《小傳日記》阿爺開金口，Ａ場未升夠；中移賀紅底，ＱＱ高高收！

　　《小傳日記》阿爺噚日（２０日）派完定心丸都仲未夠，即使今日（２１日）忙住喺瑞士出
席達沃斯年會，都開金口撐祖國經濟，話貨幣政策不鬆也不緊，將會繼續積極推行咁話。結果Ａ
場就如有神助，爆升近５巴仙收３３２３點，創超過五年最大單日升幅，勁！
　　香江呢邊嘅ＥＴＦ股都衝番晒上去，Ａ５０（０２８２３）又踢高近５巴仙；祖國錢莊繼續
高高高，中行（０３９８８）（滬：６０１９８８）做大佬領軍衝高近３巴仙，Ａ股仲漲停埋，
氣勢如虹。股王ＱＱ（００７００）更輕鬆踢高近４巴仙，加埋祖國移動（００９４１）終於做
番「紅底股」，個市想唔大升都幾難！
　　結果，香江大隻佬就袋咗４０１點收２４３５２，創四個月高位，國貨佬漲２７９點收
１２０２１，全日成交又升番去１０４３億銀左右。不過溫馨提示，歐洲嗰邊仲係立立亂，呢幾
日歐央行又議息、希臘又大選，小心隨時嚟個反高潮呀！
　　
＊周一敢低撈今天荷包發，外圍立立亂小心為上策＊

　　祖國移動今日真係夠晒威風，以全日最高位收市，抽高逾４巴仙收１０２﹒２銀，成功推高
大市７１點，再加埋ＱＱ貢獻嘅７９點，兩隻重磅藍戰士已經佔咗大市逾３７巴仙升幅！其實祖
國移動噚日已公布上個月４Ｇ上客再創單月新高，但股價無咩反應。反而今日趁市旺就嚟個大反
彈，無上車嘅缸友真係得個「恨」字喇…街坊中電信（００７２８）阿媽計劃競標墨西哥逾百億
銀美金無線寬帶網絡項目，帶挈囝囝衝高逾５巴仙。正！
　　不過，長實（００００１）、和黃（０００１３）同長建（０１０３８）一家就感受唔到今
日嘅喜悅喇，齊齊逆市碌低ＤＤ。皆因長建宣布拍住長實買米字國鐵路公司，仲要配股集資，難
怪搞到缸友們唔係太高興囉。

＊ＱＱ加中移愈大愈美麗，英國買鐵路長建一家軟＊

　　上證今日爆升，大行隨即唱好內險，大摩話祖國魚缸喪跌唔會對內險基本面造成太大影響，
反而個價調整咗仲提供一個入市機會添；長線嚟講，個估值仲係好平，所以仍然睇好內險。結果
中國太平（００９６６）今日繼續大漲８﹒３巴仙，已經升番去Ａ仔場大瀉前水位。街坊中國太
保（０２６０１）（滬：６０１６０１）今日亦都升５﹒９巴仙，報３８﹒９銀，Ａ股仲漲停板
。
　　另一方面，周一（１９日）起停牌嘅新華保險（０１３３６），有報道話大股東中央匯金會
轉讓部分股份畀阿里巴巴，畀咁有實力嘅股東睇中兼入股，相信復牌之後有排升呀！
　　另外，《上海證券報》報道保監會公布一份白皮書，入面話到２０２０年淨係養老領域，投
資規模預計可以去到４５００億人仔，每年為祖國貢獻３３０億人仔稅收，保險密度（保費收入
╱總人口）將達到每人３５００人仔。咁理想的話，睇嚟缸友可以買定內險股等退休喎。

＊保險是瑰寶可惜個倉無，巴巴傳入股新華勢高高＊

　　砵砵車都跟住Ａ仔場開ｔｕｒｂｏ，開得最快嘅有吉利（００１７５），全因瑞信將評級上
調至「優於大市」，目標價仲升到去４﹒１銀，刺激股價踢高５﹒９巴仙，收報３﹒０６銀，突
破５０天線，睇嚟要破埋百天線真喺易過碌蔗。有大行照住嘅仲有長汽（０２３３３），匯證話
睇好公司上半年盈利，因為ＳＵＶ銷售會勝預期，同樣升咗目標價，股價今日進帳近４巴仙，收
報４１﹒７銀。
　　其他街坊收穫都唔錯，華晨（０１１１４）、比亞迪（０１２１１）都有逾４至５個巴仙升
幅，分別收報１４﹒２４銀同２９﹒３銀，雖然比亞迪被大摩唱淡，降目標至２０銀，但都無阻
今日強勢！不過最失威嘅一定喺北汽（０１９５８），全日升唔夠１巴仙，造８﹒９５銀。　

＊車仔齊踩油唱淡又如何，油價再碌低鐵鳥笑呵呵＊

　　之前講過馬交賭業獨大唔係好事嘅李剛，噚日又發表新言論，今次話賭博收入下跌同反貪腐
無直接關係，仲反問賭博收入一年三千幾億銀，貪官拎到幾多出嚟賭？！相信年中博彩收入會升
番咁話喎。言論一出，銀娛（０００２７）同金沙（０１９２８）即刻見反彈，分別反彈２巴仙
同３﹒３巴仙。
　　一眾賭仔有Ｄ起色，不過油價跌極唔停繼續向深淵推進，受惠嘅鐵鳥股當然會振翅高飛。瑞
銀調升中港航空股目標價約一成，當中藍戰士國泰（００２９３）嘅目標價去到廿雞，全日股價
就升１個巴仙多啲，收報１７﹒２銀。反而其他祖國鐵鳥就有力好多，國航（００７５３）飛高
７個巴仙有多，收報７﹒１５銀。同業南航（０１０５５）同東航（００６７０）都有約３﹒７
巴仙進帳。請請！　　
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。