《小傳日記》魚缸尾市瀡滑梯，ＱＱ受襲再跪低！

　　《小傳日記》花旗國稅改最終獲得通過，噚晚（４日）道指破頂慶祝，不過資金轉咗去金融
佬身上，科技佬被拋棄，納指收市碌低逾１巴仙至６７７５點。今朝（５日）股王ＱＱ
（００７００）都受到波及「舉白旗」，拖累香江魚缸低開２３９點報２８８９８，之後部分中
資金融佬有返Ｄ力頂住，大市跌幅收窄至１４點。點知，原來「好戲」在後頭，臨收市前ＱＱ被
淡友突襲急挫逾３巴仙，恆指最終要急挫２９５點報２８８４２；國指就無咁傷，只係微跌３３
點跑贏大市，收報１１４８４。
　　魚缸氣氛又轉差，缸友都唔敢貿易掃貨，不過都仲有千億成交，全日錄得約１０１９億銀。
　
＊納指頭耷耷ＱＱ有所失，交銀畀個讚舜宇卻被質＊
　
　　股王ＱＱ噚日發威，由最低位３７７﹒２銀一口氣衝去最高３９７﹒８銀，雖然埋單收低
３９０銀樓下，不過缸友都滿懷希望ＱＱ可以重展升勢嘛！點知，噚晚花旗科技股又震一震，嚇
到ＱＱ今日又碌返落去，最慘係低算未算低，收市前再受創，仲要喺收市後Ｕ盤再跌多Ｄ，最後
以２全日最低位３７６銀埋單，唔見逾３巴仙，嗚嗚！睇嚟ＱＱ短期都仲未企得穩，有貨缸友們
綁定安全帶吧。
　　另一邊廂，新晉藍籌舜宇（０２３８２）今日都受到重大沽壓，成交高近１６億銀，插低近
６巴仙報１２４﹒５銀，係最差藍戰士，但係交銀國際繼續唱好，維持上望１６５銀不變。街坊
瑞聲（０２０１８）就無咁傷，只係輕輕跟市跌逾２巴仙報１４９﹒８銀。
　
＊平保有頭威可惜失尾陣，內銀跑贏了ＡＩＡ腳震＊
　
　　中資金融佬個別發展，不過走勢其實都唔係相差好遠，大阿哥平保（０２３１８）本來都幾
靚仔，最後都要跟市跌逾１巴仙收７６﹒２銀，街坊新保（０１３３６）獲工銀國際維持目標
５８﹒４銀不變，表現跑贏同業，逆市跳起逾１巴仙收５２﹒２銀，讚！錢莊方面，建行
（００９３９）同中行（０３９８８）都象徵式地叫跑贏大市，各自收６﹒７８銀及３﹒８２銀
。
　　香江保險佬代表ＡＩＡ（０１２９９）都頭耷耷無心機，自從上個月２２號創上市新高見
６９﹒１５銀後，就一路跟市向下碌，今日又唔見近２巴仙收６２﹒６銀，５０天線
（６１﹒７９４）隨時又得而復失。
　
＊融創數據靚無奈跟市軟，唯記升他屐華南城兜轉＊
　
　　內房佬陸續公布上個月嘅銷售數據，融創（０１９１８）啲數字就夠哂靚仔，上個月嘅合同
銷售額達到４９４億人幣，按年升１﹒２倍，勁啊！不過利好消息就無反映喺股價，融創最多只
係升過近３巴仙，最終更倒跌近１巴仙，報３４﹒８５銀。華南城（０１６６８）雖然無數據支
持，不過就有大行唱好，星展唯高達繼續畀２﹒７７銀嘅「他屐」佢，今日最多炒高逾１１巴仙
，高見２﹒０９銀，最後都衝前近７巴仙，報２﹒０１銀。
　　阿爺最新公開咗免徵車輛購置稅嘅新能源汽車車型目錄，不過就唔係太幫到比亞迪
（０１２１１），午後更慢慢向下走，最終輕微碌低０﹒６巴仙，報６８﹒８５銀。
　
＊大市要下跌魚毛躲不了，大和來唱好中交建仍俏＊
　
　　今日大盤下跌，但唔少魚毛都受消息刺激造好，只係好多係霎眼嬌維持唔到升勢。野村出咗
份報報告，指潤啤（００２９１）中價同埋優質產品銷售強勁，維持「買入」評級同「他屐」
２６﹒９銀。潤啤最初走勢都唔錯，不過午後就開始腳仔軟，最終跌１巴仙，報２２﹒２５銀。
　　石四藥（０２００５）今朝個勢好厲害，仲飛起過近７巴仙破頂，全靠有招商證券繼續畀
５﹒７２銀「他屐」。不過之後都係逃不過被沽嘅命運，最終僅跳起近０﹒７巴仙，報４﹒５５
銀。
　　同樣有大行唱好嘅仲有中交建（０１８００），大和重申佢嘅「跑贏大市」評級，最多曾衝
前逾３巴仙，高見８﹒９５銀突破埋廿天線（８﹒８６銀），不過最後只係跳起近２巴仙。
　　網龍（００７７７）聽日（６日）就會公布季績，噚日都已經偷步炒高一成，今日都曾經飛
起過逾４巴仙，不過之後升幅全消，最終更微微碌低０﹒６巴仙。請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。