《小傳日記》花旗科網小股災，ＱＱ平保同悲哀！

　　《小傳日記》花旗缸友噚晚（２９日）真係悲喜交集，揸住科技股嘅，見到納指插水創逾３
個月最大跌幅，真係欲哭無淚。另一邊廂，道指就開開心心跳起１０３點再破頂，認真大對比！
　　外圍科技佬重傷，香江股王ＱＱ（００７００）今朝競價就已經舉晒白旗失守４００大關，
其他重磅藍籌都傷亡慘重，瑞聲（０２０１８）更大插逾６巴仙。雖然大市有本地薑發威撐住，
東亞（０００２３）、中銀（０２３８８）逆市造好，但可惜幫助唔大，加上Ａ場午後突然碌低
，嚇到大市一度大跌４９６點至２９１２７，埋單仍震散４４６點報２９１７７，十天線
（２９６０２點）同廿天線（２９２７９點）失守；國指就收低１７２點報１１４７５。
　　魚缸受重傷，缸友急掟貨自保，加上ＭＳＣＩ指數變動收市後生效，基金都急住換馬，難怪
全日成交高達１７１９億銀左右，就快多過２０１５年７月１０號嘅１８０２億銀成交喇！
　　仲有，恆指季檢下星期一（４日）生效，即係重頭戲將會喺聽日（１日）收市前出現，缸友
倒坐穩Ｄ喇！
　
＊ＱＱ失四百好友似被摑，瑞聲拍舜宇缸邊齊急撻＊
　
　　花旗國科技佬股價齊齊插水，仲有人計過臉書、亞馬遜、網飛（Ｎｅｔｆｌｉｘ）同谷歌嘅
市值，喺單單一日內已經無咗６００億美金！仲拖埋香江一眾科技佬添。股王ＱＱ喺今朝競價時
段已經失守過４００銀啦，午後仲繼續走低，收市後競價仲跌多咗，最終以全日最低位收市，碌
低逾３﹒３巴仙報３９８銀。
　　其他手機佬都唔太好過，瑞聲雖然有摩通將「他屐」由１３０銀大升至１８０銀，不過評級
就繼續維持中性，加上蘋果公司噚晚都受襲，嚇到瑞聲要「陪著你嘔」，跣低６巴仙，報
１５６﹒３銀，係今日最重傷藍戰士；街坊舜宇（０２３８２）都同樣跌得淒厲，最多曾經瞓低
過近８巴仙低見１２８銀，最終全日碌低６巴仙，報１３０銀。
　
＊平保ＡＩＡ你碌我又碌，拆息續高企港銀獲祝福＊
　
　　魚缸突如其來嘅震盪，除咗科技股成重災區外，早排極受缸友歡迎嘅ＡＩＡ（０１２９９）
同埋平保（０２３１８）都難逃一跌，前者三連跌後再碌低近４巴仙，收６３﹒３銀，２０天線
（約６４﹒６２銀）不保，係第二差藍戰士。後者都跟Ａ股插水，收低近４巴仙報７７銀，之前
說好的「紅底夢」，睇來有排都未實現喇……
　　不過，正所謂「有危就有機」，香江錢莊今日就認真威風。一個月拆息曾經升破１厘，創９
年高位，雖然今日已經回落返，去返１厘以下，但中銀香港仍繼續成為逆市奇葩，抽高近２巴仙
挑戰上市新高，勁；而東亞下半場仲黑馬發力，衝前近３巴仙收３４﹒５５銀，做咗最佳藍戰士
！大象（００００５）都穩穩陣陣收報７８銀，無跟市跌，都值得畀個讚！
　
＊明晟執執位成交千七億，叮叮與新貴有愁有招積＊
　
　　今日收市之後，金利豐（０１０３１）將會獲納入ＭＳＣＩ香江指數，敏實（００４２５）
亦會被納入，兩者分別跳起逾１９巴仙，報９﹒６２銀同彈起近１巴仙，報４３﹒６銀。
　　除咗敏實之外，ＭＳＣＩ神州指數亦會剔出中煤能源（０１８９８）、中國電力
（０２３８０）、中石化煉化工程（０２３８６）。三者今日表現各異，中煤同中石化煉化就唔
見逾３巴仙，而中國電力就飛起近１巴仙。而指數會納入８隻股份，當中比亞迪電子
（００２８５）唔見近２巴仙，報１８﹒７銀。美圖公司（０１３５７）跳起逾３巴仙，報
１１﹒３２銀、華潤醫藥（０３３２０）、雅居樂（０３３８３）就有約１巴仙進帳，都算叻仔
！
　
＊集成似識飛君陽更誇張，中芯算硬淨ＡＳＭ頗傷＊
　
　　之前集成（０１０２７）列入為Ｗｅｂｂ５０隻不能買嘅股份之列中，今日一飛衝天，似乎
想一洗頹氣。最近集成控股股東Ｊｉｃｈｅｎｇ同君陽（００３９７）簽咗換股要約協議，用每
４股君陽換５股集成嘅基準，減持手上集成嘅股份，Ｊｉｃｈｅｎｇ唔再係集成控股股東。集成
今日飛起２５巴仙，報０﹒１６３銀。而復賽嘅君陽就有７５巴仙進帳，報０﹒３９５銀，認真
犀利！
　　ＡＳＭ（００５２２）早前被大摩降評級到「持平」，而野村目標價就維持９５蚊，不過股
價今日就弱雞，唔見近４巴仙，報１１２﹒２銀。街坊中芯（００９８１）就算幾硬淨，倒升近
１巴仙，報１０﹒９銀。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。