按盤價 
《魚缸博客》近日適逢業績期，日日都有上市公司派發成績表。成績當然有好有唔好，不過
，喺而家呢個環境，有少少增長都已經算係唔錯。當然，唔同板塊有唔同期望。但對於內房股，
我估無乜人會期望一間內房企業舊年會賺多咗，或者生意做大咗呱。國營房企都仲話好少少，民
營房企，無論係營業額，定係純利，基本上跌少當贏。
房企都算了，畢竟深受債務危機困擾。但物業管理股一向穩穩陣陣，點知一樣守唔住。多隻
過往賺錢能力高嘅物管股，近日派發嘅成績表，簡直慘不忍睹，雖然仲係有錢賺，但舊年純利就
跌到阿媽都唔認得。再睇返啲內房股，個別少睇嘅細隻內房股股價原來早已經由「蚊」股跌到「
仙股」。
筆者忽然諗起內地一個朋友，佢一向係內房股大好友，記得大約２０１８年，筆者到內地辦
事，約呢位朋友出來見面。言談間講起佢手上揸住隻禹州地產（０１６２８）。當年嘅股價挨近
５元，而佢早期買入價好低，無記錯應該係幾毫子，帳面賺近十倍，我問佢，賺咁多你仲唔放？
佢氣定神閑咁話我知，佢想長揸，作為退休股。反正年年有息派，而且息率一啲都唔輸香港傳統
嘅收息股。當然，無人會知道，一場債務風暴，會將內房企摧殘到呢個地步。今日禹州地產股價
０﹒０７９至０﹒０８２元之間。
呢兩年疫情關係，筆者好少到內地，亦唔知呢位朋友仲係唔係揸住呢隻股票，亦唔敢問，怕
會提起佢嘅傷心事。所以，股票嘅嘢，長情未必好，皆因唔係隻隻都適合長揸。（ｖｓ）
《編者按》本欄搜羅即市傳聞，惟消息未經證實，《經濟通》亦不保證內容之準確性。
全新節目《說說心理話》青少年不可以戀愛！？真實個案講述驚心動魄經歷► 即睇
