《小傳日記》歐洲如期不減息，香江好友即留力！

　　《小傳日記》歐洲央行噚晚（２１日）一如預期，按兵不動唔減息，無為缸友送上「意外驚
喜」，英法德三大魚缸都平穩收市。至於連升九日嘅道指，終於要斷纜，晶片巨擘英特爾及運輸
企業季度業績唔靚仔，成為淡友出擊嘅藉口，埋單下跌７７點收１８５１７，終止九連升。
　　疑似踏入牛市第一期嘅香江市，上到兩萬二，今日（２２日）難免要唞唞；一開場就跟花旗
市低開８７點報２１９１３，之報都窄幅上落，但高低波幅都只得百幾點。恆指最後埋單只收跌
３６點報２１９６４，國指唔見２５點收９０３１。既然個市無方向，缸友當然離場等下星期一
（２５日）實施嘅收市競價，同埋下星期二（２６日）同三（２７日）美聯儲議息後有無進一步
「暗示」喇；是以全日成交又再靜番落嚟，只得５２０億銀。

　　今天大暑，香江天氣真係熱到爆，而同樣熱到爆當然係《ＰＯＫＥＭＯＮ　ＧＯ》啦。不過
，當大家只關注幾時有得玩，去邊度捉比卡超嘅時候；喺地球嘅另一端，叙利亞有廿幾萬兒童，
正飽受戰火之苦。小傳老友任盈盈，今日就喺《笑傲缸湖》寫咗篇文章題為
《「敘利亞Ｇｏ」小精靈改圖，寄望關注戰火中兒童》，好有意思！

＊大暑熱到爆缸友也唞唞，大家齊關注戰火中兒童＊

　　財經新聞一樣可以好精彩，萬科（０２２０２）劇情峰迴路轉估佢唔到，逼到中證監終於要
出手介入，仲譴責萬科無視市場穩定，不顧中小股東利益。之不過，股權爭奪戰未阻萬科生意表
現，集團宣布向全體Ａ股（深：０００００２）股東派息，每１０股派７﹒２銀人仔，再加上花
旗唱好，結果Ｈ股一口氣衝前近４巴仙，報１６﹒１２銀。同樣搞地產嘅中海物業
（０２６６９）早前發盈喜，今日再發力跑前逾一成，到１﹒５２銀。
　　噚日臨收市前，缸湖傳出中廣核集團同神華集團嚟個大合併，中廣核旗下魚毛噚日已偷步炒
起，點知原來係「食詐糊」，雙方都否認傳聞。中廣核系全線倒後褪，中廣核礦業
（０１１６４）跌低超過半成至０﹒５２銀，中廣核電（０１８１６）碌落逾５巴仙，至
２﹒２６銀，至於藍戰士神華（０１０８８）都跟住行落逾２巴仙，埋單報１４﹒４４銀。

＊萬科惹關注中證監開腔，下周推Ｕ盤生發發踏前＊

　　生發發（００３８８）下星期一（２５日）推出收市競價２﹒０，未知效果如何，不過生發
發今日心情幾平靜，行前唔夠１巴仙，收報１９２﹒４銀。
　　歐央如預期一樣按兵不動，似乎「脫歐」對經濟影響未見明顯震盪，所以都無暗示９月會唔
會收手，炒放水市嘅缸友失望而回，本地地產佬都唔高興，新世界（０００１７）、新地
（０００１６）、恆地（０００１２）齊齊跣低唔夠１巴仙，分別報８﹒８４銀、１０９﹒３銀
同４６﹒５銀，唯獨會德豐（０００２０）話已經達到全年銷售目標，升近１巴仙賀下佢。

＊中廣核神華齊否認合併，地主佬回吐金股卻甚醒＊

　　砵砵車向左走向右走，廣汽（０２２３８）噚日俾大和降級至「沽售」，搞到今日碌低咗近
３巴仙，報１０﹒２銀；街坊北京汽車（０１９５８）同戴姆勒（Ｄａｉｍｌｅｒ）夾份開嘅公
司第二季按年賺多咗１﹒１倍，好過市場預期，所以佢衝前咗近半成，報７﹒０１銀；同行比亞
迪（０１２１１）完成咗Ａ仔發行，引入三星附屬，但股價未見有支持，今日跣低左近２巴仙，
報５１﹒３５銀。
　　金價反彈，之前跌咗嘅金股都跟住跳起，紫金（０２８９９）跳高１巴仙，報２﹒８９銀；
中國黃金（０２０９９）走前唔夠半個巴仙，報１４﹒３２銀；招金（０１８１８）飛起超過１
巴仙，報８﹒６６銀。

＊招證畀個讚信利一年高，勵晶發盈喜飛起來慶祝＊

　　信利國際（００７３２）獲招商證券升評級，由「中性」升到「買貨」，連升兩日後今日再
跳起７巴仙，收報４﹒１銀創超過一年高位。
　　勵晶太平洋（００５７５）料半年純利激增１０７倍至１３０倍，而達１﹒１億銀至１﹒３
億銀，主要係收購收益同埋投資所賜，今日股價因此炒起３９巴仙，收報０﹒２８５銀。
　　時富投資（０１０４９）打算賣走阿仔時富金融（００５１０）逾３６巴仙權益，今朝齊齊
復牌，前者踢高８巴仙，埋單０﹒５３銀；後者卻唔見６巴仙，收報０﹒３９銀。假期愉快，謝
謝！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。