《小傳日記》Ａ仔香江齊失守，巴巴ＱＱ各自走！

　　《小傳日記》今日（２２日）中港兩地魚缸都無運行，Ａ仔場今個星期要迎接新丁排隊登場
，隨時凍結成６千億人仔，搞到要率先插落嚟，又再一次同二千三講ＢＹＥ　ＢＹＥ，完場唔見
近２巴仙收２２８９點。
　　淡友見到Ａ仔場咁弱，梗係順勢出兵再打埋香江呢邊啦！今朝一開場就已經唔見二百幾點，
之後愈跌愈深，二萬四終於捱唔住，最多跌到去２３９４９點，總共有４０隻大隻佬牛證打靶。
散場時大隻佬翻身無望，仍要插低３５０點或１﹒４巴仙，差唔多以全日低位收市，報
２３９５５；仲拖累埋國貨佬指數蒸發咗１８６點或１﹒７巴仙，收１０５９７。
　　全日成交有成７２３﹒５億銀左右，大成交兼跌穿重要關口，缸友真係要小心，下一站隨時
低見百天線（約２３７２８）。

＊新股排隊上Ａ仔好惆悵，唇齒本相依Ａ５０更傷＊

　　大隻佬今日潺到咁，最主要係股王ＱＱ（００７００）無晒心機，由頭跌到落尾，完場急跌
逾３巴仙收１２１﹒１銀，推低咗個市成７０點！
　　ＱＱ「死對頭」阿里巴巴上星期五晚（１９日）喺花旗國隆重登場，第一日掛牌就爆升３８
巴仙，仲差ＤＤ就升到去１００銀美金，已經威到盡架啦！但原來「沒有最威，只有更威」，巴
巴憑著２３１４億美金市值，已經成功爬過ＱＱ、ＦＢ頭，唔單止做咗全球第二大科網巨企，仲
帶挈埋主席馬雲副身家，直逼我哋香江首富超人嘅地位，最緊要係，馬生話：「一Ｄ感覺都無喎
。」馬雲型到咁樣，你話ＱＱ點會唔酸溜溜呢…
　　不過最反高潮嘅係，揸住阿里ＤＤ股權嘅中動向（０３８１８）竟然急瀉１３巴仙收
１﹒５１銀，一支超長嘅陰燭跌穿晒所有平均線，認真陰功豬。仲有中信２１（００２４１）都
係不升反跌，完場唔見逾４巴仙收５﹒９１銀。

＊４０牛犧牲重貨有排震，巴巴美風騷ＱＱ傷透心＊

　　另邊廂，祖國錢莊有好料。建行（００９３９）已經證實阿爺揼水嘅消息，不過魚缸太弱，
錢莊們都要跌一跌約１至２巴仙左右；至於一路都鬧「水荒」嘅祖國地主就只能靠自己，雅居樂
（０３３８３）就頂唔順要「五供一」籌近２８億銀，喺呢個時候問股東拎錢，就梗係搞到不歡
而散啦！收市就急跌逾７巴仙收５﹒３９銀。其他二、三線街坊都要捱沽，富力（０２７７７）
、世房（００８１３）同碧桂園（０２００７）都唔見２至逾４巴仙。
　　大阿哥潤地（０１１０９）就因為姊妹公司潤電（００８３６）總裁王玉軍被刑事拘留，而
跣低逾３巴仙收１６﹒７６銀，做咗第三差大隻佬。反而潤電就收復番失地，只係跌１巴仙，今
次真係累街坊。

＊雅居樂伸手唯有沽之哉，中石油石化淡友在屠宰＊

　　Ａ仔場受重傷，Ａ５０中國（０２８２３）同南方Ａ５０（０２８２２）都齊齊跌低近３巴
仙，成交高達逾２６億銀同近２３億銀，係全日第二、三名成交多股份。睇番兩隻股嘅公仔圖，
得番百天線係未跌穿，真係弱過弱煲，船上嘅缸友要坐穩啦。
　　石油石化股都成為今日重災區，雖然中石油（００８５７）話考慮將酒股公司分拆上市，摩
通又繼續叫「加碼」，上望目標１２﹒５銀；不過今次「吹雞」無效，中石油完場就唔見咗逾２
巴仙收１０﹒２６銀。中石化（００３８６）之前賣資產套現咗成千億銀人仔之後，依家又話想
將邊緣業務獨立分拆上市。暫時十劃都未有一撇，但粉絲都掟貨走人，收市唔見逾２巴仙報
６﹒８９銀，單係呢個月，暫時就唔見咗約１１巴仙。

＊銀河甚頭痕街坊無辜辜，炒股不炒市缸邊來猜估＊

　　頭先講開潤電總裁被拘留，另一邊廂，銀河證券（０６８８１）固定收益業務線業務總監代
旭同兩名相關員工，都要接受司法關調查，埋單唔見逾５巴仙收５﹒５４銀。之不過，同行就無
辜辜嘞，海通證券（０６８３７）散場唔見近４巴仙收１２﹒０６銀，中信証券（０６０３０）
、國泰君安（０１７８８）跌幅就介乎２至３巴仙。
　　再望吓細價股世界，完全係天堂與地獄之分，勁多隻股仔創晒逾５２周新高，單睇頭兩隻萬
威國際（００１６７）同中國公共採購（０１０９４）嘅成交，都有差唔多７６００萬銀，分別
炒高近４４巴仙及逾２８巴仙，認真ＨＡＰＰＹ！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。