《小傳日記》魚缸情人節唞唞，賭仔好ｓｗｅｅｔ高高收！

　　《小傳日記》今日（１４日）係情人節，周圍都滿布閃光彈，就連兩位特首候選人林鄭同薯
片，都喺ｆｂ大晒恩愛！其實有另外一半又好，無又好，都可以同朋友或同事講聲「情人節快樂
」，傳遞甜蜜祝福。小傳就收到同事們派嘅朱古力同士多啤梨，真係好ｓｗｅｅｔ呀！

　　講番魚缸，花旗繼續送上驚喜，噚晚道指又攀升０﹒７巴仙至２０４１２點，再創收市新高
，標普市值更超過２０萬億美金。掌聲鼓勵！不過，香江連升四日要唞唞，恆指今朝低開１５點
，雖然之後內地１月ＣＰＩ及ＰＰＩ都好預期，但恆指都係窄幅上落。結果，埋單軟７點報
２３７０３；國指象徵式唔見３點報１０２５４。
　　魚缸炒股唔炒市，全日成交都有８５５億銀。大摩又奏摩笛，話睇好祖國經濟可避過金融信
貸衝擊，將恆指目標基本預測由二萬三調高至二萬四，最牛目標仲由２８９００升到去
３０５００添！

＊大摩來唱好魚缸無反應，板塊輪流炒賭仔最精靈＊

　　板塊輪流炒，終於輪到賭仔落鑊！喺農曆新年期間，好多報道都話好多馬交酒店都爆晒？孖
屐當然聯想賭仔收入都應該一樣咁旺啦！花旗就出報告，預料今個月賭收可以增加一成，賭仔股
當然最開心；銀娛（０００２７）、金沙（０１９２８）率先衝前７巴仙及５巴仙，係首兩名最
威水藍戰，分別收３７﹒８５銀及３３﹒１０銀！街坊永利澳門（０１１２８）及後日（１６日
）放榜嘅美高梅（０２２８２）都有逾４及逾５巴仙進帳。
　　另一邊廂，電能（００００６）自從宣布派特息每股５銀氹粉絲，股價就開心足咁耐；今日
除淨，個價立時冇哂力，回返近２巴仙收７０﹒６５。

＊提高要約價ＴＶＢ新高，德國佬護航中旅甚風騷＊
　
　　俄鋁（００４８６）傳被股東Ｏｎｅｘｉｍ掟貨，沽售３﹒３巴仙股權，套現近１９億。而
佢今朝開賽前就錄得１２﹒４億銀大手，結果全日瞓低逾３巴仙，報３﹒９５銀。
　　ＴＶＢ（００５１１）將回購嘅股份數目減少到１﹒２億股，但要約價就提高至
３５﹒０７５銀，總代價維持４２﹒０９億不變。今日復出缸湖，即飆高逾９巴仙，收
３３﹒１５銀。
　　中旅（００３０８）獲德銀升評籲買，「他屐」亦上調至２﹒７銀，孖屐仲憧憬埋業務重組
，應聲彈高近５巴仙，埋單２﹒３９銀。

＊汽車齊踩油勿跟車太貼？吉利續飆升北汽失尾陣＊

　　砵砵車好消息連連，北汽（０１９５８）估計舊年會多賺九成，更加有德銀睇好評為首選，
一度飛起逾７巴仙，見９﹒５銀創逾年半高，但最終反而跣低近１巴仙，報８﹒８２銀。跟車太
貼，真係好險呀！
　　吉利（００１７５）染藍之後，獲美銀美林調高評級至「買入」，亦駛前近２巴仙，報
１０﹒９８銀。
　　麥格理就預期，神州商用車銷售升勢將會持續，又推介買長汽（０２３３３）。長汽都跟住
衝前１巴仙，收報８﹒９６銀。

＊限制見曙光中興心花放，麥記來祝福舜宇認真壯＊

　　中興（００７６３）出口去花旗國嘅限制令終於有新進展！公司食午飯時出通告，話已經同
當地部門傾緊和解，但就預料會受處罰。雖然通告無寫明罰咩，不過只係見到「和解」兩個字，
缸友已衝入去買貨，中興收市跳起逾５巴仙報１２﹒８４銀。
　　蘋果股價創紀錄收市新高，舜宇（０２３８２）噚日獲麥格理上望８０銀破頂之後，就如入
無人境地，今日再大成交抽高近４巴仙報５０﹒９銀，最高更升到去５１﹒８５銀上市新高。街
坊高偉電子（０１４１５）叨光爆升逾１７巴仙報２﹒７０銀。請請！　　

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。