《小傳日記》阿爺放水沖沖喜，香江止跌回回氣！

　　《小傳日記》正當香江魚缸噚日（１７日）繼續受淡友轟炸，連跌四日之際，阿爺噚日傍晚
終於出嚟救市喇！人行宣布降準放水４０００億人仔，改善孖屐資金流動性。總算為呢排處於捱
打狀態嘅香江魚缸沖一沖喜，再承住花旗市炒季績高收２１３點嘅好消息，今朝（１８日）香江
魚缸成功高開４０７點報３０４６９，讚！
　　可惜，呢個好消息都唔頂得好耐，除咗走資愈嚟愈勁外，中美貿易戰又有新進展，花旗初步
決定向祖國鋁板徵最高１１３巴仙反補貼稅，同時又要禁止動用聯邦補貼向華為、中興
（００７６３）等買網絡設備，搞到中港魚缸一度調頭倒跌，香江魚缸仲曾經失守三萬關添。
　　好彩，魚缸好快就消化咗呢Ｄ聽到厭嘅壞消息，喺ＱＱ（００７００）升近１巴仙以４００
銀收市，以及ＡＩＡ（０１２９９）漲逾２巴仙收６９﹒０５銀支持下，香江魚缸都保住升幅，
大市收升２２１點報３０２８４；國指亦反擊８５點報１１９８６。全日魚缸成交近１１７６億
。

＊中興累街坊中金籲勿慌，晶片佬得益華虹最招積＊　

　　中美貿易戰唔單止無緩和跡象，仲愈嚟愈激烈，中興中箭畀美國禁制，繼續牽連埋其他街坊
，手機設備孖寶舜宇（０２３８２）、瑞聲（０２０１８）仲未跌完，前者今日曾經急跌近６巴
仙至１３８﹒７銀，後者亦一度插逾４巴仙報１２８﹒３銀，唔少缸友都嚇到跳車保命。好彩，
中金出嚟派定心丸，叫大家唔使太驚，缸友先定過神來掃番平貨，結果舜宇同瑞聲收市只係各跌
逾１巴仙及２巴仙，收１４５﹒３銀及１３１﹒５銀。
　　中金仲唱好埋晶片佬，話經過今次中興一事後，相信祖國會加快發展半導體行業，中芯
（００９８１）、華虹（０１３４７）都會係得益者，雙雙開心跳起近１０巴仙及近１６巴仙，
收１０﹒４２銀及１７﹒４銀。仲有紫光（００３６５）阿媽喺祖國係晶片大家姐，紫光當然子
憑母貴，順勢抽起近１１巴仙收４﹒１２銀，勁！

＊阿爺一出動股王也感動，人行及時雨錢莊感歡愉＊

　　股王ＱＱ噚日跌穿４００銀關，今朝本來隨魚缸借勢重上４００銀水平，不過股王都被壞消
息纏身，最後收窄返升幅。據內地報道，將靠ＣＤＲ回Ａ嘅股份名單上，無ＱＱ份，加上阿爺又
出手審查手遊，ＱＱ旗下多隻手遊都被查，結果ＱＱ今日一度自高位腳軟３巴仙見今年低
３９３﹒４銀，尾市硬淨返少少，報４００銀有近１巴仙進帳。
　　阿爺降準為大地帶來福音，呢場及時雨下得真合時，令錢莊建行（００９３９）、工行
（０１３９８）分別飛起逾１巴仙，報７﹒９８銀及６﹒６９銀。至於平保（０２３１８）、太
保（０２６０１）亦靠穩分別報８０﹒８５銀同３３﹒８５銀。
　　個市立立亂，本地薑又成為缸友焦點，好似超人早前多次增持長實（０１１１３），孖屐又
關注返長和系，長實及超人一號（００００１）今日都飛起２巴仙，分別收６８﹒０５銀及９２
銀。

＊砵砵車冧檔北汽勁重創，同是淪落人迪仔亦頭暈＊

　　阿爺宣布５年過渡期後，將會取消汽車行業外資持股限制，消息嚇到一班缸友係咁沽走砵砵
車，要錢唔要貨。瑞信走出嚟出報告唱淡汽車股，更將北汽（０１９５８）「他屐」大劈四成至
８﹒３３銀，嚇到北汽插穿２５０天線（８﹒６８３銀），唔見逾１０巴仙，報８﹒０２銀。街
坊廣汽（０２２３８）、華晨（０１１１４）都身受重傷，碌低逾９巴仙至近１１巴仙，報
１２﹒９銀及１２﹒９銀。比亞迪（０１２１１）亦難逃厄運，阿爺直頭話今年就要取消新能源
車、飛機製造業股比限制添，迪仔無奈嘔出４巴仙，報５８﹒９銀。
　　車股搞到咁，經銷商都無好日子過。中升（００８８１）、廣匯寶信（０１２９３）分別質
低逾３巴仙，收２１﹒２銀及３﹒２５銀，保重啦缸友！

＊藥佬頭暈暈獲利盤湧現，石四藥跪低石藥見月低＊

　　之前藥佬升咗好多，最近出現獲利回吐盤。早前話首季純利升逾１倍嘅石四藥
（０２００５）噚日開始回落，今日再唔見逾４巴仙，報７﹒６５銀，大摩早前維持「持平」評
級都無幫助。
　　之前肺癌藥物獲臨床研究批件嘅石藥（０１０９３）見約一個月低，今日好彩靠穩報
２０﹒３銀，但就見四連陰。復星醫藥（０２１９６）亦見四連陰，今瞓低逾２巴仙，報
４３﹒７５銀。
　　個別細魚毛鑊氣都好勁，瀋陽公用（００７４７）獲控股股東通知，擬出售近２９巴仙股權
畀北京華夏鼎科技，憧憬新主人有新景象，瀋陽公用爆升６５巴仙收０﹒４９５銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。