【著數神算】信用咭迎新禮品非「免費午餐」！

　　《著數神算》筆者讀Ｕ時，經歷過大家相同嘅困惑，就係睇見荷包放信用咭格數多多，但空
空如也，令人萌生申請番一張半張咭旁身嘅念頭。小時侯，認定一咭旁身，就係身分嘅象徵；長
大後，拎起張申請表，方知道申請信用咭大有學問。
　　大家仲記得第一張信用咭係咩情況下申請呢？好坦白講，筆者當日只係睇住份迎新禮品。想
當年，每張咭嘅迎新禮品都一式一樣，大概都係超巿禮券；但今時今日，可謂想要乜都有，申請
幾張咭，一屋新居入伙要買嘅小電器、小沙發都有齊。問題只係，應點樣選擇申請信用咭呢？

＊鼓勵大家試「越級」申請白金信用咭＊

　　喺呢個年頭，做乜生意都興「發水」，整麵包、起樓、職位頭銜，甚至連信用咭嘅級別都有
「水份」。喺十幾廿年前，信用咭大概只得銀咭、金咭，若有張金光閃閃嘅咭喺銀包，已經係身
份象徵。今時今日，大學生分分鐘都有幾張白金級咭喺手。早幾年，筆者讀Ｕ時，被信用咭迎新
禮品吸引，膽粗粗以兼職糧單申請，白金信用咭即時到手，白金級別係咪咁尊貴？大家自可分析
。故此，若果大家有睇上眼嘅信用咭，咪畀所謂嘅薪金門檻所阻欄，儘管一試申請，情況就好似
追女仔咁，追就機會五十五十，唔追就係零。　　
　　另一方面，「越級」申請較高級別嘅信用咭，主要取其著數，不需太過介意信用額。就以匯
豐信用咭為例，最近佢搞嘅酒店自助餐特價優惠，只招待白金級或以上嘅尊貴級客戶享用，只要
有張白金咭，莫論信用額多少，優惠就有份。筆者老爸有張獅子銀行嘅金咭，雖然貴為長期老客
，信用額高過筆者嘅白金咭好幾倍，但都無呢個著數，只好望門興嘆。但一家人食餐飯，邊個埋
單邊有計呢，所以今晚一於等筆者簽咭啦！

＊演唱會飛、貴賓候機室「千金難求」＊

　　當大家決定好申請邊張白金咭，一心打開呢度「著數之門」後，客仔首要面對嘅，就係選擇
迎新禮品。近年銀行為吸納新客，迎新禮品由從前局限於超巿禮券，現已五花八門，包括電器、
單車、積分，甚至乎低息貸款或近期潮爆嘅小米盒子都有。
　　然而，不論迎新禮品價值有多高，但若論最畀到筆者深刻印象，不得不提國泰
（００２９３）ＡＥ聯營咭，其以「尊貴」取勝。大家每當坐國泰飛機外遊，可曾想像於機場候
機室，嘆番杯ｃｏｃｋｔａｉｌ、「ｈｅａ」番陣先上飛機呢？但可惜，呢類候機室只供「尊貴
」嘅乘客享用（大概需為國泰頭等、商務倉乘客，或馬可孛羅會會員使用）。可是，若你持有國
泰ＡＥ白金咭，則可無限次尊享有關服務；就算申請國泰ＡＥ普通咭，入會時亦即送兩張機場候
機室入場券。呢種貼心嘅考慮，雖然未必人人啱使，但其心思可見。
　　近年，有幾張頗中型銀行發行嘅信用咭「捕眼球」能力倍增，包括東亞（０００２３）、以
及建行（００９３９）旗下嘅建銀亞洲。講真，上述兩行信用咭相對冷門，優惠不算最筍，但筆
者兩張都有，可算是朋友堆內萬中無一。有時候，呢類銀行就偏偏教曉我哋，「咭到用時方恨無
」嘅道理，對於追星族相信心領神會。喺去年，台灣樂隊「五月天」及香港歌星陳奕迅各喺香港
舉行演唱會，坊間對門票可謂一票難求，而東亞及建銀因為係活動嘅贊助商，客戶憑咭可優先訂
票，令筆者突然喺朋友堆中成為「掌上明珠」，要求代為訂票。
　　此外，不妨留意筆者提過嘅渣打旗下嘅Ｍａｎｈａｔｔａｎ信用咭，其中有張叫「ｉｄ」嘅
聯營咭，經常搵嚟歌手開演唱會，回饋客仔。送演唱會飛有何稀奇？主要在於門券不作公開發售
，只接受信用咭積分換領。但係，咪以為儲落大量積分就可以大安旨意換領得到，事關若歌手受
萬人追捧，門券太過搶手，換飛熱線難接通，亦是一票難求。佢哋曾為吸引信用咭申請客，預留
大量靚位飛冧新客，但呢類推廣絕對「期間限定」，有興趣嘅朋友，就要睇實啲啦！

＊迎新陷阱：肥肉在前，啃唔啃得落？＊

　　正所謂「聚沙成塔」，若然密密申請，加加埋埋正係仲好過掘金？（衍生嚴重問題，請閱３
月７日本欄「信貸資料庫」一段），但各位須留意，銀行以不同名義推出不同品牌、題目嘅聯營
咭，就好似渣打旗下有Ｍａｎｈａｔｔａｎ、星展旗下有Ｃｏｍｐａｓｓ、恆生嘅Ｅｎｊｏｙ咭
，甚至中銀嘅ＳＯＧＯ咭，條款寫明，若「同一血脈」嘅信用咭，迎新禮品只可選其一。換言之
，若果大家已有銀行一款信用咭，要是申請同一銀行另一款咭，後一張咭唔會有迎新禮品啦。
　　唔止咁播，咪以為迎新禮品係「免費午餐」，若閣下稍一唔醒水，就隨時被搵笨。大家睇睇
申請表嘅細字，就會明白「魔鬼在細節」嘅意義。絕大多數嘅迎新計劃，都附有簽帳要求，意即
你畀番咁上下生意銀行做，先有著數落番你個袋。但近年禮品愈來愈「重手」，簽帳「要求」亦
相應提高。「要求」唔單止講簽帳金額，更係簽帳期限大大收窄，從前，銀行大概要求客仔喺３
至４個月內簽滿三四千銀；現時，稍為好少少嘅禮品，分分鐘要求簽過萬銀，並且要在２個月內
碌滿，所以有番咁上下消費力嘅朋友，先好量力而為。若期內簽唔夠數，分分鐘被銀行追收附加
費，到時只有得不償失。建議大家預計有巨額消費前（如：結婚、裝修、買樓落訂），不妨瞄住
啲要求高嘅銀行「進攻」。
　　此外，大家咪諗住收完大禮，隨時取消用咭！正所謂「你精，人哋都唔笨」，因唔少信用咭
設有最少使用年期，規矩因銀行而異，開咭１年內不准取消可謂最低消費，曾有個別銀行要求持
咭人要留住張咭２年，否則會被徵附加費。至今，筆者朋友堆中，未曾聽過豁免徵費嘅成力例子
，所以有心要取禮品，要好好計劃開咭策略。
　　最後，筆者都係嗰句：「鹹魚青菜，各有所愛」。以下表列部分銀行迎新禮品項目，大家細
心選擇吧！

發咭行　　咭種　　　　年薪要求　　年費　　　　迎新禮品項目　　　簽帳要求
　　　　　　　　　　　（萬元）　（千元）
－－－－－－－－－－－－－－－－－－－－－－－－－－－－－－－－－－－－－－－－－－
中銀　　　崇光白金咭　　１５　　　１﹒２　　（１）藍芽揚聲器　　２個月內簽１萬元
　　　　　　　　　　　　　　　　　　　　　　（２）旅行喼
　　　　　　　　　　　　　　　　　　　　　　（３）二百元崇光
　　　　　　　　　　　　　　　　　　　　　　　　　禮券

匯豐　　　白金咭　　　　２５　　　１﹒８　　（１）旅行喼　　　　６０日內簽４５００元
　　　　　　　　　　　　　　　　　　　　　　（２）加２９９元
　　　　　　　　　　　　　　　　　　　　　　　　　換購氣炸爐

恆生　　　Ｅｎｊｏｙ咭　４﹒８　　　－－　　三百Ｅｎｊｏｙ＄　　９０日內簽４０００元
　　　　　　　　　　　　　　　　　　　　　　（經網上申請，另送
　　　　　　　　　　　　　　　　　　　　　　一百Ｅｎｊｏｙ＄）

恆生　　　白金咭　　　　４﹒８　　１﹒２　　五百Ｃａｓｈ＄　　　９０日內簽１萬元
　　　　　　　　　　　　　　　　　　　　　　（優越理財客戶送
　　　　　　　　　　　　　　　　　　　　　　八百Ｃａｓｈ＄）

渣打　　　白金咭　　　　１５　　　１﹒８　　６００元現金回贈　　２個月內簽４８００元

渣打　　　曼克頓　　　　１２　　　１﹒８　　（１）３０萬積分　　２個月內簽４０００元
　　　　　ｉｄ白金咭　　　　　　　　　　　　（２）數碼相機

花旗　　　白金咭　　　　１５　　　　－－　　（１）八百元禮券　　２個月內簽１萬元
　　　　　　　　　　　　　　　　　　　　　　（２）雀巢咖啡機

花旗　　　八達通白金咭　１５　　　　－－　　（１）三百元禮券　　２個月內曾八達通自動
　　　　　　　　　　　　　　　　　　　　　　　　　　　　　　　　
　　　　　　　　　　　　　　　　　　　　　　（２）二百元八達　　增值及簽帳　　　　　
　　　　　　　　　　　　　　　　　　　　　　　　　　　　　　　　　　　
　　　　　　　　　　　　　　　　　　　　　　　　　通現金
　　　　　　　　　　　　　　　　　　　　　　（３）雀巢咖啡機　　２個月內簽１萬元

星展　　　黑咭　　　　　２４　　　１﹒８　　３﹒２萬飛行里數　　２個月內簽２萬元

ＡＥ　　　國泰白金咭　　３０　　　１﹒８　　７﹒６萬飛行里數　　３個月內簽２９﹒５萬

ＡＥ　　　國泰普通咭　　１５　　　９８０元　７﹒４萬飛行里數　　３個月內簽２９﹒３萬
－－－－－－－－－－－－－－－－－－－－－－－－－－－－－－－－－－－－－－－－－－
資料來源：相關銀行公布

　　上文提及，國泰ＡＥ咭讓客戶尊享貴賓候機室，但論「尊貴」，又點少得最高級嘅「ＡＥ黑
咭」呢？據說呢張咭係無信用額上限，但除此外，佢究竟有幾尊貴呢？
　　另外，面對銀聯咭近年強攻香江市場，Ｖｉｓａ、Ｍａｓｔｅｒ又如何變陣呢？
　　請留意本欄下一篇為大家解述。（本欄每隔周五刊出）

撰文：任我行