《小傳日記》歐洲印銀紙，香江大升市；和黃千億刁，有貨心歡笑！

　　《小傳日記》等咗咁耐，終於等到歐洲啟動「印銀紙機」喇！歐洲央行宣布加大力度，每個
月印６００億歐元救市，為期１８個月，即係將會有超過１萬億歐元湧入孖屐，計數機都未必夠
位計呀！由於今次規模遠超預期，歐美魚缸齊齊衝前１至２巴仙慶祝，帶挈埋香江高開２８４點
，仲一度抽高３７０點左右，挑戰２４９００高位。
　　不過Ａ仔場今日（２３日）就無咩氣氛，唔能夠一齊開Ｐａｒｔｙ，限制咗魚缸嘅氣勢，但
埋單都有３２７點進帳收２４８５０，一星期累計升咗７４６點，勁！國貨佬今日就有２１２點
袋落，報１２２６０。
　　大市旺咗咁多，成交又上番千億銀，約有１０６１億，升市成交增。讚！

＊歐開印鈔機炒友最合皮，大象與渣打紅粉見緋緋＊

　　歐洲成班「揸ＦＩＴ人」終於拆掂數要搞放水，連最惡搞嘅希臘都有份，真係好似獎門人派
獎金，保證人人有份永不落空。份獎金每月都派成６００億歐元，仲要派到去２０１６年９月，
認真開心。除咗啲ｍｅｍｂｅｒｓ有得分，當然唔少同佢地有關係嘅公司都可以分下着數。兩位
國際金融大財主大象（００００５）同渣打（０２８８８）歐洲都有唔少業務，今次放水對息差
都有幫助，今日兩位大財主分別都升近２巴仙及逾１巴仙，報７３﹒１銀及１１１﹒２銀。
　　歐洲業務佔咗八成嘅時裝設計師思捷（００３３０）當然都中咗獎喇，埋單炒起近４巴仙，
報８﹒４２銀。不過，就算歐洲經濟真係好咗，佢可以賣多啲衫，但歐元跌咁多，兌返做港紙寫
落成績單度業績可能唔升反跌，都係小心為妙！

＊和黃有大刁一號同歡笑，德國佬錫錫華創開心鳥＊

　　長和前排先至話要搞重組，今日和黃（０００１３）Ｕ盤冇耐即刻閃電停牌，究竟發生咩事
？之咪就係和黃又傾緊超級「大單刁」囉！公司向西班牙電信收購英國電訊商Ｏ２　ＵＫ，意向
價為現金９２﹒５億英鎊，折合１０７５﹒５億港幣，成為和黃歷來最大宗收購交易。公司午後
復賽，就踢高３巴仙，報１０１﹒２銀，重登「紅底股」寶座。而上晝停緊牌嘅時候，阿媽長實
（００００１）直衝
１４７﹒１蚊，升破咗世紀重組公布之後果日（１２日）嘅收市高位，直撲１５０蚊。全日就踢
高３巴仙，報１４５﹒８銀。
　　其他藍戰士亦都好勇猛地向高空飛揚，華創（００２９１）真係要多謝德銀近排唱手唱好，
今日又繼續踢高近７巴仙，報１８﹒１２銀，係最勁嘅藍戰士；而國泰（００２９３）亦唔執輸
，開大引擎飛上６巴仙。另一邊廂，街坊旺旺（００１５１）就陰功咗啲，已經係第二日大陰燭
，一度跌到去兩年低位見８﹒９２銀，埋單就收９﹒１４銀，最差藍戰士是也。　　　　　　　
　　　

＊旺旺有點翳國泰衝天飛，半新股炒上有貨認真肥＊

　　港股食住歐洲「放水」嗰勢，夾高超過３００點。之不過一啲升市火車頭都差唔到到頂，有
啲游資似乎轉炒一啲上面無乜蟹貨嘅半新股。港股升幅最多頭１０隻股份，有一半喺今個月先上
場嘅新丁。其中爆得最勁嘅半新股喺科勁國際（０６８２２），今日有成３１﹒８巴仙進帳，收
報１﹒１２銀。但唔好以為科勁好巴閉，皆因佢而家仲未番到家鄉，距離招親價１﹒３８元仲有
一段距離。緊隨其後，仲有升２８個巴仙嘅泰加保險（０６１６１）同埋升近２３巴仙嘅日成控
股（０３７０８），兩隻都雙雙破頂。
　　之不過，都有啲表現令人好失望嘅；之唔喺講緊震昇工程（０２２７７），本來中段喺威喺
勢咁踢高近１２巴仙，見過１﹒０３嘅上市新高，點知尾段倒跌番一成有多，收報０﹒８２銀。

＊細細粒落鑊升幅成成升，高誠急插水收跌逾兩成＊

　　除咗半新股炒到上天之外，細價股都落晒鑊，恆寶（０１３６７）無喇喇大成交炒高近５３
巴仙收０﹒８４銀，係升幅最勁股份。排喺第三嘅中國國家文化產業（００７４５）都爆升三成
收０﹒１３４銀，上番十天線（約０﹒１２４銀）。仲有俊和（００７１１）都炒高１９巴仙收
１﹒４４銀，兩日累升３１巴仙！　　　　
　　有人歡喜有人愁，高誠資本（０８０８８）早排衝得太勁，呢幾日都無晒力，今日再跌逾兩
成收市。四支陰燭加埋，已經唔見咗近四成，今日仲要做埋最差表現股仔添！假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。