《小傳日記》習特會結束，魚缸唔識郁；賭仔好醒神，吉利在痛哭！

　　《小傳日記》「習特會」圓滿結束似乎傾得掂數，侵侵又無繼續空襲敘利亞，上禮拜五（７
日）外圍魚缸亦回歸平靜；香江魚缸今朝就高開３４點，收復番十天線（２４２８１點），但砵
砵車吉利（００１７５）唔生性，魚缸都無咩心機，其後都只係窄幅上落，高低波幅只有９９點
。恆指收市微微腳軟５點，報２４２６２點。魚缸已連跌第３日，累跌１３８點。
　　Ａ場跌咗半個巴仙，報３２６９點；國貨佬就唔見咗２０點，報１０２５３點。魚缸除咗唔
見上升動力，連交投都縮埋，全日主板成交得６５１億銀，少過上周五（７日）近２７巴仙。

＊你眼望我眼成交縮呀縮，回購功告成大象微微郁＊

　　大象（００００５）上星期五晚再喺於倫敦回購３２３﹒８萬股，涉及近２１１７萬英鎊。
計埋計埋，佢新一輪回購計劃已經完成九成有多，今日行前唔夠半個巴仙，報６３﹒４銀。
　　聯通（００７６２）卻趴低近４巴仙，得返１０﹒５６銀。有傳Ａ場聯通
（滬：６０００５０）諗住混改發行新Ａ股，集資最少３００億人仔。
　　領展（００８２３）大嗱嗱斥資４５﹒７５億買廣州荔灣區「廣州西城都薈廣場」，但缸友
似乎唔多受落，跣低逾１巴仙，報５５﹒３銀。港鐵（０００６６）今朝東涌線蝦碌，但股價表
現反而唔錯，駛前近２巴仙，收４４﹒４５銀破頂。中電（００００２）都創過上市新高
８２﹒５銀，最終微微收穫０﹒２巴仙，收８２﹒４５銀。

＊項俊波落馬保保添變數，Ａ股傳伸手聯通Ｈ下碌＊

　　中保監主席項俊波落馬。睇返今日一眾保險股普遍偏軟，壽仔（０２６２８）跌約１％，而
新華（０１３３６）跌０﹒７％，而平保（０２３１８）跌０﹒８％。
　　砵砵車今日繼續開倒車，藍戰士吉利３月總銷量按年升７４％至８﹒７萬部，但按月就少咗
２巴仙。大摩話「孖屐」太樂觀，重申減持；吉利全日後退咗近半成，報１０﹒５銀，係今日最
渣藍戰士。街城廣汽（０２２３８）就畀里昂降評級去到跑輸大市，結果要趴低近半成，報
１１﹒７銀。
　　招商局（００１４４）以超過８５億賣走曬中集集團（０２０３９）畀阿媽招商局集團，自
己就賺近８億，但今日唔識郁，收報２２﹒４銀。
　　之前公布配股同發可換股債嘅中國軟實力（００１３９）就好刺激咁坐過山車，今朝開賽無
耐立即急升兩成半，但好快又跌番，收市唔見近１７巴仙，報０﹒２４５銀。

＊領展穗入貨港鐵開快車，招商有大刁１３９波動＊

　　馬交賭仔喺神州大力打貪下頹咗一排，但近排有賭海翻身嘅跡象，不斷有大行出嚟唱好。澳
博（００８８０）有瑞銀升「他屐」，由６﹒７銀升到去６﹒９銀。雖然調升幅度唔算好多，但
缸友已經相當興奮，佢今日最多升超過半成，最高去到７﹒３銀創逾一年半新高，全日就升超過
４巴仙，報７﹒２３銀。
　　新濠國際（００２００）都好巴閉，最多升差唔多９巴仙，亦創超過一年半新高１５﹒５８
銀，最終則升近５巴仙，報１５銀。賭仔一哥銀娛（０００２７）都有超過１巴仙進帳，報
４３﹒８５銀，曾經高見４３﹒９銀，係近兩年半高。

＊北水似散水股仔腳仔軟，創維數據曳６２８狂飆＊

　　今日個別北水股散水，上周五港股通（深）排第３嘅埃芝芝（００７９９）今日腳軟軟，雖
然招銀國際首予「入貨」評級，畀目標價１２﹒８銀，但結果卻跪低近９巴仙，報９﹒５９銀；
神ａｐｐ美圖（０１３５７）都無運行，跣低超過半成，報１２﹒３８銀。
　　創維數碼（００７５１）３月喺祖國嘅電視機銷售量按年跌兩成半，全年就賣少咗７巴仙，
缸友見條數唔多掂都要錢唔要貨，最終跣低逾７巴仙，埋單４﹒７２銀。
　　國美金融科技（００６２８）劉曉鵬接任行政總裁，股價急升３６巴仙，收報１﹒４３銀，
係今日最叻魚仔。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。