按盤價 
《古臣周記》新冠肺炎直撲全球，環球央行齊放水，其中花旗國今個月內兩度緊急減息至零
，金管局將貼現窗基本利率周一（１６日）由１﹒５厘減至０﹒８６厘，但本地呢邊大象
（００００５）旗下獅子銀行就宣布維持最優惠利率（Ｐ）不變。喺疫情蔓延下，本地磚頭佬究
竟可唔可以受惠於呢次全球放水呢？
＊拆息料維持低水平，紓緩供樓壓力＊
花旗國聯儲局喺當地時間星期日（１５日）突然宣布減息一厘，並同時推出７０００億美金
嘅量化寬鬆措施。不過，本地錢莊龍頭獅子銀行就無跟減，小象（０００１１）、渣打
（０２８８８）同中銀香江（０２３８８）亦先後表示維持最優惠利率不變。
不過，金管局就預期，港元拆息應該會相應下調，有助推動實際按息回落。早喺今個月初花
旗國緊急減息半厘之後，同樓按相關嘅一個月拆息已經由２月中嘅２厘以上明顯回落至近日嘅
１﹒１至１﹒４厘水平，曾令Ｈ按息率跌穿目前一般Ｐ按封頂息率（２﹒５巴仙），除咗減輕大
部分用Ｈ按供樓嘅用家壓力之外，亦吸引更多人由Ｐ按轉去Ｈ按。喺全球加大放水力度之下，供
樓壓力可略為紓緩。
＊樓價回落，用家需求仍剛＊
雖然減息唔多唔少都可以減輕供樓人士負擔，但喺疫情下，樓市前景如何？用家需求大唔大
？自舊年６月社會運動出現嘅時候，樓市已經開始調整，中原城市指數（ＣＣＩ）由舊年５月高
位１８５﹒２３高位計算，至今累跌約６﹒６巴仙。房地產服務商戴德梁行就認為，今次疫情同
當年沙士唔同，沙士時候嘅樓市已經下行左六年，加上疫情過後有政策支持，所以谷底回升反彈
得幾明顯，但依家經濟進入下行週期，後市走勢未必當年咁，預計上半年樓價跌大約一成。
反映二手私人住宅樓價走勢嘅中原城市指數至今亦連跌四星期，累跌２﹒６９巴仙，最新報
１７４﹒０３，創一年新低。中原預期，ＣＣＬ會繼續下滑，並下試１７０嘅水平，並估計近排
花旗國孖屐兩度觸發熔斷機制停板，對香江樓市嘅影響要到下個月先會慢慢見到。
不過，買家嘅需求似乎無減少到，會德豐（０００２０）上星期六（１４日）推出嘅日出康
城項目，首批折實呎價約１４６８０銀，重返近一年前水平，首日就沽出九成，兩日後仲宣布加
推。睇來只要樓價稍微回落，用家嘅需求就會再度湧現。
＊買貨不用急，觀望多陣＊
總結自新冠肺炎疫情喺本地爆發以來，暫未見到對本地樓市造成衝擊，原因在於死亡率遠低
過當年沙士，樓市亦無出現拋售嘅情況，更重要喺香江用家需求持續，相信下半年復甦前景樂觀
。再睇埋啲本地磚頭佬，自從舊年下半年起股價已經回落，唔少估值已經非常吸引，依定再加埋
個疫情，部分磚頭佬例如新世界（０００１７）股價仲穿埋舊年下半年嘅低位，目前股價與資產
淨值折讓一半有多。
再加上，近日孖屐非常波動，資金都開始尋覓穩定收息嘅股份例如公用佬，而目前四大磚頭
佬嘅息率都有４至５厘，好似新世界仲有近６厘添；加上前景唔係太淡，所以有望比其他估值高
嘅股份穩陣。阿臣都打算買返啲磚頭佬來作中長線部署，但鑑於目前全球疫情未有緩和跡象，磚
頭佬仍有跟跌風險，所以唔急於一時買貨，可以再觀望陣先。
＊賣出深高速、旺旺止蝕離場＊
過去呢個星期環球孖屐慘遭股災來襲，呢個時候阿臣都認為要揸番多啲現金比較好。之前農
曆新年前買落嘅深高速（００５４８）因為神州豁免高速公路費而急挫，本來阿臣見佢息率都高
可以當收息，不過上星期四（１２日）跌穿阿臣嘅止蝕價９銀，加上佢基本面唔太好所以都喺９
銀賣出。至於隻旺旺（００１５１）同樣喺新年前買落，短線部署春節期間需求上升，但眼見神
州經濟遭疫情重挫，亦影響民眾消費力，所以都喺同日以５﹒８銀止蝕賣出。其他股份繼續持有
。
表列截至３月１８日（上午１１：１５時止）阿臣投資組合表現：
股份 股數 平均買入價（元） 現價（元） 總值（元）
－－－－－－－－－－－－－－－－－－－－－－－－－－－－－－－－－－－－－－－－
港股：
煤氣 １０００股 １６﹒００ １４﹒９４ １４９４０
ＳＰＤＲ金ＥＴＦ １０股 １０９７﹒００ １１１６﹒００ １１１６０
平安好醫生 ５００股 ５２﹒９０ ６６﹒１５ ３３０７５
阿里巴巴 １００股 １７６﹒００ １８０﹒５０ １８０５０
微盟集團 ２０００股 ４﹒５５ ４﹒４６ ８９２０
－－－－－－－－－－－－－－－－－－－－－－－－－－－－－－－－－－－－－－－－
股票市值 ： ８６１４５元
剩餘現金 ： ９３０９７元
組合淨值 ： １７９２４２元
組合本月收益表現： － ４﹒９％（截至上月底止組合淨值：１８８５６５元）
組合累計收益表現： ＋７０﹒７％（本金１０５０００元計）（２０１６年８月開倉）
＊數據截至今日上午１１：１５ａｍ
樂本健【秋日開倉26 - 27/9】保健品低至$20！► 火速行動
