《小傳日記》魚缸締造八連升，ＱＱ領軍科網勁！

　　《小傳日記》香江魚缸已經連續升咗七日，缸友都以為好友係時候要唞唞啦；點知今日
（１９日）股王ＱＱ（００７００）發號司令，率領一班科網兄弟落場殺敵，成為今日魚缸大贏
家。ＱＱ挑戰３００銀大關在望，埋單衝前４巴仙，為恆指貢獻咗１０７點，簡直係「單天保至
尊」，勁！科網佬炒到不亦樂乎。
　　香江魚缸埋單時都有１４７點或０﹒６巴仙進帳，收２６６７２，好友已經連續第八日高唱
凱歌；國指更跑贏大市，急漲１０５點或１巴仙，收１０８６０。
　　話說連日豪雨，香江多個水塘亦告滿瀉；睇返魚缸亦水源充足牛氣衝天，全日成交增加１１
巴仙至９０９億銀左右。
　
＊水塘滿到瀉魚缸水頭足，ＱＱ三紅底科網谷一谷＊
　
　　科網佬再次大發神威，金山軟件（０３８８８）飛起近８巴仙，報２１﹒８銀；ＩＧＧ
（００７９９）亦飆高逾５巴仙，收１４﹒１銀，仲曾經上到去歷史高位１４﹒２銀插旗！
　　至於５月被沽空機構「烽火研究」連番狙擊嘅科通芯城（００４００），有傳已經獲得幾間
錢莊支持，佢沉寂多時終於嚟個大反擊，火箭式衝高逾３３巴仙，報４﹒８９銀，但似乎同被狙
擊前嘅１０蚊水平仲有一大段距離。
　　股王ＱＱ打算同富邦金控喺深圳成立合資，利用ＷｅＣｈａｔ平台銷售保險產品。ＱＱ今日
繼續破頂之旅，踢高近４巴仙，埋單２９８銀，一度高見２９８﹒８銀，３００蚊大關指日可待
！
　
＊瑞信添朵花太平誇啦啦，舜宇大踏步山頂是我家＊
　
　　瑞信噚日（１８日）出報告話，全國金融會議一Ｄ都無「收水」訊號，今日Ａ場更威水踢起
１﹒４巴仙收３２３０，神州保險佬都開香檳慶祝，齊齊Ｃｈｅｅｒｓ！中國太平
（００９６６）飛起逾７巴仙，最高升到２４﹒１銀，埋單２３﹒６銀；街坊新華保險
（０１３３６）同樣巴閉，今朝比招商證券維持「買入」評級，收市踢高逾２巴仙，報
４８﹒６５銀。
　　隨住股王ＱＱ領漲大市，舜宇光學（０２３８２）表現亦醒神到不得了。噚日發盈喜後獲多
間大行唱好，今日繼續大踏步行前逾７巴仙收９９銀，最高升抵９９﹒７５銀，百元大關在望，
可喜可賀！
　
＊神華與蒙牛缸邊非常牛，劇飛逆市跌大象有點吽＊
　
　　至於「最好打」藍戰士莫過於神華（０１０８８）同蒙牛（０２３１９）。神華早前話上半
年煤炭銷售量按年大增逾１８巴仙，今日跳高逾４巴仙，報１８﹒７２銀，試過創兩年半高
１８﹒９銀添！蒙牛獲摩通重申「增持」評級睇１８銀，結果都彈起近５巴仙，收１６﹒２４銀
。
　　劇飛（００２９３）就唔太好彩，連同國泰港龍６月份載客量跌逾２巴仙，行政總裁何杲都
忍唔住話對上半年表現失望，全日碌低近１巴仙，得返１２﹒４２銀。
　　大象（００００５）雖然早前獲德銀唱好升「他屐」，但近排動力似乎唔太足夠，今日逆流
輕輕跣低半個巴仙，報７４﹒９５銀。
　
＊和電急升後今天回回氣，盛良被質低新城見飛起＊
　
　　噚日超人系隻和電（００２１５）傳旗下和記環球獲兩財團洽購，即刻跳高近一成。今日單
料無乜新進展，隻股亦乘機回回氣，軟３％，收２﹒９５銀。新城發展（０１０３０）畀「揸
Ｆｉｔ人」王振華溢價逾１７巴仙提私有化，今朝返來魚缸復賽，即刻朝氣勃勃，最終飆逾１３
巴仙，報３﹒１８銀。
　　半新丁中國升海食品（０１６７６）噚日正式初嚟魚缸報到，已獲得勁多缸友愛戴，唯獨今
午終止升勢，微跌逾２巴仙，報１﹒２９銀，但上市兩日已經比０﹒６６銀招股價高出９５巴仙
喇！
　　另一邊廂，盛良物流（０８２９２）就冇乜運仔，今朝被追住掟，股價跣到應一應，曾一度
撻低六成有多，最後都要瀉近３０巴仙，埋單１﹒７６銀。請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。