《小傳日記》阿爺千方百計救Ａ場，希臘說不香江成震央！

　　《小傳日記》阿爺為咗令Ａ股唔好再插水，已經施展渾身解數；券商亦眾志成城，喺Ａ場未
升返去４５００點之前唔沽貨。咁不得了嘅橋都諗到，小傳真係佩服到五體投地！阿爺救市心切
嘅決心，終於稍為打動咗基金佬、散戶嘅心，今日（６日）都畀面入貨支持吓，Ａ場終於唔使再
過著動輒蒸發５、６巴仙嘅日子，成功收升番逾２巴仙報３７７５點，總算換到喘息嘅空間吧！
　　豈料，呢場「股災風暴」轉移咗嚟香江！希臘公投正式否決援助方案，搞到就算阿爺「暴力
」救市，香江都只係彈高１９點，之後見到Ａ場反彈無力，更加重咗缸友掟貨嘅決心，上半場香
江已經狠狠插低八百幾點；點知低處未算低，食完午飯返嚟無耐，竟然暴瀉最多１３１３點至
２４７５０，連牛熊線（約２４８６８）都穿埋，全日共有１０６隻恆指牛仔打靶，睇到缸友眼
都凸埋…

＊暴瀉千三點睇到心慌慌，成逾二千億百牛仔陣亡＊

　　好彩見到Ａ場有番Ｄ起色，香江先有番ＤＤ買盤支持，不過都插低８２７點或３﹒２巴仙，
收２５２３６，國貨佬就重挫３７７點或３巴仙收１２２３１，全日主板成交突破二千億，約有
２１２７億銀，創逾兩個月新高。
　　喺大牛市嘅日子，成交愈高，生發發（００３８８）就當然最開心喇！只可惜，「出得嚟行
，預咗要還」，生發發今日畀空軍炸到遍體鱗傷，原來高盛喺背後做軍師！出報告削目標價２６
巴仙至２２０銀，仲降級至「沽售」，當堂震散咗生發發，由今日最高計位，直插１５巴仙，去
到得番２２３銀，一日內就差唔多跌到去高盛個價。雖然尾市收復番ＤＤ失地，但都無咗一成收
２３５銀。唔使問，都知做硬最差表現藍戰士喇。

＊高佬叫沽貨生發發被劏，ＱＱ亦插水街坊陪者哭＊

　　喺股災風暴入面，「股王」都難有「股王」強勢，ＱＱ（００７００）都曾經恐慌式跳水一
成，力守１４０銀。工信部即使話今年年底網絡建設投資會超４０００億人仔都無用，收市仍挫
６巴仙報１４６﹒５銀。街坊軟件股都死晒機，金山軟件（０３８８８）、中訊軟件
（００２９９）齊齊趴低１４巴仙同２０巴仙，各報２０﹒３銀同２﹒８８銀。
　　之前發電發到「嘭嘭聲」嘅核電今日都發生核爆，好似上電（０２７２７）
（滬：６０１７２７）就唔見一成，Ａ股果邊就調返轉，隨Ａ場踢高近３巴仙。同行中核工業
（００６１１）、東北電氣（０００４２）、哈爾濱電氣（０１１３３）跌幅都介乎９至１９巴
仙，真係無陰公！

＊保險本靚仔奈何速變臉，你碌我又碌最穩陣壽仔＊

　　查實，中資股今日都一樣慘不忍睹。本來阿爺出招撐住，開市Ａ場都好好睇睇，所以香江中
資金融佬好似內險咁，開頭都仲有啲升幅。但點知好景不常，話之你神州保險投資基金獲批之後
規模有三千億都好，神州保險佬新保（０１３３６）碌低７巴仙收３９﹒８銀，人保
（０１３３９）一度直瀉逾１１巴仙添。龍頭國壽（０２６２８）（滬：６０１６２８）都算交
足功課，Ｈ股輕輕唔見２巴仙，Ａ股仲要漲停板，勁！
　　出現喺五十大成交榜入面嘅比亞迪（０１２１１）全球首台雙層電動大巴出口去米字國，但
股價就倒後褪６巴仙。仲未見有電影出爐嘅阿里影業（０１０６０）都碌低１３巴仙。
　　至於一樣大成交嘅洛玻（０１１０８）（滬：６００８７６）唔見兩成，係全日最大跌幅嘅
港股通股份，股價已經「陰足七日」啦！

＊齊心來救市券商卻大跌，股災人踩人何日見晴天＊

　　阿爺落「柯打」要救市，券商要「自願」夾１２００億銀人仔救市，認真無奈！２１間券商
名單入面嘅廣發（０１７７６）同華泰六八八六（０６８８６）今日分別插咗１８巴仙同１２巴
仙，分別報１５﹒５８銀同１８﹒４８銀，齊齊創上市新低。中國銀河（０６８８１）都嘔咗近
１４巴仙，報７﹒７３銀。其他券商唔少都嘔咗十幾廿個巴仙，早排大時代嘅升幅基本上已經還
番晒出來，慘！
　　股災「大時代」下，升跌幅榜嘅走勢令人嘆為觀止。香江魚江試過剩番唔夠３０位參賽者錄
得升幅，部分可能仲喺零成交！相對地，股災下人踩人，唔少缸友不問價走人。跌幅榜頭五位均
錄得逾四成嘅跌幅，分別喺網絡資本（００３８３）、博華太平洋（０１０７６）、天馬影視
（０１３２６）、中油港燃（０８１３２）同廣澤地產（００９８９）。跌幅最少，排第五十位
嘅香港教育國際（０１０８２）都有近２７巴仙嘅跌幅，嚇怕唔少缸友！請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。