跌到完場，最低仲試過６３銀新低，唔
計手續費，得番３００蚊左右袋落，就算收市都只得６３﹒４５銀，說好嘅「三馬」概念呢…。
但小傳收到風，今晚眾安同一班財演將會喺中環有個飯局，睇嚟大力睇好上望７０蚊嘅財演們，
都唔會錯過呢個機會問一問管理層，「眾安在綫」變成「眾安在震」，搞到「眾人不安」，究竟
有咩睇法呢？！
　
＊眾安甚不安在綫變在震，低見六十三高追太氣憤＊
　
　　眾安在綫上市翌日腳仔軟軟，其他內險佬就向左走向右走，平保（０２３１８）噚日瞓低近
３巴仙之後，今日行番前１巴仙，收報５９﹒９５銀；壽仔（０２６２８）就打個和無升跌，報
２３﹒２５銀。噚日受重傷唔見４巴仙嘅國貨佬新保（０１３３６）仲未止血，今日再唔見近
１巴仙，報４４﹒１５銀。
　　眾安令人失望，但內房喺長假期前落鑊，似乎唔記得加強調控囉！融創中國（０１９１８）
踢高近６巴仙，報３５﹒７５銀；有股王ＱＱ做股東嘅華南城（０１６６８）更加跳起近１３巴
仙，報２﹒２３銀，高見２﹒２銀創超過兩年高位添！
　
＊內房紛踢高忘記了調控？大摩來祝福牛牛收穫豐＊
　
　　藍戰士方面，蒙牛（０２３１９）今日相當省鏡，佢喺月中獲大摩將評級由「中性」升至
「跑贏大市」，「他屐」就由１４﹒６銀升至２４銀，埋單都有近５巴仙進帳，收報２１﹒８５
銀，係全日第二好嘅藍戰士。除咗蒙牛之外，昆侖能源（００１３５）今日都踩行油，中金維持
「持有」評級，「他屐」就由８銀升至８﹒５銀，同時仲大嗱嗱逾１５億人仔收購阿媽中石油
（００８５７）嘅資產，結果全日吹起逾５巴仙，報７﹒６３銀，係全日最靚仔嘅藍戰士。
　　萬洲國際（００２８８）早排有建銀國際維持「優於大市」評級，「他屐」就喺１０﹒１銀
不變，結果全日亦行前近４巴仙，埋單８﹒３銀，真係恭喜晒！　
　
＊昆侖獲注資粉絲喜孜孜，５Ｇ有錢途概念高一線＊
　
　　５Ｇ概念電訊佬今日繼續落鑊，中興通訊（００７６３）早排就通過祖國移動嘅５Ｇ承載
ＳＰＮ設備測試，全日衝前近４巴仙，報２５﹒５５銀；街坊京信通信（０２３４２）亦都飛起
逾７巴仙，盤中高見１﹒５２銀，創半年新高，全日收報１﹒４９銀；長飛光纖光纜
（０６８６９）都開埋香檳慶祝呀，結果全日行前近２巴仙，報２９﹒８銀。
　　「孖屐」憧憬同胞們會趁住超級黃金周，去馬交玩返兩手，賭仔銀娛（０００２７）今日表
現幾醒神，全日有逾１巴仙落袋，收報５５銀；街坊金沙（０１９２８）都唔輸蝕，全日亦應聲
彈高近１巴仙，報４０﹒６５銀，勁！
　
＊股仔禾雀飛你升我又升，順客隆復賽奈何唔多醒＊
　
　　中國公共採購（０１０９４）今日坐火箭，飆高１２５巴仙，收報０﹒２３９銀，係今日最
勁魚仔，原來呢隻主板股份今日炒起之前市值只有１﹒４億，主板「殼價」閒閒地都起碼７億以
上，唔通係因為咁所以落鑊？
　　早前被聯交所列入除牌程序第一階段嘅亞洲煤業（００８３５），之前話想發股收購內房開
發商之後升唔停，連升兩日累漲６２巴仙之後，今日又飛起１９巴仙，報０﹒０５６銀。
　　嘉域（００１８６）折讓７５巴仙易手控股權，復牌之後表現好反覆，完場時踢高４巴仙報
０﹒７５銀。中國順客隆（００９７４）都復賽，控股股東賣完股之後公眾持股量恢復，但結果
趴低超過一成，報３﹒６銀。長假期愉快！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。