《小傳日記》香江寫下今年高，連升六日確風騷！

　　《小傳日記》外圍呢排好多事發生，數一數手指，「脫歐」、「法國恐襲」、「土耳其政變
」等，真係「鑊鑊新鮮，鑊鑊甘」。好彩周末發生嘅土耳其政變好快就失敗咗，加上地理上距離
實在太遠，對香江影響真係不大。今朝（１８日）恆指試吓水溫，低開２點報２１６５６後，下
半場就發力衝高最多１６２點見２１８２２，唔單止連升六日，仲寫下今年新高添，勁！
　　香江魚缸見慣風浪，埋單守得穩漲勢，踢高１４３點報２１８０３，國指就有４１點落袋報
９０９０，不過全日成交就唔多，比上星期五（１５日）少咗逾兩成，只得５５５億銀左右。
　　再睇一睇恆指公仔圖，７月壞消息盡出，但大市呢六日竟然累升咗超過１２００點，認真唔
講得笑，距離二萬二關都唔係好遠，小心淡友隨時嚟個突襲呀！　　

＊ＡＲ好好炒聯想起勢跑，霆鋒都入股特步叫緊胡＊

　　手遊《Ｐｏｋｅｍｏｎ　Ｇｏ》全球瘋玩，亦掀起市場對擴增實境（ＡＲ）嘅憧憬。聯想

（００９９２）早排曾公布就嚟推出首款ＡＲ手機，今日追落後起勢跑前近８巴仙，收報５﹒１
銀，成最佳藍戰士。
　　早前發盈警嘅招商局（００１４４）獲穆迪指暫時未影響「ＢＡＡ１」評級，但展望繼續係
負面。招商局全日反彈近６巴仙，收報２１﹒５５銀。
　　特步（０１３６８）獲霆鋒斥逾二千萬入股０﹒２３％股權。霆鋒查實已經做咗公司代言人
超過十年，今次揼真銀撐公司，難怪特步可以跳高近３巴仙，收報４﹒０９銀。
　　民行（０１９８８）副董事長傳接連增持公司Ａ股（滬﹕６０００１６），被指希望爭取換
屆後繼續擔任董事席位。民行蘊釀股權爭奪情況下，Ｈ股企高近４巴仙，收報７﹒９９銀；Ａ股
升近３巴仙收９﹒５４銀人仔。

＊連升紀錄斷金股心慌亂，投下信心票比亞迪前飆＊

　　金價結束六周連升紀錄，金股亦隨之然向下碌。恆興黃金（０２３０３）全日插近５巴仙，
收報３銀。紫金（０２８９９）招金（０１８１８）就齊齊趴低逾１巴仙及逾３巴仙，收報
２﹒９５銀及８﹒８４銀。
　　比亞迪（０１２１１）確認三星電子參與公司Ａ仔（深﹕００２５９４）發行。德銀認為三
星入股公司係對比亞迪新能源車業務投下信心一票。比亞迪Ｈ股駛前近３巴仙，收報５２﹒６５
銀，續創一年新高。吉利（００１７５）委任李東輝為新副主席，亦走前逾３巴仙，收報
４﹒７９銀。東風（００４８９）同廣汽（０２２３８）亦有近６巴仙至逾２巴仙進帳。

＊賭收獲睇好賭仔跳勁舞，磚頭有得升地主好高興＊

　　德銀早前預料７月同８月馬交賭收會有改善，畀咗一眾一線賭仔「揸住」評級，當中最受惠
係藍戰士金沙（０１９２８）同永利馬交（０１１２８），前者跳起逾３巴仙，報２７﹒７５銀
；後者亦有逾２巴仙進帳，報１２﹒２銀。另一藍戰士銀娛（０００２７）亦向前跑近２巴仙，
埋單２４﹒６銀。
　　一班地主亦好高興，花旗估全年樓價會升３巴仙，信置（０００８３）好威水，衝高近３巴
仙，收報１３﹒６８銀，創兩年半高位；新地（０００１６）亦走前逾２巴仙，報１０８﹒１銀
。長實重組前雍澄軒被證監指涉及集體投資，律政師４月指不構成故意不遵守法律等原因決定唔
起訴，長實地產（０１１１３）升起逾１巴仙，報５３﹒２銀。

＊四環賺少咗水瓜來打狗，周生生盈警跌到無晒影＊

　　醫藥股表現唔太好，四環醫藥（００４６０）中期估計會賺少咗，難怪跣低咗差唔多６個巴
仙，報１﹒７１銀。街坊中國生物製藥（０１１７７）呢個月都跟升咗唔少，唔知係咪畀四環嚇
親，散場時就逆市碌低咗逾６個巴仙，連１００天線同１０天線都穿埋，陰功！
　　另一邊廂，零售步入寒冬，做金飾嘅周生生（００１１６）梗係受到影響，發盈警話預計上
半年賺少咗，仲要少成５０至６０巴仙，粉絲都無晒機，齊齊沽貨走人，結果散場跌低咗近５巴
仙，報１４﹒９８銀。大阿哥六福集團（００５９０）雖然無跌得咁犀利，但都逆市腳軟約逾２
個巴仙。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。