按盤價 
《小傳日記》今日（１７日）香江魚缸實在難玩，明明花旗國噚晚（１６日）爆升番二百幾
點，今朝阿爺又放水二百億人仔，Ａ場強勢衝上去３５００大關，缸友坐定粒六，諗住香江市收
復番二萬四之後，應該更可上一層樓。
點知來個反高潮，ＱＱ（００７００）、友邦（０１２９９）、銀娛（０００２７）同金沙
（０１９２８）齊齊被淡友狙擊，搞到大市下半場碌番低百幾點，慘！雖然好友全力抗戰，再加
埋金管局定咗香江五大錢莊做系統性重要錢莊，大象（００００５）榜上有名，輕輕踢高慶祝，
收６５﹒０５銀，叫做幫手托住下大市，但散場仍唔見４８點收２３９０１，十天線同百天線都
得而復失。反彈行動暫未成功！
Ａ場收升１﹒６巴仙報３５０２點，創近七年高位，旺到不得了！只可惜，國貨都只係收升
２４點報１１８３７。全日主板成交就多番Ｄ，約有８０１億銀。
＊特首見記者缸友想多了，零售與濠賭捱沽唔識笑＊
大市難測，世事更難料。午市開波無耐，就聽到前亞視老闆、遠東集團同埋荔園創辦人邱德
根辭世，享年９０歲。睇番佢旗下股份表現，遠東酒店（０００３７）有近２９巴仙升幅，而遠
東控股（０００３６）同遠東發展（０００３５）都有１０巴仙及２巴仙進帳。
另一邊廂，香江零售股呢排都無晒精神，成日都驚「一簽多行」真係會封頂，大行又排隊唱
淡，咁啱梁特首又失驚無神話三點半開記招，嚇到周大福（０１９２９）、六福
（００５９０）、莎莎（００１７８）齊齊創晒逾５２周新低。雖然原來只係虛驚一場，梁特首
只係出嚟交代愛女齊昕嘅健康狀況，但呢三位零售大哥最終都要手拖手碌低２至４巴仙。
講到被大行追住打嘅，又點止零售股呀…濠賭股繼續向下尋底，銀娛、金沙一度低見
３３﹒１銀及２９﹒５５銀，新濠國際（００２００）仲插低近４巴仙，慘。
＊德銀來讚好ＱＱ卻回氣，阿里對孖寶逆市齊向好＊
馬年過咗雙馬股都仲係波動，ＱＱ聽日派成績表，大行們普遍估ＱＱ全年多賺４０至４６巴
仙，德銀就估微信廣告收入有１７億銀，出年仲會升到４０億添，維持「買入」評級，目標價
１５６銀。但可能之前連升４日要回一回氣，今日跌低多過１巴仙。ＱＱ揸住逾一成股權嘅華南
城（０１６６８）今日反而爆升１４巴仙，仲破埋十天同廿天線，今日交投係平時嘅５倍有多。
唔通有嘢跟尾？
阿里巴巴噚晚喺花旗嗰邊抽高２﹒６巴仙，收報８４美元，巴克萊就潑佢冷水，將目標價由
１０７美元降到１００美元，因為近期問題多多，包括同工商總局合作打假、天貓管理層變動、
暫停發售彩票、利息收入因重組小微貸款而降低等等，但維持「增持」評級。大摩亦削目標價至
１０２﹒３美元，維持「增持」。雖然畀兩間大行唱淡，但阿里字頭都造好，阿里影業
（０１０６０）同阿里健康（００２４１）分別踢高１０巴仙同唔夠１巴仙。
＊油價繼續碌鐵鳥上雲霄，鐵路轟隆隆電力亦夠照＊
油價繼續潛水，花旗國４月期油跌低０﹒９６美金，報４３﹒８８美金，之前仲掂過
２００９年３月低位４２﹒８５美金。用油成本可以平咁多，鐵鳥們一定好著數！難怪連賓架都
要出報告，話未來中資鐵鳥股股價可以向上，仲最睇好國航咁話（００７５３）！今日國航就飛
高近４個巴仙，而街坊東航（００６７０）同南航（０１０５５）就分別飛起咗５巴仙同近一成
，而劇飛（００２９３）都噴上２巴仙，繼續衝上雲霄！
聽線報話，中鐵隧道集團副總工程師指，阿爺已經開始研究緊中國中鐵（００３９０）和中
鐵建（０１１８６）嘅合體計劃。仲話合併對工程、發展有利，同埋可以避免腐敗咁話！消息一
出，兩架火車齊齊衝上２巴仙同４巴仙，街坊南車（０１７６６）同北車（０６１９９）都走高
近２巴仙呀。
＊３６８轉盈踢高來慶祝，數據有起色內房各走各＊
電力股今日發熱發亮，事關德銀唱好佢地，間大行話上個月因煤價下跌搞到電力股最多有兩
成調整，ＰＥ同股息率亦變得吸引，當中最睇好華能國際（００９０２），畀咗「買入」評級同
目標價１１﹒１銀，結果成功以逾３億銀大成交抽高６巴仙，係最威水國貨佬。
靜咗好耐嘅船仔股都揚帆出海，中航運（００３６８）上年由虧轉盈，賺１８６萬美元，今
日就踢高６巴仙慶祝，街坊中國遠洋（０１９１９）亦水漲船高，升４巴仙。
富力（０２７７７）就因為舊年賺少多過三成，純利得５２億人仔，又唔派息，結果跣低７
巴仙收８﹒０６銀。至於其他祖國磚頭，表現反而唔錯，因為上星期多過七成嘅城市樓宇成交面
積都升咗，結果班內房佬就好開心，好似隻潤地（０１１０９）就踢高２巴仙報１９﹒９８銀。
請請！
《編者按》本欄搜羅即日熱門傳聞，惟消息未經證實，《經濟通》亦不保證內容之準確性
本文只供參考之用，並不構成要約、招攬或邀請、誘使、任何不論種類或形式之
申述或訂立任何建議及推薦，讀者務請運用個人獨立思考能力自行作出投資決定
，如因相關建議招致損失，概與《經濟通》、編者及作者無涉。
樂本健【秋日開倉26 - 27/9】保健品低至$20！► 火速行動
