按盤價 
《小傳日記》花旗魚缸跌咗幾日，噚晚（２９日）終於有好消息沖喜一吓，新領失業救濟金
人數銳減，創近１５年來新低，好過孖屐預期多多聲，道指即刻爆升返二百幾點至１７４１６。
收復番部分失地。
香江就梗係趁機會衝上去喇，今朝（３０日）一開市就彈高１７０幾點，不過噚晚阿里巴巴
成績表唔掂，高增長年代不再，股價急插落嚟，「揸Ｆｉｔ人」馬雲連中國首富寶座都無埋。結
果，科網巨頭ＱＱ（００７００）即成淡友攻擊目標，加埋祖國移動（００９４１）壞消息拖累
碌低，搞到香江調頭跌番落去最多１４５點，埋單唔見８８點收２４５０７。
Ａ場嗰邊又傳出三大部門聯合監管「兩融」，嚇到收跌１﹒６巴仙收３２１０點。不過，國
指竟然無受太大影響，收市只輕輕跌１５點報１１７２０。全日成交約８５１億銀左右。
＊巴巴美急插囝囝港重傷，ＱＱ變池魚科網同惆悵＊
噚晚阿里巴巴公布業績，第三季每股賺８１美仙，好過預期，但係營收就差過預期；喺花旗
國嗰邊，仲可能畀人集體訴訟告佢涉賣假嘢，阿里巴巴跌咗近９巴仙。將領打敗仗，一眾阿里字
頭嘅手下都散晒，阿里影業（０１０６０）約２億銀插低逾７巴仙收１﹒５４銀，阿里健康
（００２４１）都跌近４巴仙。
股王ＱＱ同為科網巨頭，缸友見到阿里業績麻麻地，唔多唔少都影響埋對ＱＱ嘅信心，就算
ＱＱ今日傳出同ＮＢＡ合作，又傳買遊戲網嘅消息，都嚇到腳軟趴低，最低得番１２９﹒５銀。
好彩埋單跌少咗，收圾１３２銀。街坊軟件股都麻麻地，金山軟件（０３８８８）碌低逾３巴仙
，金蝶（００２６８）就踢低近５巴仙添。
＊中銀賣南商股價即抽上，大新叨叨光今天急急漲＊
噚晚收市之後，孖屐傳出本地錢莊賣銀行資產消息，話中銀香港（０２３８８）作勢想賣走
南洋商業銀行，估值成６０億美金，其實中銀喺話研究緊。而被傳係可能係潛在買家之一嘅中國
信達（０１３５９），就夤夜澄清話無同第三方傾過。
結果事件中主角中銀升２巴仙，報２７﹒２５銀，盤中高見２７﹒７銀，同歷史高位
２７﹒９５銀爭唔係好多咋。中國信達就唔見近２巴仙。另一方面，上年講過啱價會考慮賣盤嘅
大新銀行（０２３５６），又借機炒高近７巴仙。大新金融（００４４０）亦叨光升逾３巴仙。
講開錢莊，國際級嘅大象（００００５）就慘啦，有報道話佢被米字國告不良銷售，可能要
賠成１０億英鎊，仲被瑞銀削目標價添。不過收市竟然都有０﹒２巴仙進帳，收７２﹒４５銀，
勁。渣打（０２８８８）就直情係陰功豬喇，有傳公司已經開會傾ＣＥＯ換人嘅事，雖然里昂幫
口話缸友驚過頭，但今日散場都要跌１﹒５巴仙收１０４﹒９銀。節流政策未見效又換人，「紅
底」保唔住只係時間問題。
＊濠賭場禁煙股仔唔多靚，不怕四四聲新高嚇一驚＊
至於早排有番Ｄ起危嘅賭仔，今日又要向下碌，皆因澳門政府話，賭場控煙工作同社會大眾
期望存在落差，建議全面禁煙。本來以為個跌勢只係好輕微，但下晝班賭仔愈踩愈深。咁又係，
博殺緊嘅時候唔比抽兩口，好多賭仔可能唔多慣；德銀再踩多腳話銀娛（０００２７）、永利澳
門（０１１２８）同埋新濠博亞（０６８８３）就影響最大。結果銀娛又再跌低３巴仙報
４０﹒９銀，成為最弱嘅藍戰士，金沙（０１９２８）就係第二差，報３８﹒０５銀。
不過個市唔得，都仲有啲藍戰士醒醒目目。恆安（０１０４４）同九倉（００００４）今日
都逆市衝高，全日分別踢高近４巴仙同０﹒５巴仙，齊齊創逾一年高，前者最高見９２﹒３５銀
，向著紅底一族出發添；而後者最高亦去到６３﹒９銀。另一隻同樣係「４」字尾嘅招商局
（００１４４）本來都創三年半新高，但尾市無力，最終打平收場，報２８﹒５５銀，但都好叻
豬架喇！
＊中移忽頭痕盛宴暫散場，地產似有景１０９爆上＊
重磅藍戰士祖國移動本來都無捲入今場戰爭入面，一心撓埋雙手等散場，點知下半場有壞消
息爆出，祖國移動湖南公司副總經理郭小明涉嫌受賄而被人拉咗，母公司噚晚決定免去佢嘅職務
。搞到祖國行動以差唔多最低位收市，跌近２巴仙報１０２﹒５銀。
魚缸就話無咩火氣，但香江樓市就愈炒愈旺，房運局公布，舊年私樓落成量近八年新高，達
到１﹒５７萬伙。除咗長實（００００１）、新世界（０００１７）各急升逾２巴仙及１﹒５巴
仙外，街坊恆地（０００１２）、新地（０００１６）都調頭跌番落去。
仲有一隻逆市奇葩，金威資源（００１０９）是也！公司宣布折讓三成，向獨立第三方同成
日喺魚缸投資嘅祖國商人鄭建配股及發換股價，今日復賽就爆升１﹒４７倍收１﹒５８銀，勁！
假期愉快，請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
【你點睇】的士記分制將於周末生效，你認為該制度可否幫助的士提升服務質素？► 立即投票
