《小傳日記》外圍魚缸心花放，香江乘機叨叨光

　　《小傳日記》美聯儲揸Ｆｉｔ人耶倫話加息只會「有遲無早」，瑞士失驚無神話要行負利率
，油價又大幅反彈；幾個利好因素一次過湧晒出嚟，花旗同歐洲魚缸噚晚（１９日）係咁向上飆
，道指急升４２１點，收報１７７７８點，唔單止以全日最高位收市，仲創咗３年嚟單日最大升
幅。歐股就以法股升幅最亮麗，有成３﹒３巴仙進帳，德、英股市都分別升２﹒８巴仙同２巴仙
。
　
＊中美歐皆俏跟實好世界，審訊有裁決新地系停牌＊

　　Ａ仔場雖然無歐美魚缸升幅咁有睇頭，但都有１﹒７巴仙進帳，收報３１０８點。港股喺外
圍同祖國魚缸帶動下，展開第二日反彈。港股今朝早一開波已經升３２６點，不過全日高低波幅
只有１４８點咁大把，收市回順但都有逾２８０點漲幅。全日恆指升２８４點或１﹒２巴仙，收
報２３１１６點；國貨佬畀恆指搶左風頭，全日只係升得６９點，收報１１４００點。
　　今日市場最震撼嘅，唔係花旗嗰邊升到嘭嘭聲，而係單世紀審訊終於有咗裁決，其中前政務
司司長許仕仁８項罪中有五項罪成；新地（０００１６）聯席主席郭炳江三項控罪中有一項成立
，而郭炳聯就全部無罪。另外，陳鉅源同關雄生各兩項控罪全部罪成。新地、新意網
（０８００８）同數碼通（００３１５）下午中段齊齊停牌，新地停牌前跟市升１﹒４％。
　
＊大象終識行最怕轉眼散，比亞迪反彈瑞信畀個讚＊
　
　　外圍造好，一眾大隻佬今日繼續發威，ＱＱ（００７００）噚日反彈逾６巴仙，今日都繼續
升３﹒４巴仙，收報１１５﹒７銀，為表現第三好藍戰士，已重回公布馬化騰減持前水平，估計
反彈尚未完結，有望重上１２０蚊。大笨象（００００５）就反應慢，今日先識反彈，最終升
１﹒７巴仙，報７３﹒４銀，唔經唔覺已經連跌咗８日，今日終於告一段落。而噚晚ＡＤＲ表現
最標青嘅中移動（００９４１）今日表現都唔錯，升１巴仙，報９０﹒２５銀。
　　而近日市場焦點比亞迪（０１２１１）噚晚發功將眾多傳聞逐一擊破，盧布匯兌虧損幾億銀
、訂單下降同埋股神減持通通係流料。而融資盤爆倉就係市場行為，唔關佢事。經過噚日最多近
４７巴仙後，今日即刻反彈１４﹒２巴仙，報２８﹒６銀，但仲係同前日（１７日）收市價
３５﹒２銀仲有一段距離。雖然瑞信畀個Ｌｉｋｅ，仲畀個目標價７１蚊，但可能缸友係驚斬倉
短期會持續，所以都係睇定啲先。

＊大家齊跳舞獨漏眾內房，被併告吹了綠城跌得傷＊

　　魚缸今日水位大升，但總有無份開ｐａｒｔｙ嘅板塊，內房今日就係ｃｒｙｉｎｇ　ｉｎ　
ｔｈｅ　ｐａｒｔｙ，原因之一係祖國資金緊張，上海同業拆放利率急升１３４點子，創一月以
來高位，融資還債成本可能上升。中海外（００６８８）今日跌咗１﹒８巴仙，係表現第二差藍
戰士，報２１﹒４５銀；潤地（０１１０９）都不相伯仲，跌２﹒２巴仙，報１８﹒８８銀。雖
然拆息突然高咗，但資金流動性話事權掌握喺阿爺手中，流動性太緊好大機會喺適當時間會放返
鬆，加上預期出年會繼續減息，所以內房都係被睇好，缸友可以考慮搵機會入番多少。
　　綠城（０３９００）跌得仲甘，因為融創（０１９１８）收購綠城計劃告吹，主要原因係雙
方對綠城經營理念有較大分歧。單刁告吹，搞到雙方兩敗俱傷，綠城股價結果插１０﹒２巴仙，
而融創都唔見咗１﹒２巴仙。

＊中交建回吐兩鐵續前進，中聯今威盡Ａ股漲停板＊

　　之前極速開車嘅火車佬，今日要先行減一減速，回一回氣。中交建（０１８００）今朝高見
七年半高，報９﹒８６銀之後回吐，相信係獲利盤出晒嚟，結果全日跌１﹒３巴仙，收報
９﹒５７銀。不過，中國中鐵（００３９０）同中鐵建（０１１８６）就繼續開高，分別踢高
１﹒８巴仙同１﹒５巴仙。
　　見到班火車駛極都未完，「一帶一路」嘅概念真係冇得頂。有報道話「一帶一路」戰略大幅
推進神州軌道交通海外市場拓展力度，祖國嚟個高鐵外交，家陣全世界已經有２８個國家同神州
傾引入高鐵技術同合作開發。全世界都睇好呢樣野，基建同重型機械又點可以唔踢高呢？中聯重
科（０１１５７）今日都漲近一成，報１０﹒８銀，Ａ股（深：０００１５７）更加漲停板添，
報６﹒８４人仔。

＊北汽新登場微微略收低，富貴再深潛呷哺浮水面＊

　　集資額近１００億嘅北汽（０１９５８）今日終於喺主板亮相，因為招親反應唔算太熱烈，
只喺超購１﹒１，第一日掛牌都無乜炒味，全日收報８﹒８５銀，比招親價８﹒９銀輕微低唔夠
１個巴仙，每手蝕２５蚊咁大把。
　　至於今個禮拜上場嘅新丁就各別發展，首掛已經深潛嘅富貴生命（０１４３８）繼續向深海
探索，再跌近６巴仙，收報１﹒９１銀。搞火鍋店嘅呷哺呷哺（００５２０）就升番上水面，仲
試過破５蚊大關，收報４﹒７５銀有２﹒４巴仙進帳。噚日先係創業板掛牌嘅密迪斯肌
（０８３０７）首掛飆升逾４倍，盤中試過急回吐４０﹒７巴仙，之後拗腰倒升２﹒２巴仙破頂
收市，造３﹒１９銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。