《小傳日記》大象打敗仗，粉絲好惆悵；Ａ仔明復賽，行情盼高漲！

　　《小傳日記》希臘危機又有緩和跡象，不過講咗咁耐都聽到悶，噚晚（２３日）道指都已經
無咩大反應，輕輕跌２３點收１８１１６散場。缸友最緊張嘅，就梗係派完成績表嘅大象
（００００５）身上喇。大象唔單止成績表交唔到功課，就連ＣＥＯ歐智華因為存有巨款而搞到
周身蟻，噚晚大象ＡＤＲ已經急急碌低４巴仙，７０蚊都穿埋，今日就梗係注定冇運行啦！
　　好彩其他重磅藍戰士，祖國移動（００９４１）、友邦（０１２９９）合力進貢５８點，香
江今日（２４日）先唔使跌好多。恆指收市碌低８６點收２４７５０，終止六連升，國貨就微升
４點收１２０４６，全日成交已多番逾１７巴仙至５８０億銀。
　　過咗兩日悶市，聽日（２５日）終於唔使再拍烏蠅，皆因Ａ場正式開爐，仲有香江人最關心
嘅財政預算案添！

＊大象穿七十渣打亦被質，資金去哪兒友邦夠紥實＊

　　大象今朝喺開市前競價時段已經得番６９﹒２５銀，係超過兩年新低。之後畀多間大行聯手
唱淡，大摩仲大減目標價話只值６６銀，搞到又跌到去６９﹒１５銀！老老實實，瑞士分行幫客
瞞稅件事都未解決，仲有個歐智華先生，依家又傳出花旗國查緊金屬市場操縱行為，大象又榜上
有名，壞消息一浪接一浪，結果全日以３４億銀插低近４巴仙收６９﹒４５銀，拖低咗大市
１０２點，係最差藍戰士。囝囝恆生（０００１１）成績不過不失，大行睇法好壞參半，雖然一
度碌低逾２巴仙，但收市前都升番唔少，最終都穩收１４２﹒２銀。
　　大象成績咁差，缸友都怕咗下星期三（４日）放榜嘅渣打（０２８８８），決定掟貨走人，
搞到渣打跌得仲多，收挫近４巴仙報１１１﹒１銀；齊齊換馬去後日（２６日）派成績嘅友邦，
以逆市升逾２巴仙佳績，榮登最威水藍戰士。

＊ＣＹ一席話零售有點酸，檢視自由行濠賭即腳軟＊

　　特首ＣＹ梁話年廿九到年初四一簽多行同自由行來港旅客有輕微下跌，而去馬交嘅就按年有
增長。佢話會喺下月兩會同阿爺傾傾一簽多行政策，因為香江接待能力有限，唔贊成增加自由行
城市數目，長遠要搞好旅遊業要增加多啲購買設施，但就要時間。ＣＹ一席話，搞到零售股腳仔
軟，莎莎（００１７８）同卓悅（００６５３）分別跣低約１巴仙同近３巴仙。做開祖國大媽生
意嘅六福（００５９０）同周大福（０１９２９）軟大約１巴仙。
　　無獨有偶，馬交春節後都會同阿爺傾吓自由行計劃，賭仔繼續無運行，藍戰士銀娛
（０００２７）同金沙（０１９２８）齊齊挫３巴仙左右，街坊永利澳門（０１１２８）就跌得
最傷，挫近４巴仙，連續兩日出現大陰燭。二線賭仔勵駿（０１６８０）同ＤＹＮＡＭ
（０６８８９）合作備忘錄到期得個桔，前者急跌超過半成，後者就夠硬淨企穩。

＊三月開兩會醫藥先抽上，一帶一路股行情亦高漲＊

　　祖國下星期就會舉行矚目嘅兩會，相信都會有唔少改革同政策出爐。雖則今日祖國魚缸就放
緊大假，之不過缸友已經急不及待炒作具改革概念板塊，好似醫藥股同「一帶一路」股咁。先講
下醫藥股，第一個爭住跑出嘅有四環（００４６０），股份早前由６﹒５銀附近一路碌碌碌，呢
幾日先喺４﹒３至４﹒４銀水平築底。今日股價踢高６巴仙，成交仲好鬼勁，短期上返５蚊樓上
都唔出奇。街坊新華製藥（００７１９）同先鋒（０１３４５）都有３至４巴仙進帳。
　　一帶一路板塊方面，以重型機械股升幅略為顯著，大隻佬中聯重科（０１１５７）盤中試過
低見４﹒６９銀，點知成功拗腰彈，埋市倒升逾２巴仙收４﹒８９元，街坊機械工程
（０１８２９）都有３巴仙落袋。鐵路股方面，南車時代（０３８９８）跑出，踢高５巴仙，阿
媽南車（０１７６６）都升逾２巴仙，唔錯！

＊汽車齊踩油萬全亦靚仔，昂納光盈喜炒高來慶祝＊

　　魚缸開倒車，但砵砵車加大馬力逆流而上衝衝衝！東風（００４８９）噚日公布喺兩間合營
嘅應佔溢利按年升多過五成，但股價就升唔起，反而今日就大成交踢上５巴仙，收１２﹒３６銀
；而華晨（０１１１４）都走高３巴仙。
　　新春習俗就燒炮杖，魚缸又點可以冇爆升股賀一賀新年呢？好似今日隻昂納光
（００８７７），公司發盈喜話毛利同收入都有顯著增長，預期舊年純利增長約３倍！雖然股價
冇升返３倍，但今朝裂口高開之後亦繼續發光發熱，最後踢高三成，報２﹒０１銀。至於中國光
纖（０３７７７）都發盈喜，股價就冷靜啲，只係射高３巴仙收２﹒０９銀。
　　另一隻打算過兩日用新名「中國醫療集團」做買賣嘅萬全（０８２２５），今日復牌都爆升
兩成四收報０﹒１７５銀，可喜可賀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。