《小傳日記》魚缸唔上又唔落，內房濠賭再落鑊

　　《小傳日記》前日（２日）唔少資金嚟香江泊碼頭，金管局向孖屐注水維持港匯穩定，魚缸
夾高近３６０點破咗今年高位。另一邊廂，花旗國就業數據超靚仔，道指就不斷創新高，噚晚
（３日）仲攻破埋１７００點關口，認真厲害。
　　比起花旗市，香江股市真係相形見絀，衝咗一日就喘晒氣，呢兩日魚缸都喺高位度唔上唔落
。今日缸外太陽高高掛熱到爆，但缸內就悶到瞌眼瞓；恆指全日微升１４點，收２３５４６點。
全日成交約５３６億銀，同噚日差唔多。
　　Ａ仔場今日都冇乜睇頭，國指今日升３５點，收１０４８９點。

＊內房似否極巴記來添花，萬科超靚仔二線誇啦啦＊

　　魚缸想升都升唔起，缸友唯有炒下落後板塊。巴克萊出報告唱好祖國地主，今日內房繼續有
運行。呢期中國指數研究院就公布咗上半年祖國地主銷售業績嘅排行榜。魚缸新丁萬科
（０２２０２）繼續穩佔「一哥」寶座，上半年賣樓賣左１００９億人仔，勁過上年同期，都算
喺有交代嘞！萬科全日踢高８﹒２巴仙，收１５﹒８銀。
　　至於華潤置地（０１１０９）就「陰公豬」，排名跌出十大。不過話明追落後，缸友對潤地
充滿信心，全日收高３﹒３巴仙，收１５﹒１６銀，係升幅最亮麗嘅藍籌；大隻佬中海外
（００６８８）就升少啲，升１﹒９巴仙，收２０﹒３銀。
　　研究院雖然話大型內房增長速度遠勝細房企，其他二線地主股升幅一啲都唔失禮，沿海家園
（０１１２４）全日飆１３﹒３巴仙，收０﹒２５５銀。綠城中國（０３９００）同奧園
（０３８８３）各升６﹒１巴仙同５﹒１巴仙，收８﹒３３銀同１﹒２３銀。街坊碧桂園
（０２００７）都升５﹒８巴仙，收３﹒４８銀。

＊買股看前景不怕過去曳，大行扶一把濠賭好氣勢＊

　　馬交前日出咗上月嗰博彩數據，５年嚟首次下跌。濠賭股呢兩日完全無視嗰數據，你有你講
，我有我升，皆因買股睇前景，加埋有大行輪住出嚟護航。大和今日就話，博彩收益下跌符合預
期，由於舊年７月基數高，估下嗰月嘅博彩收益最多跌２％至升２％；至於摩通就預期，世界盃
閉幕之後，下月嘅賭枱收入都有２％增長咁話，唔怪得濠賭股咁有恃無恐，愈升愈有。
　　兩隻藍籌銀娛（０００２７）同金沙（０１９２８）分別升超過兩個巴仙，分別收
６６﹒４５銀及６１﹒１５銀，前者仲攻破埋條百天線。今日表現最好嘅賭股係新濠國際
（００２００），有近３個巴仙進賬。唔講唔知，美高梅（０２２８２）靜雞雞連升咗８日，今
日收報２９﹒０５銀，升２個巴仙。

＊自由慢慢行股仔有點憾，租客做少咗收租變閉翳＊

　　有人歡喜有人愁，望住內房同濠賭升得咁勁，自由行股恨都唔恨得咁多嘞！噚日官府出左５
月零售總銷貨價值數據，條數跌左４巴仙。自由行股今日表現都麻麻地。六福（００５９０）跌
得多啲，全日碌低１﹒７巴仙，收２３﹒６銀。無計啦，之前六福全年盈利創新高，股價飆左上
去，依家借勢回吐都對辦嘅。至於街坊周生生（００１１６）同英皇鐘錶珠寶（００８８７）就
各升０﹒７巴仙同１﹒９巴仙，收２０﹒４銀同０﹒５３銀。化妝品股莎莎（００１７８）今日
就軟０﹒５巴仙，收５﹒６７銀。
　　零售店做少咗生意，下一步可能係收縮舖位節流。收租股九倉（００００４）同希慎
（０００１４）就分別跌１﹒３巴仙同升０﹒４巴仙，收５５﹒９銀同３６﹒７銀。

＊新丁半新丁各自各精彩，鴻福堂靚爆康達有交代＊

　　呢期新股市場大混戰，今日粉墨登場嘅有涼茶舖鴻福堂（０１４４６）同埋搞污水處理嘅康
達環保（０６１３６）。鴻福堂見夏日炎炎，索性同缸友開個玩笑，降下火。股份噚日暗盤畀
「招親價」升一成都冇，今早開市就更加連半成都欠奉，相信缸友們都跌晒眼鏡。點知隻股一個
股愈上愈有力，盤中最多升成４０個巴仙，收報１﹒７１銀，每手袋成八舊水。至於康達表現都
唔錯，收報３﹒２１銀，比招親價高近１５個巴仙。
　　新股表現對辦，有兩隻半新股決定要爭番口氣。Ｍａｇｎｕｍ（０２０８０）同恆發洋參
（００９１１）分別發力升７﹒６同６﹒６個巴仙。Ｍａｇｎｕｍ就曾經收復番１蚊大關，不過
同年頭上市招親價１﹒５元仲有大段距離，睇嚟要繼續努力！
　　魚缸已經連續唞咗兩日氣，話唔定下禮拜返嚟又會發力，二萬四關大家拭目以待喇！假期愉
快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式之
　　　　　　　申述或訂立任何建議及推薦，讀者務請運用個人獨立思考能力自行作出投資決定
　　　　　　　，如因相關建議招致損失，概與《經濟通》、編者及作者無涉。