《小傳日記》中美貿戰願意傾，五連跌後要起飛？

　　《小傳日記》花旗國同神州有望重啟貿易談判，令外圍魚缸急速反彈，似乎外圍缸友對呢個
消息好振奮，其實噚晚（１６日）再連埋花旗沃爾瑪（Ｗａｌｍａｒｔ）同思科（Ｃｉｓｃｏ　
Ｓｙｓｔｅｍｓ）季績理想，而且缸友對土耳其危機憂慮降溫，道指、標指、納指三大指數都造
好，香江魚缸今朝（１７日）仲跟隨外圍高開２８８點報２７３８８點，多隻重磅股如ＱＱ
（００７００）、祖國移動（００９４１）、友邦（０１２９９）亦飛起，只係魚缸午後升勢無
以為繼，不過埋單最後都跳起１１３點或０﹒４巴仙，報２７２１３點，五連跌之局終於都完結
。主板成交１００３億銀減少１９巴仙。
　　國貨則飛起３４點或０﹒３巴仙，報１０５１３點。Ａ場唔見３６點或１﹒３巴仙落袋，報
２６６８點。
　　總計一星期，魚缸一共唔見１１５３點或４巴仙，國貨就一共唔見４２９點或近４巴仙。

＊ＱＱ被人彈花旗出嚟撐，萬科爬上梯瑞聲一年低＊

　　ＱＱ真係講足一個月都有嘢講，放完榜之後大行都出動拉低佢他屐價，包括大細摩、富瑞、
大和、野村，人人有份。花旗就最好，幫手話ＱＱ會不久回復正常，所以都比個「買入」評級，
他屐４２０銀。所以ＱＱ今日都有Ｄ力水彈返上逾３巴仙，報３３７銀，成為第二好表現嘅藍戰
士。爬喺ＱＱ前面榮升最勁嘅藍戰士嘅就係旺旺（００１５１），全日進帳４巴仙，報６﹒１銀
。
　　大象（００００５）２０億美元回購計劃已經完成，今日微跌報７０﹒１銀，連跌三日累計
跌幅達２巴仙。
　　下個禮拜放榜嘅魚毛有萬科（０２２０２）同瑞聲（０２０１８）。萬科今日偷步飛起近５
巴仙等星期一（２０日）出成績表，報２４﹒８銀。瑞聲今日就跌到逾一年新低７８﹒１５蚊，
埋單仆低３巴仙，報８０﹒８５銀，係第二弱嘅藍戰士！

＊人人怕豬瘟教育都無運，聯想好當旺東海外失防＊

　　聯想集團（００９９２）早排出咗第一季度業績，好過孖屐預期，所以花旗都出聲表揚佢，
睇好佢嘅盈利預測，仲將佢他屐價上揚逾５巴仙去到６蚊。聯想收工都跳起近７巴仙，收４﹒９
銀。
　　呢排大陸一波未平一波又起，繼疫苗後又爆豬瘟，真係震驚咗１３億人口。涉事嘅雙匯噚日
話自己只係佔萬洲（００２８８）好細部分，萬洲就話鄭洲屠宰埸關閉並唔影響集團營運同埋財
務狀況，等缸友無咁心慌慌，今日萬洲就只係輕微回升，報６﹒１１銀。至於之前大插過嘅祖國
教育股今日繼續唔多掂。楓葉教育（０１３１７）向下游，最終失近１０巴仙，收報３﹒７３銀
。
　　東方海外（００３１６）今日午後復賽，公司宣布已經恢復咗公眾持股量要求，不過就跌到
一仆一碌，仲曾經創一年新低６８銀，插穿好多條主要平均線。埋單跣低近１７巴仙，報
６８﹒８銀。

＊阿爺撐基建鐵路股腳跣，鐵總要減價中車難招架＊

　　阿爺開口話穩投資對國家經濟好重要，要畀更多嘅民營資本參與基建，但一眾基建鐵路股睇
嚟唔受落，加上有內地媒體報道，中鐵總要求中車（０１７６６）啲復興號打折七個巴仙，更係
雪上加霜，搞到中車一度急跌逾６個巴仙，埋單都仲要跪低逾２個巴仙，報６﹒７７銀，係第二
差國指股魚毛；街坊中車時代（０３８９８）今日放榜前都嚇咗一嚇，腳軟跣低４個巴仙報
４４﹒８５銀。
　　「基建三雄」就比較硬淨Ｄ，中鐵建（０１１８６）同中鐵（００３９０）只係唔見咗近
２個巴仙同逾１個巴仙，分別報９﹒１５銀同６﹒６７銀；而中交建（０１８００）更只係跌１
格報８﹒０１銀。

＊洗倉輪住嚟藥股全跪低，食藥都無計石藥好閉翳＊

　　依家啲魚仔一潛就深潛十個八個巴仙，人人望到都心驚驚。仲要成個板塊輪住洗倉，科網佬
、教育佬都係近日重災區。今日就輪到醫藥佬！話說阿爺噚日開會講明要嚴懲祖國假疫苗企業，
一眾醫藥股今日全部重傷，近日游水已經唔多夠力，將會成為藍戰士新貴嘅中生製藥
（０１１７７）最勁曾跌近一成，幸好收市前回勇力守９銀水平，但都要削近４個巴仙。反觀，
藍戰士石藥集團（０１０９３）就愈跌愈傷，收市瀉近５個巴仙報１７﹒６２銀，係最差藍戰士
。下星期一放榜嘅藥明生物（０２２６９）同三生製藥（０１５３０）都相繼插水近９個巴仙同
６個巴仙，報６２﹒５銀同１４銀。有貨缸友都大呻，究竟幾時先游到底呀？！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。