《小傳日記》葡銀忽財困，歐債再埋身？魚缸和和過，繼續瞌眼瞓！

　　《小傳日記》歐債再次殺埋身，你問小傳驚唔驚？話無就肯定係呃你嘅。魚缸經過周三
（９日）大插水後，噚日（１０日）至稍為喘順條氣，大行們又剛出報告睇魚缸上望兩萬五；忽
然噚晚葡萄牙撲個浪埋嚟？坦白講句：「小傳怕怕！」。
　　葡萄牙嗰邊爆出或涉違約問題，雖然歌仔都有得唱「爆炸好麻煩，爆炸好麻煩……」，強如
花旗股巿連番破頂，都喺噚晚腳仔軟。之不過，香江大隻佬嘅反應卻出奇「冷靜」，恆指今日
（１１日）僅以「畀面式」跌得嗰５點，收報２３２３３點；盤中於２３１４６（跌９２點）至
２３３０７點（升６９點）間上落。至於國貨指數，全日收１０３７９點，升１１點。
　　喺世界盃狂熱下，個個都無心戀戰，唔少缸友「波癮」發作，魚缸中唔少巴打絲打都只求安
然渡過，等睇嚟緊兩場好波，今日成交只錄５１４億銀。魚缸似乎當葡萄牙嗰邊唔係大問題，「
冷靜」到「得人驚」，小傳就更加擔心……
　
＊ＢＥＳ違約香江未驚過？上上落落間仍然渾渾噩＊

　　呢期講開葡萄牙，除咗講Ｃ朗輸球，黯然返歸之外，傷透不少少女心外，呢輪佢哋分分鐘可
能再傷缸友心呀！葡萄牙最大嘅上市錢莊ＢＥＳ，因大股東出現債務違約問題，搞到人人自危，
最怕係「蝴蝶效應」，令歐債危機重燃。
　　歐債又嚟料？不少芬佬有得震、無得瞓，就連有世界波睇都無晒癮。話晒噚晚花旗嗰邊，仲
曾試過插低近兩百點，班淡友仲唔印印腳，食住花生等睇戲咩？
　　之不過，香江呢邊就無甚反應，大象（００００５）同友邦（０１２９９）表現氣定神閒，
佢哋今日都定過抬油，只喺水平線上下猜波，永無甩腳。大象微跌０﹒４巴仙，收７８﹒６銀；
小象（０００１１）升０﹒９巴仙，收１２８﹒２銀。至於友邦就升０﹒４巴仙，收３９﹒３銀
；渣打（０２８８８）跌唔夠１巴仙，收１５９﹒６銀。

＊美經濟復甦息魔行得近，地主微微軟心裏不太震＊
　
　　花旗國新申領失業救濟人數跌到去個幾月低位，反映勞工市場一路改善緊，理應賀一賀佢至
係。之不過，花旗經濟愈係復甦，孖屐就愈驚「息魔」會提早打到嚟，有缸友甚至擔心耶倫會喺
出年第一季就會加息，搞到班地主股今日腳仔軟哂！
　　四叔（０００１２）全日唔見咗兩個位，報４５﹒２５銀；郭氏兄弟（０００１６）都輕輕
跌一個價位，收１０６﹒２銀。超人（００００１）叫做跌得最甘，但都只得０﹒６巴仙，以
１４１﹒１銀埋單。

＊發電廠放榜總算有交代，大唐急升後今天回回氣＊

　　周末前夕，幾間發電廠好似夾埋咁齊齊派「期中成績表」，其中中國電力（０２３８０）同
華能新能源（００９５８）嘅發量，喺上半年分別升１６％及２％，兩者都算交到功課，所以股
價今各彈高１﹒８巴仙及０﹒４巴仙，收報３﹒３８銀及２﹒３７銀。
　　縱使成績未算突出，但呢個時勢咁動盪，選股只為「不求有功、但求無過」，否則就好似大
唐發電（００９９１）。雖然佢嘅發電量依然高企，依然力壓群雄，大幅拋離行家，但可惜發電
量及上網電量，均較舊年同期跌逾２％，不升反跌。缸友最忌見到咁嘅結果，可謂少少都不能接
受。大唐今日收低１巴仙，報３﹒９銀。但好彩，大唐發電喺先前打好底，喺周二（８日）時借
計劃重組煤化工板塊儲落唔少升幅，即使要回一回，亦只係健康整固啫。

＊遇上好人家華脈嘭嘭升，合輝有搞作踢高來慶祝＊

　　今日魚缸唔上唔落，大隻佬又點夠啲細細粒刺激？華脈無線（００４９９）控股權轉手畀華
青國際，今日甫復賽已經炒高逾四成，之後仲愈升愈有，完場升１﹒４６倍，報３﹒４５銀，係
全日魚缸升幅最大嘅股份。
　　合富輝煌（００７３３）拍住搜房搞互聯網金融，同樣喺今日復賽，股價都踢高１８巴仙，
收２﹒８９銀。
　　瑞聲（０２０１８）噚日已經碌低半成，今日再畀大戶狂掟，跌咗４﹒９巴仙，收
４７﹒５５銀，成交金額有成１６﹒１５億銀，僅僅輸畀大象同ＱＱ（００７００）一個馬鼻。

＊德國阿根廷周一開大戰，睇波與睇股同樣咁醒神＊

　　世界盃進入大直路，嚟緊決賽將喺下周一（１４日）凌晨三點開波，除祈求「德國ｖｓ阿根
廷」踢場好波外……唔該，真心唔該，要喺法定時間分勝負！若再次左猜右猜，只防不攻，打到
朝早要返工，真係瞌都冇得瞌。
　　縱使阿根廷嘅美斯腳法幾醒，德國嘅湯馬士梅拿嘅射術有幾勁，但無論睇到幾攰，大家放心
，小傳應承大家周一點都會同大家