《小傳日記》中美關係仍糟糕，見低撈貨要Ｓａｙ　Ｎｏ？

　　《小傳日記》神州電訊設備龍頭華為嘅太子女自從突然被楓葉國（加拿大）政府拘捕後，並
可能引渡至花旗國受審，「孖屐」即時聯想起今年上半年嘅中興（００７６３）事件，令中美兩
國嘅貿易戰再度升溫，上個禮拜「習特會」嘅成果豈不是得個桔，所以魚缸過去兩日都橫風橫雨
，蒸發咗過千點。
　　花旗國魚缸噚晚亦一度最多唔見咗７８５點，但最後埋單只係跌咗７９點。香江今朝（７日
）開市都力保不失，高開９３點後，冇幾耐升幅一度最多擴至１２４點，高見２６２８０點，但
大象（００００５）同其他中資金融股幾乎全線碌低，醫藥佬又繼續捱沽，「三桶油」又因為油
組減產會議冇乜料到而受壓，魚缸轉下眼最多倒跌１００點，最低見２６０５５點，最終全日埋
單跌咗９２點或唔夠半巴仙，報２６０６３點，險守５０天線（２６０５１點）。主板總成交只
有９８９﹒５８億銀，較噚日多咗２巴仙。國貨收市報１０３６９，跌１１１點，唔見１巴仙。
　　Ａ場同樣唔上唔落，上證最終收２６０５點，升唔夠１點。深成指報７７３３點，跌１點。

＊醫藥佬仆低缸友身家虧，豬肉佬萬洲見到搵路兜＊

　　醫藥佬呢兩日真係多災多難，事關神州近日公布咗藥品帶量採購預中標結果，部分品種嘅降
幅超過預期，某ｄ藥品嘅招標價格更大幅插水達九成，即使中標嘅藥企，賺到嘅錢都要大大縮水
，一眾街坊仲唔被缸友掟貨散水咩，中生製藥（０１１７７）噚日蒸發咗１６巴仙後，今日又唔
見近８巴仙，報５﹒３８銀，做埋全日表現最差嘅藍戰士添呀，盤中見５﹒０９銀，創近１５個
月新低！同屬藍戰士嘅石藥（０１０９３）噚日大插超過１４巴仙，今日就繼續跌超過４巴仙
，報１３﹒２２銀，盤中低見１２﹒０８銀，一樣創咗近１５個月新低。其他街坊方面，聯邦製
藥（０３９３３）大插近８巴仙，報４﹒６８銀。復藥（０２１９６）跣低半成報２５﹒１５銀
。
　　內需佬都冇乜運行，旺旺（００１５１）噚日插咗超過４巴仙後，今日都唔見咗超過２巴仙
，報５﹒５５銀。豬肉佬萬洲（００２８８）亦都碌低２巴仙，報５﹒８９銀。其他同業就有追
捧，潤啤（００２９１）彈起超過１巴仙，報２７﹒７銀。達利食品（０３７９９）都跳高１巴
仙，報５﹒７６銀。

＊鐵塔被當寶晉身國貨佬，花旗降他屐瑞聲跌勢劇＊

　　神州工信部確認三大電訊商已經攞咗５Ｇ試驗頻率使用許可批覆，即係話全國範圍５Ｇ試驗
就嚟會展開，中金仲話中移動（００９４１）獲得嘅５Ｇ頻譜勝預期，而中移動仲話，出年會推
出５Ｇ智能手機同首批自主品牌嘅５Ｇ終端產品。幾個好消息刺激下，中移動成為缸友避險之選
，股價全日逆市踢高近２巴仙，報７７﹒５５銀。不過，中電信（００７２８）就插咗近２巴仙
，報３﹒９６銀。聯通（００７６２）跌１巴仙，報８﹒７５銀。神州鐵塔（００７８８）下個
禮拜一（１０日）起將會「升呢」成為國貨佬，全日爆升超過４巴仙，報１﹒２４銀；神州銀河
（０６８８１）就被叮走，跣低近３巴仙，報４﹒０１銀。
　　其他５Ｇ設備股噚日因為華為事件而全線插水，但中興今日逆市彈返上半巴仙，報
１５﹒６銀。長飛光纖（０６８６９）同中通服（００５５２）就冇乜料到，報２１﹒１銀同
５﹒９８銀。
　　手機設備股今日就繼續受累華為事件，花旗今日出報告，話瑞聲（０２０１８）有１２至
１５巴仙嘅收入同華為零件有關，如果華為步中興後塵被禁制，佢可能會失去一成半收入，仲話
未來９０日瑞聲股價會下跌，「他屐」由６７蚊降至６２蚊，維持「掃貨」評級，全日跌咗近２
巴仙，報５０﹒７５銀。舜宇（０２３８２）就有兩成至兩成半收入嚟自華為，所以佢跌得比較
甘，全日碌低近４巴仙，報６７﹒３銀，連跌四日累計蒸發超過１７巴仙，慘！

＊加息步伐減磚頭佬吶喊，匯控被檢舉股價唔可取＊

　　花旗國ｔｒａｄｅｒ對聯儲會繼續加息嘅信心急急走低，仲懷疑１２月加息嘅前景發展，仲
預期下年幾乎唔會加息。利率期貨亦顯示，儲局喺今個月１８號同１９號加息「餐士」由一星期
之前嘅８３巴仙降到７４巴仙。香江磚頭佬今日就被缸友捧高高，新地（０００１６）同新世界
（０００１７）齊齊走高近１巴仙，報１１３﹒２銀兼１０﹒７銀。長實（０１１１３）亦走高
１巴仙，報５６﹒８銀。恆隆（００１０１）同領展（００８２３）升近３％，報１５﹒７銀同
７９﹒３５銀，後者成為升幅最大藍戰士。太古地產（０１９７２）揚近３％，報２８﹒９５銀
。
　　香江錢莊大佬們今日個別發展，大象（００００５）其中一個花旗國聯邦政府任命嘅監督人
士，就向尋求一個檢察官舉報華為嘅帳號，表示佢存在可疑嘅交易，全日無Ｍｏｏｄ，走低近
２巴仙，報６３﹒７銀。小象（０００１１）升唔夠１巴仙，報１８１銀。中銀（０２３８８）
跌近２巴仙，報２９﹒７銀。渣打（０２８８８）跟住走低約１巴仙，報５９銀。

＊三桶油齊跌缸友急急撇，鐵鳥們飛墮大叫好無助＊

　　油組噚日（６日）開完會之後，喺減產協議方面達成唔到一致共識，導致油價走低近３巴仙
。三桶油同一班油服兄弟們就齊齊仆低，中石化（００３８６）同中海油（００８８３）跌超過
２巴仙，報６﹒４１銀兼１２﹒７８銀。中石油（００８５７）跟跌２巴仙，報５﹒３１銀。巨
濤油服（０３３０３）就蒸發咗２巴仙，報０﹒９４銀。
　　油價持續腳軟，但鐵鳥們今日竟然唔跟隊形，國泰（００２９３）跌超過１巴仙，報
１０﹒９６銀。東航（００６７０）走低唔夠半個巴仙，報４﹒７９銀。國航（００７５３）跟
跌近２巴仙，報７﹒３９銀。但南航（０１０５５）逆市升近１巴仙收５﹒３５銀，炒起母公司
擬進行股權多元化改革嘅消息。周未愉快，請請！

　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。