《小傳日記》十九大開幕，保險佬落鑊！

　　《小傳日記》中共「十九大」會議今日（１８日）終於開幕，中港兩地缸友都洗耳恭聽，等
祖國揸Ｆｉｔ人「習大大」開金口，再從中喺「聖旨」搵尋寶機會！
　　等緊期間，缸友梗係唔會輕舉妄動，今朝香江魚缸開市只係輕輕碌低６１點，之後都平平穩
穩渡過，上下波幅僅僅夠９９點，就知全日有幾咁悶喇。比較有Ｄ鑊氣嘅，就係靜咗一排嘅祖國
保險佬，平保（０２３１８）、國壽（０２６２８）領軍，香江魚缸埋單僅僅收市升１４點報
２８７１１；Ａ場果邊表現都係咁牛皮，埋單象徵式踢起９點收３３８１；中字輩有Ｄ力，國指
都威番次，收高５３點報１１６２１。
　　唔知大家係咪要花時間消化習大大嘅報告，全日成交都唔係咁旺，只得８７６億銀。
　
＊樓係用嚟住內房佬高飛，光伏阿爺撐協鑫孖寶旺＊
　
　　雖然習大大喺十九大開幕後報告到話「樓係用嚟住，唔係用嚟炒」，不過內房佬今日都依然
齊齊飛起，當中融創（０１９１８）近排嘅北水交投活躍，喺周一（１６日）同周二（１７日）
成為港股通（滬）第二同第三高成交額嘅股仔，一度飛起過逾９巴仙，最終報３９﹒５銀，踢高
近７巴仙，仲升破十天線（３８﹒６８５銀）；Ｂｉｇ貴園（０２００７）就衝前近４巴仙，報
１２﹒７６銀；萬科（０２２０２）都微微踢高近２巴仙，報２６﹒６５銀。
　　有好表現嘅仲有光伏佬啊，神州官員出席「２０１７年神州光伏大會」時就話，將會統籌完
善相關補貼政策，仲講要促進企業重組。保利協鑫（０３８００）跳起近１巴仙，曾高見
１﹒２９銀創逾一年高，最後報１﹒２４銀；阿囝協鑫新能源（００４５１）都唔差，踢高近４
巴仙，報０﹒５７銀。
　
＊壽仔孖平仔齊齊開派對，眾安腳仔軟缸友心都離＊
　
　　神州保險佬基乎全線落鑊，國壽就畀瑞信維持「掃貨」評級，「他屐」就維持３１﹒３銀不
變，仲升破埋一百天線（２４﹒４０７銀）添丫，全日應聲彈高逾２巴仙，收報２４﹒８銀；街
坊平保仲圍埋一齊開Ｐａｒｔｙ添，仲試過喺６６﹒２５銀嘅高位插旗，創埋上市新高，收市都
升咗近２巴仙，報６６﹒１５銀；新保（０１３３６）亦都唔執輸，全日飛起咗逾４巴仙，埋單
５０銀，勁！
　　但眾安在綫（０６０６０）就腳軟軟喇，繼噚日冇咗３巴仙之後，今日就再次跌低逾４巴仙
，企唔穩十天線（８７﹒３５５銀），盤中最低仲見過８２銀，有貨缸友嚇到嘩嘩聲，最後埋單
８２﹒０５銀，真係心都離一離！
　
＊ＱＱ夠硬淨除淨仍然勁，軟件走勢勁搶貨唔手軟＊
　
　　股王ＱＱ（００７００）噚日就再創過歷史新高３５４﹒６銀，不過今日因為優先認購閱文
股份除淨，所以一開市就報３４９﹒６銀，但股王夠硬淨，之後都上番ＤＤ，收報３５４﹒６銀
，而除淨前係收報３５４﹒８銀架。
　　雖然魚缸全日都手軟腳軟，不過總有Ｄ魚毛可以逆流而上嘅，今日就輪到軟件佬落鑊喎！金
蝶國際（００２６８）就有野村唱好，將「他屐」由３﹒７銀升到上５銀，仲維持「買入」評級
，加上有消息話佢哋想拓展智能財務業務，帶動股價跳起近７巴仙，報４﹒２５銀，盤中高見
４﹒２４銀創逾兩年高；街坊金山軟件（０３８８８）彈起３巴仙，報１９﹒７２銀，升破百天
線（１９﹒８５７銀）；擎天軟件（０１２９７）踢高近２巴仙，報２﹒６銀；中軟國際
（００３５４）衝前近１巴仙，報４﹒６６銀。成個板塊走勢確係勁啊！
　
＊瑞士佬唱好瑞聲仍趴低，超人最醒神長實三連升＊
　
　　手機設備佬瑞聲（０２０１８）雖然獲瑞信維持「掃貨」評級，「他屐」就由１４３﹒２０
銀調升至１５３﹒７０銀，但缸友都沽貨離場，搞到瑞聲午後仲跌得勁咗，埋單趴低逾４巴仙報
１４０﹒３銀，係全日最差嘅藍戰！至於神州手機鏡頭一哥舜宇（０２３８２）早前就畀野村維
持「掃貨」評級，「他屐」就維持喺１４５銀，但都難逃一跌，繼續跣低近３巴仙報１１３﹒９
銀。
　　長和系就個別發展，超人一號（００００１）表現最醒神，朝早仲見到多手共２﹒０３億銀
嘅大手掃貨，全日逆市彈高咗逾１巴仙，埋單１０２﹒１銀；長實集團（０１１１３）就曾經畀
摩通維持「增持」評級，「他屐」就維持７２﹒７銀不變，亦都升咗近２巴仙報６８﹒４銀，連
三日累漲近６巴仙，實係可喜可賀丫！請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。