《小傳日記》魚缸失關有點冷，長和聯通齊送炭！

　　《小傳日記》道指近排強到不得了，噚晚（２３日）侵侵再開金口保證，話將為花旗國帶回
數以百萬計就業。一言既出，道指再收漲３４點報２０８１０，係連續第十日創收市新高。
　　不過，恆指今朝只係象徵式高開１點後，好快就無力調頭走，加上早排輪住炒嘅中資股都回
緊氣，二萬四關失守啦！最低見２３９５８。到下半場，中資電訊股又炒國企改革，但幫唔到魚
缸反擊，大部分時間都喺二萬四浮沉，最後仲失守埋兼穿十天線（約２３９９４），收
２３９６５跌１４９點，國指碌低１０２點報１０４１８，全日成交８０４億銀左右。
　　下星期一（２７日）就係期指結算日，缸友要昅到實喇！
　　除左昅實個市，仲要昅實天氣報告，寒冷天氣警告已生效，明天最低得１１度，記得要保暖
呀！
　　
＊缸外甚寒冷最緊要保暖，缸內似轉冷難免囉囉攣＊

　　超人一號（００００１）旗下意大利電訊合營公司ＥＢＩＴＤＡ　２１億歐元，加上早前獲
摩通睇好，刺激股價抽升２巴仙，收報９４﹒５銀，係今日第二勁藍戰士；長建（０１０３８）
都獲睇好，亦有近半巴仙進帳，埋單６４﹒１銀。
　　噚晚收市後內地要求加大電信基礎設施投入，另有報道指電訊等板塊混改將有邁出實質性步
伐，中資電訊股午後隨即突然炒起，聯通（００７６２）炒高近３巴仙，報９﹒６銀，係最勁藍
戰士；中電信（００７２８）亦走前１巴仙，報３﹒７５銀。
　　鐵鳥股都齊齊高飛，首都機場集團發布消息，話央視今晚七點將播放民航重要新聞，事關祖
國民航世紀工程。無限憧憬下，首都機場（００６９４）率先飛起近５巴仙，東航
（００６７０）都有４巴仙進帳，國航（００７５３）、南航（０１０５５）就有１至２巴仙升
幅。

＊玖紙升得多趁消息出貨，鐵鳥６９４落鑊炒消息＊

　　ＡＩＡ（０１２９９）今朝早放榜，全年新業務價值增２８巴仙至２７﹒５億美金，稍為好
過預期。今朝股價一開場就衝高至４９﹒７５銀，可惜被野村唱淡，話擔心祖國限制碌卡買保險
影響之外，仲話只值５２﹒８６銀同「中性」評級；大摩同摩通唱反調，叫「增持」，可惜都唔
能夠挽回缸友信心，埋單收跌０﹒６巴仙報４８﹒７５銀。
　　國際大錢莊渣打（０２８８８）收市後派成績，今日股價就無咩波動，穩收７３﹒１５銀。
不過早排已有大行唱淡，有貨缸決都要小心喇。
　　玖紙（０２６８９）中期多賺約５倍至逾１９億人仔，夠晒省鏡，不過最近兩個月累升咗近
五成，放榜反成為沽貨藉口，搞到收市回吐近５巴仙報９﹒２７銀。
　　
＊業績勝預期友邦微微軟，里昂來唱淡煤股無運行＊

　　手機股全線重傷。瑞聲（０２０１８）慘遭質低近半成，報８２﹒８銀，係最渣藍戰士；舜
宇光學（０２３８２）獲瑞信讚雙鏡頭業務好，升目標價去到６１﹒８銀，但都係要向下走，瞓
低近６巴仙，報５０銀。手機股中生還者只有聯想（００９９２），逆市踢起近２巴仙，報
４﹒７４銀，藍戰士中跑第３。
　　兗州煤（０１１７１）慘慘豬畀里昂降評級至「沽走」，中煤能源（０１８９８）評級都被
降到「跑輸大市」，里昂嫌佢哋今年累升太多，結果前者唔見４巴仙，報６﹒２２銀；後者跪低
３巴仙，報４﹒１４銀。

＊汽車入後波東風獨駛前，金屬遇沽壓你傷我更傷＊

　　砵砵車普遍無運行，下個月６號就染藍嘅吉利（００１７５）畀大和降級至「好過孖屐」，
話股價年初至今已經升咗一半有多，唔好高追；吉利即刻趴低近４巴仙，報１０﹒６４銀。北汽
（０１９５８）、長汽（０２３３３）都跟住瞓低近４同近３巴仙，收８﹒６９同９﹒５１銀。
東風（００４８９）就成為奇葩，逆流衝前近３巴仙，報９﹒１４銀。
　　祖國鋁業（０２６００）之前就畀瑞信評為「跑輸孖屐」，結果全日瞓低近７巴仙，報
３﹒９２銀。其他有色金屬街坊唔好得去邊，江西銅（００３５８）、洛陽鉬業（０３９９３）
齊齊腳軟５同７巴仙，得返１３﹒２２同２﹒９２銀。假期愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。