《小傳日記》脫歐大亂路茫茫，香江抗亂再觀望！

　　《小傳日記》上星期五（２４日）見證米字國意外「脫歐」後，各地魚缸都發生大地震，唔
少缸友都傷亡慘重。搞到七國咁亂、乿過亂世佳人之後，米字國有數以百萬計選民，依家先話後
悔脫歐，仲聯署話希望可以再公投一次！家陣細路仔玩泥沙咩？！
　　脫歐結果已成定局，米字國前路茫茫，高盛就話今年內米字國將會陷入衰退，仲下調歐美經
濟預測。好彩財相歐思邦力撐經濟強勁，英鎊先稍為跌少咗ＤＤ，加上唔少大行都話脫歐對香江
影響唔算太大，今日（２７日）恆指低開２７６點穿兩萬後，就開始有買盤出現，下半場仲曾經
倒升最多７０點至２０３２９添。雖然恆指散場都要微微跣低３１點收２０２２７，但尾市內銀
股突然發力，建行（００９３９）、工行（０１３９８）抽高下，國指反彈３７點收８５６７，
而魚缸成交全日就有近６２６億銀。

＊脫歐成定局長和繼續碌，大象被唱啖渣打亦暗淡＊

　　米字國脫歐真係殺超人一號（００００１）一個措手不及！唔單止畀大摩降目標價，由
１０２銀下調到９５銀，評級為「同孖屐同步」。連瑞信都唱淡，將目標價質到落１２０銀。不
過，超人始終係超人，仍然有賓架護航，穆迪、富瑞認為公司業務有抗跌力，令公司今日跌得無
上星期五咁勁，今日唔見４巴仙完場，報８３﹒５銀。
　　同系電能（００００６）同長建（０１０３８）亦都畀瑞信同里昂下調目標價。雖然摩通就
話低吸電能，但電能同長建今日都無力，碌低近３巴仙同近５巴仙，報６８﹒１５銀、６６﹒５
銀。
　　摩通出嚟唱淡大笨象（００００５），同時花旗亦都下調公司目標價，睇嚟米字國同歐盟講
拜拜，孖屐都唔睇好公司前景！不過，歐洲今日下午開市之後，英鎊跌幅收窄咗，大笨象同街坊
渣打（０２８８８）雖然都有番少少支持，但最後兩者都分別跣低近２巴仙同１巴仙，報
４６﹒６５銀同５７﹒１５銀。本地銀主恆生（０００１１）就踢起近１巴仙，報１３０﹒７銀
。
　
＊資金欲避險領展十分掂，金價漲瘋了金佬升到笑＊

　　祖國移動（００９４１）因為有麥格理唱好，今日表現幾靚仔。阿爺促農村寬帶網絡建設亦
都有利行業長遠發展，今日成為避風港之一，股價浮起２巴仙，報８５﹒５銀。至於ＲＥＩＴＳ
領展（００８２３）今日亦踢高近４巴仙，報５１﹒６５銀，盤中仲一度破頂，都係多得摩通發
表報告唱好公司咋！
　　孖屐資金湧晒向黃金等避險資產，金價曾急升達８巴仙到逾兩年高位。現貨金漲４﹒９巴仙
到１３１７﹒２美元，盤中一度觸及１３５８﹒２美元高位；個別金佬今日再開派對，紫金礦業
（０２８９９）、靈寶黃金（０３３３０）、招金（０１８１８）分別扯起逾２巴仙至逾５巴仙
，各自報２﹒５１銀、１﹒５８銀同８﹒２４銀。

＊寶能對王石萬科好鬼ＳＡＤ，派息夠穩定珠寶見天晴＊

　　萬寶之爭誰勝誰負仍未有分曉，寶能系對萬科（０２２０２）主席王石進行反擊，要求召開
董事會炒晒成班董事魷魚，仲點名指王石國外讀書期間無做嘢照拎人工成５千萬咁多，完全唔合
理。萬科爭吵難免影響日常營運，今日繼續碌低近４巴仙，收報１６﹒０６銀。另一主要股東華
潤集團近排亦對萬科同深圳地鐵交易有不滿，旗下華潤置地（０１１０９）今日輕微走低啲啲，
收報１７﹒２８銀。
　　金價觸及兩年高位，加埋魚缸波濤洶湧，派息穩定嘅珠寶金飾商獲得一定粉絲支持。周大福
（０１９２９）踢高近７巴仙，收報５﹒７１銀。六福（００５９０）及周生生（００１１６）
亦有逾２巴仙至３巴仙升幅。隔離賣化妝品嘅莎莎（００１７８）更踢高近９巴仙，收報
３﹒０９銀。

＊脫歐影響微內銀齊歡喜，深港通測試生發發展翅＊

　　細摩指神州錢莊以外幣（美金及港紙除外）計價嘅資產只佔約１巴仙，米字國脫歐對佢
地影響不大。工行收市前跑前逾２巴仙，收報４﹒４１銀。建行及招行（０３９６８）亦企高逾
１巴仙，收報４﹒９５銀及１６﹒５銀。
　　深港通今日起進行端對端測試，加埋「七一」臨近，憧憬中央隨時可能公布深港通消息！生
發發（００３８８）雖然遭花旗叫賣走，但仍扭轉今早跌勢，埋單有近１巴仙落袋，收報
１８４﹒４銀。華泰六八八六（０６８８６）踢高逾１巴仙，收報１６﹒３８銀。廣發
（０１７７６）亦獲支持有近１巴仙收穫，收報１７﹒５８銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。