《小傳日記》中港地主拍住上，超人績靚確係強！

　　《小傳日記》開心嘅７月份終於結束，全城準備踏入８月份放榜期。期指結算又完咗，美聯
儲局議息又公布埋，一如預期，繼續維持超低息，兼減少買債１００億美金。無咩消息之下，香
江魚缸今朝（３１日）都無咩力水，只係踢高少少就碌番低７０點落嚟；但估唔到Ａ仔場收市之
前，竟然衝番上去，仲以接近全日最高位２２０１點收市，即刻帶挈香江呢邊反彈。雖然恆指唔
係升番好多，只得２４點，收２４７５６，但總算又創下「八連升」紀錄。
　　計一計數，港股７月份就已經急升咗約１５６５點或近７巴仙，單係過去八日，就已經佔咗
約八成升幅，認真誇張！
　　國貨佬指數完場都有１０點進帳，收１１１３０，總算無倒跌收場。全日主板成交雖然無千
億，但都有８４０億銀，一樣咁熱鬧。

＊美聯儲議息無驚又無喜，Ａ仔好靚仔香江八連起＊

　　雖然個市開始呆呆地，但祖國地主就精力充沛！皆因鐘聲響起，又喺鬆綁時間啦！今次輪到
嘅城市就係寧波。據寧波市住建委官方微博話，正式取消樓市限購措施，大家又可以齊齊買樓做
大富翁。從聽日（３１日）起，買寧波市各縣（市）、鄞州、北侖、鎮海、高新區嘅住房，包括
商品住房同二手住房，都唔再需要提供家庭住房證明；而買海曙、江東、江北中心城區套型９０
平方米或以上，同埋二手房嘅，亦唔再需要提供家庭住房證明。
　　有咁好嘅消息，一眾祖國地主一齊出閘！祖國海外（００６６８）同潤地（０１１０９）分
別踢高近５同近４個巴仙，成為大隻佬指數中飊高得最勁嘅兩位。其他祖國地主股表現都好出色
，融創（０１９１８）畀巴克萊唱好，開心到急升７巴仙報６﹒３９銀；瑞房（００２７２）、
中渝置地（０１２２４）同富力（０２７７７）都踢高３至６巴仙；大阿哥萬科（０２２０２）
都升發力抽高４巴仙，報１７﹒１６銀。

＊阿爺再鬆鬆內房更輕鬆，地主不執輸高位再發功＊

　　祖國地主有阿爺關照，當然開晒Ｐａｒｔｙ，不過香江地主都唔執輸，呢幾日不停發力追落
。花旗國一如預期仲未加息，有分析仲預計，應該要到出年中先開始慢慢咁加上去，唔怪之得成
班地主繼續向前衝啦；新地（０００１６）、恆地（０００１２）就再彈高１至２％，分別收
１１７﹒９銀及４９﹒４５銀。新世界（０００１７）又跟升逾１巴仙。
　　至於長實（００００１）就喺歷史高位水平唞唞，收１５０﹒７銀；而囝囝和黃
（０００１３）就碌低近１巴仙，因為缸友們都等緊收市後睇成績！結果超人無令大家失望，長
實中期核心溢利增加２２巴仙至６６億銀，和黃就多賺１３巴仙至逾１３５億銀，兩個都勝市場
預期。
　　講完中港地主，要提一提班ＥＴＦ。見到Ａ仔場尾市衝番上嚟，缸友都即刻衝入去掃高
Ａ５０中國（０２８２３），結果收市升逾３巴仙收９﹒６４銀，南方Ａ５０（０２８２２）都
有逾２巴仙進帳。就連國壽（０２６２８）都彈高咗近２巴仙，做咗第三威水大隻佬。
　　　　　　
＊互聯又互通券商一齊衝，生發發回勇最怕變醉翁＊

　　今日又傳出，話上交所將會喺下月１１日啟動港股通測試，券商股繼續有得炒吓，而且愈細
隻升幅愈勁，東方匯財（０８００１）就踢高逾８巴仙收１﹒３銀；中國富強金融
（００２９０）都升逾７巴仙，收０﹒１９４銀。至於大券商，就由申銀萬國（００２１８）同
第一上海（００２２７）做代表，分別踢高近７巴仙同逾５巴仙，成績都唔錯架！
　　滬港通最直接受益人生發發（００３８８），今日都有逾１巴仙進帳，收１７３﹒５銀。生
發發近期股價高處未算高，真係令唔少缸友又愛又恨；皆因高追又怕接火棒，但止賺又驚唔捨得
。瑞銀就出報告，畀啲貼士大家，將生發發列入最不喜愛股份名單，話滬港通因素被誇大喎！另
外，摩通都都下調生發發嘅投資評級，不過目標價就升到１８５銀，仲呼籲缸友先行獲利。講到
咁，缸友真係要諗清楚「沽貨」定「追貨」啦！

＊宏信與Ｄｙｎａｍ成交認真激，中微有大計粉絲先搶高＊

　　睇番今日成交仲有八百幾億，缸友們都繼續玩得好開心！而小傳就發覺，近日好多股份都出
現好多大額成交，今日遠東宏信（０３３６０）就喺開市前錄得多手大額成交，涉及資金成
３﹒６億銀，遠遠多過平時成交金額。不過，成交多唔代表升架嘛，全日就要碌低近７巴仙收
５﹒９７銀。
　　另外一隻錄得大手成交嘅股份，就係「東瀛彈珠機」Ｄｙｎａｍ（０６８８９），開市前已
經有成４億銀成交，開市之後就即刻衝咗上去，全日埋單有近６巴仙進帳，報２０﹒９元，仲升
破埋十天線。
　　最後，要數今日升得最勁嘅股份，就由「股仔」中微電子（００１３９）奪得！公司話計劃
收購香港上市公司控股權，今日就好似坐火箭咁上咗太空，全日爆升逾６５巴仙，收報
０﹒４０５銀，認真犀利。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。