《小傳日記》希臘大變天，香江難衝前；ＱＱ玩破頂，半新升到癲！

　　《小傳日記》歐洲央行上星期決定開「印銀紙機」，香江魚缸立即搶高。不過開心時光過得
特別快，緊接希臘大選揭盅，激進派左翼聯盟勝出，孖屐又掀起「脫歐」恐慌。
　　家陣歐洲「立立亂」，縱使Ａ仔場踢高近１巴仙創近五年半新高，香江都好難有安落茶飯食
，今朝（２６日）高開５０幾點之後就無晒心機，一度碌低最多８８點。好彩有股王ＱＱ
（００７００）撐住，最終散場有５９點進帳，報２４９０９。但國貨佬就唔見３１點收報
１２２２８，全日成交就減少咗逾兩成，只得８３８億銀。
　　其實魚缸近排都升咗唔少，去到近二萬五大關附近，整固一下都好正常。另一邊廂，花旗聯
儲本周開會，加上大科技公司排隊放榜，缸友最好小心行事喇！

＊歐洲立立亂不如計計數，ＱＱ創新高街坊也風騷＊

　　今日魚缸ｃｈｏｋ上ｃｈｏｃｋ落，搞到缸友都唔係好唔敢博，始終希臘嗰邊仲未搞掂，香
江要衝破二萬五都唔係咁易。好彩，ＱＱ係可以頂天立地支撐大市，為大隻佬貢獻７３點，換句
話說，無ＱＱ嘅話，大市想升都難！可能科網巨頭蘋果就嚟公布業績，缸友又趁勢炒科網熱，合
力將ＱＱ推高逾３巴仙收１３７銀，仲一度高見１３７﹒１銀創歷史新高！再睇公仔圖，原來唔
經唔覺寫下「六連升」，勁！
　　ＱＱ當道，其他軟件股都「升天」，加上市傳網絡安全審查辦法下月提交審議，強調要加強
國家安全意識教育，努力打造一支高素質嘅國家安全專業隊伍咁話；消息一出，中訊軟件
（００２９９）曾爆升逾１４巴仙。其他街坊金山軟件（０３８８８）都好威水，大幅上漲逾６
巴仙。金蝶（００２６８）、擎天軟件（０１２９７）都有６至逾７巴仙進帳。仲帶挈埋手遊股
，ＩＧＧ（０８００２）、博雅（００４３４）都飛高８至９巴仙。

＊大象與渣打齊齊玩回吐，利豐急抽上可惜無買到＊

　　講番希臘嗰邊先，啱啱舉行完個大選，左翼激進聯盟贏咗個大選，佢地開宗名義講明唔要節
制同唔想還錢畀啲債主，搞到希臘又可能要面對破產風險，仲可能要脫離埋歐元區，歐洲嗰邊開
心完一陣又要再驚過，睇嚟都有排頭痕。
　　歐洲嗰邊又再驚希臘違約，一眾歐洲相關股都好難有好日子過，大象（００００５）同渣打
（０２８８８）呢啲國際大財主即刻回返近１巴仙，分別收報７２﹒６銀及１１０銀。不過，希
臘變天好似影響唔到班做零售嘅，思捷（００３３０）繼續升１﹒４個巴仙報８﹒５４銀。
Ｐｒａｄａ（０１９１３）都升近１巴仙報４２﹒３銀。仲有利豐（００４９４）獲得巴克萊維
持「增持」，雖然降低咗目標至８﹒７銀，但埋單都袋咗近５巴仙收７﹒７７銀。不過小傳溫馨
提示，歐洲始終仲係好亂，買呢啲歐洲相關股都係要小心啲！
　
＊恆生六號仔揸住無閉翳，新地與招商靚到無得揮＊

　　既然出面世界都未搞掂，缸友都轉去買番夠晒穩定嘅藍戰士，有部分仲喺咁靜局嘅環境下創
新高添。好似恆生（０００１１）同電能（００００６）都破晒頂，最高見１３３﹒６銀同
８０﹒５５銀。香江地主代表就有新地（０００１６），獲瑞信升目標價去到１５２銀，一度創
咗四年新高，埋單有近２巴仙升幅報１２６﹒１銀。招商局（００１４４）獲摩通升目標３６巴
仙，亦踢高２﹒１個巴仙，報２８﹒７５銀。仲有，隻恆隆地產（００１０１）今日放榜好過期
，高收１％
　　馬交嗰邊嘅賭仔們，後勁依然凌厲，看看銀娛（０００２７），收市踢高３﹒５巴仙報
４０﹒９銀，金沙（０１９２８）就因為早前公布派中期息，續漲逾２巴仙收３９銀。街坊澳博
（００８８０）、美高梅（０２２８２）都分別踢高２﹒５巴仙同２﹒２巴仙，一齊反擊！
　　
＊成績勝預期１０１踏前，賭仔齊踢上申銀大回氣＊

　　除咗部分半新股，高鵬礦業（０２２１２）、日成（０３７０８）同泰加保險
（０６１６１）等繼續當旺之外，偉俊礦業（００６６０）更爆升約１倍後停賽添。另外，科地
農業（０８１５３）亦好巴閉，抽高近３６巴仙收０﹒０８銀，緊接係中國公共採購
（０１０９４），公司上星期五宣布逾１億人仔向主要股東買招標業務之後，今日突衝前近３４
巴仙收０﹒１７５銀，升越十天及廿天平均線，勁！
　　大隻Ｄ嘅股份，好似合生元（０１１１２）就獲美銀升目標價同評級，埋單逾２﹒６億銀炒
高逾１５巴仙收２１﹒５銀，係最好表現「港股通」股份，其次係漢能（００５６６），逾５億
銀急升逾１３巴仙收３﹒３８銀。
　　不過，申銀（００２１８）早排升得太勁，今日急瀉１８巴仙收７﹒１９銀，就算申萬宏源
（深：０００１６６）掛牌大升都幫唔到忙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。