《小傳日記》蘇獨不成功，大象顯威風；巴巴今登場，ＱＱ好輕鬆！

　　《小傳日記》今日（１９日）除咗照舊要睇實魚缸之外，梗係要打醒十二分精神睇實「蘇格
蘭公投」結果同「唉瘋６」炒價啦，仲有就梗係阿里巴巴喺紐約華麗登場啦！
　　先講香江，今朝跟住美股破頂嘅強勢而高開１６５點，不過大部分中字輩股份都發軟蹄向下
碌，搞到大市曾經倒跌１３點。蘇格蘭獨立最終宣布失敗，大象（００００５）即刻大發神勇，
仲拍住股王ＱＱ（００７００）推高大市，恆指最終收市踢高１３７點收２４３０６。
　　祖國傳出人行五千億人仔ＳＬＦ首批已經實施，而噚日（１８日）又突然下調正回購中標利
率。維穩訊號響起，Ａ仔場今日都以三連升收市，報２３２９點。點知國貨佬指數就反高潮，逆
市碌低１６點收１０７８３，認真無癮。
　　全日成交就旺到不得了，有成９４７億銀左右！不過，個場旺咗咁多，只係因為富時中國
２５指數收市之後會換馬，缸友要調整投資組合先令到成交爆升啫。

＊今天多大事件件重頭戲，成交真旺場小傳最高興＊

　　今次蘇格蘭獨立公投，撇開政治因素唔講，今次公投一有差池，除咗可能會改寫米字國歷史
之外，其實仲會對全球經濟帶來衝擊！小傳今朝睇住「統派」同「蘇獨」嘅得票率，一時「蘇獨
」反超前贏個馬鼻，一時「統派」又拉開雙方距離，真係少啲心血都唔掂！
　　等咗成個上午，食午飯時終於有結果，蘇獨最終失敗；消息一出，總部喺米字國嘅大象同渣
打（０２８８８）都開香檳慶祝，大象仲一度高見８４﹒４銀，係舊年８月以嚟新高，埋單都仲
有１﹒７巴仙進帳收８４﹒２銀。渣打雖然無升咁多，但都有近１巴仙落袋，收１５６﹒４銀。
　　不過有分析話，本身大象同渣打盤生意都無以前咁好，建議缸友唔好見到一時嘅反彈，就開
心到大舉衝入去掃貨。

＊蘇格蘭留英大象見新高，巴巴熱到爆科網高高高＊

　　科網界今晚都揭開歷史新一頁，超級巨無霸阿里巴巴將會喺香江時間晚上９點半，喺花旗國
揮一揮捧，敲響上市鐘，正式在當地魚缸強勢登場。阿里已經決定咗以招股價上限６８美金定價
，集資額高達差唔多１７００億，成為全球最大ＩＰＯ！究竟主席馬雲會唔會親自敲鐘？首日掛
牌係咪一如預測有超過兩成升幅？大家要拭目以待。但阿里有份投資嘅中信２１（００２４１）
就已經率先飛升近４巴仙收６﹒１７銀慶祝啦！
　　另一邊廂，股王ＱＱ今日就一啲都無被阿里嘅搶風頭，今日以近５０億銀大成交抽高近２巴
仙，收１２５﹒２銀，上番十天線（約１２３﹒８銀），仲帶挈埋愛將金山軟件（０３８８８）
彈高逾２巴仙，其他軟件股及創新支付股，仲有手遊股都一齊向上衝，真係好耐冇見過咁嘅場面
。
　
＊濠賭續反彈認真夠巴閉，永利與金沙彈得最靚仔＊

　　今日濠賭股都非常勇猛，今次反彈並唔係一日貨仔，繼續食住噚日強勢，開市無耐就突圍而
出，永利澳門（０１１２８）喺成班入面最威水嘅一個，大幅踢高６巴仙收２６﹒４５銀，成功
收復番十天線，ＲＳＩ同ＳＴＣ都已經走出超賣區，形勢明顯轉好。勁！
　　龍頭金沙（０１９２８）都有３﹒６巴仙進帳，收４４﹒６５銀，但由於之前實在跌得太多
，依家都仲未上番十天線，係咪真正反彈仍有待觀察。而銀娛（０００２７）今日都升番去
５１﹒３５銀，完場就有３巴仙進帳。其他街坊美高梅（０２２８２）、澳博（００８８０）、
新濠國際（００２００）都唔執輸，齊齊彈高２至４巴仙，皆大歡喜。　　

＊瘋搶唉瘋６有貨最招積，富時音樂椅中電信失色＊

　　開頭嗰陣講開全城瘋搶嘅「唉瘋６」，今日就係新機王開賣嘅大日子，一班炒家搶住以「海
鮮價」去收貨，個炒價閒閒地都可以相差幾千蚊，認真誇張。雖然祖國仲未有份賣，不過祖國移
動（００９４１）都一樣向上踢高近２巴仙，收９６﹒４銀，但係街坊聯通（００７６２）就
「陰功豬」，要逆市碌低近２巴仙，以「五連跌」嘅弱勢跌近百天線（約１２﹒５４銀）。　　
　　另一位街坊中電信（００７２８）本來都穩穩陣陣，曾經有近２巴仙落袋，不過今日富時中
國２５指數收市之後大執位，將會增加至５０隻股份；由於中電信呢位舊成員就被減磅最多，搞
到完場只得０﹒４巴仙進帳收４﹒８１銀。至於聯想（００９９２）就係新晉份子中增磅最多嘅
，不過都只係彈高近１巴仙，又唔見太過興奮喎！假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。