《小傳日記》ＰＭＩ走樣，Ａ股卻高漲；陰霾蓋歐洲，大象受重傷

　　《小傳日記》噚晚（１５日）花旗國魚缸一輪波動，升完再倒跌，港股ＡＤＲ都十分唔爭氣
，個勢仲頹過花旗股，計埋插足四百幾點，令到本來噚日勉勉強強扶住２３０００嘅魚缸，今日
一開波就再嚟撻個你死我活。之後匯豐公布今個月神州製造業ＰＭＩ初值，跌到得返４９﹒５，
創七個月新低，進一步拖低魚缸。不過數據出咗無耐，Ａ仔場嗰邊唔知喺咪博阿爺會再鬆鬆手谷
經濟，反而又造返好，仲衝返上３０００點。本來以為Ａ仔可以打救下香江呢邊喇，點知魚缸都
係一池死水，冇出息；事關希臘要大選，花旗國又議息，再加上戰鬥民族俄羅斯加息，令到全世
界氣氛慘淡。
　　香江腳軟症睇嚟冇咁快好得返，「跟跌唔跟升，一跌冇時停」，今日魚缸低開１５０點之後
一路向下潛，同噚日朝早一樣二萬三大關一攻即破，全日最多試過唔見近３８６點。雖然Ａ仔場
今日收市都進帳２﹒３個巴仙，但香江呢邊，全日收市跌３５７點或者１﹒６個巴仙，收報
２２６７０點；國貨佬傷勢就輕啲，收報１１１３６點，軟７５點。
　　　　　　　　　　
＊外圍立立亂睇見都心酸，跟跌唔跟升問你怎打算＊

　　Ａ仔場今日道氣返返嚟，令到一班券商又再執行馬鞭再跑出。同以往一樣，一班中資券商依
舊成為飛升之星，中信証券（０６０３０）踢高６﹒６巴仙，收報３０﹒７銀；海通證券
（０６８３７）亦踢高６﹒４巴仙，報２０﹒１５銀；至於中國銀河（０６８８１）亦都踢高
３﹒８巴仙，報１０﹒４銀。
　　至於香江呢方面，有傳行會已為兩電喺出年嘅電費變幅方案拍板，據稱電能（００００６）
將會如早前所講凍結電費；中電（００００２）就獲加價３﹒１個巴仙，只可惜仍然跑輸通脹。
但點都好，兩電高層將去立法會解畫。今日中電微踢低０﹒２巴仙、電能就踢低２﹒１巴仙，股
價好似仲有大把手尾跟。

＊Ａ仔場叻叻券商多人錫，油價碌呀碌油股再被劈＊

　　油組繼續話唔減產，維持每日石油產量３０００萬桶。無耐前先話要召開一個下個月先開嘅
緊急會議，家陣阿聯酋能源部長就話油組唔需要召開會議，咁樣等於不斷喺重傷嘅油價上加多兩
搥，紐約期油創５年半低位，收報５５﹒９１美元。油價一跌再跌之下，賣油佬又向下碌。中海
油（００８８３）同中石油（００８５７）、中石化（００３８６）分別踢低３﹒４、２﹒３同
１﹒７巴仙。油價跌成咁，缸友準備好出發坐第二班快機未？南航（０１０５５）今日落足馬力
，繼續飛上５﹒１巴仙，報３﹒８９銀；國航（００７５３）亦都開高４﹒４巴仙，報６﹒５９
銀；東航（００６７０）都唔差，踢高１﹒８巴仙，報３﹒９銀。
　　但呢邊飛機起晒飛啫，賣奶佬就繼續跌唔停，蒙牛（０２３１９）挫２﹒９巴仙，報
２８﹒８銀；而現代牧業（０１１１７）插低７﹒９巴仙，報２﹒２１銀；雅士利
（０１２３０）就跌低４﹒８巴仙，報２﹒１７銀。
　　
＊鐵鳥齊齊飛無貨有點悲，加價三巴仙二號卻不肥＊

　　今日孖屐嘅另一個焦點，除咗俄羅斯央行突然加息外，睇怕都係希臘提早大選。如果反對派
大勝群起反抗歐央行嘅拯救計劃的話，話唔定歐債又再死灰復燃。歐債呢兩隻字，提起都令人驚
驚啦，所以搞到一眾歐洲概念股兵敗如山倒。對淡友嚟講，大象（００００５）即成怒沽嘅磨芯
，今日股插低２巴仙，拖低大隻佬，收報７２﹒６銀，創２０１２年後新低。雖然渣打
（０２８８８）今日好似跌少啲，只碌低１﹒７巴仙，但企後兩步睇，今日創咗約年半低位。
　　講開渣打，佢今日真係新聞多多啦，事關佢賣囝嗰單刁又有新進展啦。話說渣打旗下嘅消費
者信貸業務附屬安信信貸，獲財團開價６０億銀提親，但情歸何處呢？終於揭盅啦，東亞
（０００２３）大大啖將之收歸旗下。個刁抵唔抵？真係要東亞肚裏條蟲先知！但股東嘅反應就
一般啦，佢股價今日收報２９﹒５銀，全日埋跌１﹒３４巴仙。

＊東亞買得豪粉絲即掟貨，奶股受重創內房各走各＊
　　
　　除咗外圍異動外，一河之隔嘅祖國都有不少事發生，就好似巿傳不動產登記條例，而家已進
入正式發布嘅倒計階段，甚或喺２０１４年趕尾班車出爐。咁究竟佢係乜東東呢？線眼指計劃其
實係為將來開徵房產稅、個人不動產信息查詢、甚至「以房反腐」所做嘅前期備工作，換句話說
即係打擊炒樓嘅空間，所以搞到一眾祖國磚頭佬無乜好過。
　　情況有幾嚴重？唔使估估下，單睇下三大龍頭內房股價，就可知一二啦。中海外
（００６８８）、雅居樂（０３３８３）同跌逾３巴仙，各收２１﹒７銀及４﹒３５銀；潤地
（０１１０９）亦跌１﹒１巴仙，收報１９﹒２２銀。但另一方面，部份二、三線內房則看似無
懼衝擊，逆流而上，其中中渝（０１２２４）升咗約２﹒２個巴仙。至於碧桂園（０２００７）
、方興（００８１７）則跟返主旋律，分別跌約１﹒７同１﹒８個巴仙收巿。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。