《小傳日記》煲呔判廿月，波叔唔夠甜；魚缸輪流炒，磚頭佬領先！

　　《小傳日記》花旗國噚晚（２１日）復市即有好消息，大型零售商沃爾瑪及家得寶業績夠省
鏡，支持道指踢高１１８點至２０７４３，已經連續第八日創新高。好強呀！
　　香江呢邊，雖然大象（００００５）業績令人失望，但係今日一班內房佬、祖國錢莊、同埋
香江磚頭佬都發力頂住，恆指由高開９５點後，之後愈升愈有力，仲以全日最高位收市添，埋單
有２３８點進帳，報２４２０１，距離舊年９月２４３６４點高位又近一大步，好友要加把勁呀
！國指表現都唔錯，收市抽高１２９點報１０５３７。魚缸氣氛又轉好，全日成交就高達９２５
億左右。
　　今日新聞真係單單大嘢。波叔今日（２２日）公布呢屆政府最後一份預算案。波叔派粒糖，
但就唔多夠甜，寬限入息稅上限兩萬，免四季差餉，仲有……。另邊廂，前特首「煲呔曾」行為
失當罪成，今朝被高院判監２０個月，不獲緩刑；而收受利益罪就會喺９月重審。佢太太好難過
，仲表明會上訴。
　
＊花旗迭新高香江唔執輸，煲呔預算案新聞單單大＊
　
　　大象同小象（０００１１）噚日放完榜後，由於表現比預期差，缸友嚇到腳軟，好彩今日兩
隻象都喘定返。大摩同摩通都認為大象今年會繼續回購，而今日中午，大象就公布咗第二次回購
，會由瑞信代為執行，股價隨即喘穩，收市只跌０﹒２巴仙收６５﹒４５銀；小象方面，高盛就
升目標價至１５３銀，維持「中性」評級，雖然野村唱淡，但埋單小象微微升起收報１６３﹒９
銀。
　　從大小二象身上都已經見到，藍戰士嘅業績都唔保證一定好，昆能（００１３５）亦係一個
好例子。公司發盈警，話預計年度溢利會下跌，今朝低開５巴仙，不過尾市反而畀好友托返住，
最終有逾１巴仙落袋，報６﹒８７銀。
　　之前發盈喜嘅玖紙（０２６８９）聽日放榜，亦都飛起逾６巴仙，報１０﹒０４銀。
　
＊大象續回購午後見喘穩，玖紙炒業績昆能有點震＊
　
　　一班磚頭佬表現出眾，最新預算案無提及加辣或減辣，磚頭佬就放下心頭大石，缸友都專心
睇番成績表。新世界（０００１７）中期業績算靚仔，多賺３１巴仙至４３﹒３６億，派息１３
仙，結果衝前逾３巴仙，報９﹒７８銀。信置（０００８３）亦喺今日放榜，率先跳高近３巴仙
，報１２﹒９８銀。街坊九倉（００００４）仲叻，斬穫４巴仙，收６２﹒７銀，係第二威藍戰
，仲創過逾３年高６２﹒７５銀！
　　海航實業（００５２１）阿媽近年都喺香江豪手投地，做囝囝嘅飛起逾２８巴仙，埋單
０﹒４５５銀。
　
＊中港磚頭佬齊齊來造好，媽咪豪投地海航高高高＊
　
　　隨左本地磚頭外，內地磚頭亦有資金炒作。１５個一線和熱點二線城市中，１１個城市新建
商品住宅價格按月微跌，另外北京今年商品住宅計劃供地２６０公頃，按年少咗７成，但無礙兩
位藍戰士中海外（００６８８）同埋潤地（０１１０９）跑出，分別踢高近４巴仙同半成，各報
２４﹒４５銀同２２銀，係第三叻同最叻藍戰士。
　　給你一個五星級的家嘅碧桂園（０２００７）亦衝前近半成，收報５﹒６２銀；無咁大隻嘅
綠地香港（００３３７）喺內地磚頭中最搶鏡，飛起近１４巴仙，埋單２﹒１６銀。
　
＊松齡與百本缸邊認真醒，駿傑甫上市午後即叫停＊
　
　　講返波叔公布新一份財政預算案，話會繼續投放資源改善醫療和安老服務。松齡護老集團
（０１９８９）應聲飆高逾１４巴仙，報１﹒２９銀。百本醫護（０８２１６）更加會喺下個月
開始轉主板（０２２９３）上市，亦飛起２８巴仙，報２﹒１銀。
　　新丁駿傑（０８１８８）首掛，一度爆上３﹒５１元，午收報３﹒４７銀，比配售價
０﹒５４銀足足高出５﹒４倍。但中午證監會突然勒令停牌，而舊年７月上市嘅利駿
（０８３６０）。原來用埋同一間上市包銷商太平基業證券，股價午後受累震散逾４３巴仙收
０﹒３銀。
　　擎天軟件（０１２９７）就急插近１５巴仙，得返２﹒２８銀。原來德勤先前建議就鍾馗報
告嘅指控進行獨立調查，但擎天卻認為冇咩必要，雙方最終傾唔掂數，德勤就決定辭任核數師。
搞到咁亂，難怪缸友都掟貨走人喇。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。