《小傳日記》魚缸五連升激讚，友邦破頂接力撐！

　　《小傳日記》魚缸就係一個咁反覆嘅地方，本來今個星期仲睇住佢跌穿三萬關，點知呢幾日
又好似無地震發生過一樣，道指噚晚收漲１９６點報２４７３９，寫下六連漲。今朝（１１日）
香江都又跟住高開３４２點收復番三萬一，Ｈａｐｐｙ　Ｔｏｇｅｔｈｅｒ！
　　一班重磅大隻佬發力，ＡＩＡ（０１２９９）做咗升市大功臣，生發發（００３８８）亦衝
前收２６０﹒４銀，ＱＱ（００７００）曾見４１５銀，齊齊推動大市飛升最多４６８點報
３１２７７，連３１２００關都突破埋，勁。
　　雖然收市升幅縮番ＤＤ，但係都有３１２點落袋報３１１２２，成個星期都報捷，五日加埋
彈起１１９５點，讚；國指踢起１１１點報１２３４５。全日成交逾９９９億銀。

＊ＡＩＡ發功破頂上太空，憧憬派特息太地好招積＊

　　魚缸升得咁勁，ＡＩＡ真係功無不沒。其實公司喺月初公布勝預期嘅季績，理應對股價有好
大鼓舞，只係之後大市無力，連累埋ＡＩＡ被質低，依家個市強番咁多，有實力嘅ＡＩＡ自然率
先反彈，早排匯證都已經睇好會升到去８２銀，難怪今日領軍衝前逾２巴仙收７２﹒８銀，仲寫
下７３﹒６５銀上市新高添！
　　仲有股王ＱＱ，噚日成功收高番大股東４０５銀掟貨價，今日延續強勢，喺下星期三派季績
前，缸友都繼續掃貨，最高升到去４１５銀，收市都近１巴仙進帳，報４０８﹒８銀。
　　太地（０１９７２）亦係今日焦點魚毛，皆因公司傾緊出售太古城中心第三、四座，里昂話
有機會派發特別息，缸友即刻衝上車博一博，太地收市跳起近５巴仙收３０﹒１銀；兄弟太古Ａ
（０００１９）都有近３巴仙進帳收７９﹒１５銀，係第二勁藍戰。

＊華虹見光死中芯有點悲，丘鈦發盈警淡友即出兵＊

　　中芯（００９８１）噚日派完季績，華虹（０１３４７）叨光炒起咗，收市之後佢又公布首
季多賺１８巴仙，今朝開市高見１９﹒９銀上市新高後，缸友就趁好消息出貨，華虹最終要倒跌
逾５巴仙完場，報１８﹒５銀。中芯都逆市腳軟２巴仙收１０﹒５６銀。
　　丘鈦（０１４７８）失驚無神發盈警，預告中期盈利會大跌五成，嚇到粉絲急急掟貨，今朝
競價已經急插２７巴仙。大摩仲加多腳，將評級由持平降到去減持，目標價更加大劈六成，得番
４蚊，丘鈦想有運行都難，收市蒸發咗逾三成報７﹒０３銀，慘。街坊比亞迪電子
（００２８５）就反而受捧，跳起逾３巴仙收１２﹒４４銀。

＊長和系換帥股價冇後退，缸友冇走雞捷榮終發威＊

　　冇人不識嘅「超人」誠哥噚日「Ｌａｓｔ　Ｄａｙ」，雖然冇散水餅，但就派定心丸話之後
派息唔會比今日少。不過，長和系幾隻街坊噚日嘅表現就冇乜睇頭，幾乎全線插水。誠哥榮休，
超人個仔李澤鉅「升呢」做咗長和（００００１）同長實（０１１１３）嘅揸ＦＩＴ人，加上呢
排魚缸咁有氣勢，長和系又陸續喺下個禮拜除淨，似乎誠哥揀咗個好日子退下火線，旗下街坊全
線報捷，長和今日反彈近１巴仙，報９２﹒３５銀。長實就最巴閉，彈起近兩巴仙，報６８﹒２
銀。電能（００００６）同長建（０１０３８）就升咗唔夠１巴仙，報５９﹒３５銀同
６２﹒９５銀。
　　今日第一日入缸嘅香江咖啡王子捷榮（０２１１９）有頭威冇尾陣，大嗱嗱超購１６２倍，
一手中籤率只有一成半，唔少缸友都以為會大有斬鑊，但噚日暗盤表現令人大跌眼鏡，輝立暗盤
埋單只係較招親價１﹒９８銀升咗近９巴仙。今日開齋表現都算係咁喇，開市報２﹒１６銀，冇
幾耐一度跌到去２﹒０６銀，但之後愈戰愈勇，下晝最多高見２﹒７２銀，最尾埋單報２﹒３７
銀，較招親價高近兩成，以每手２０００股，唔計手續費，未沽貨嘅缸友賺７８０蚊。

＊易手後爆升急回好震驚，老細突失蹤天喔跌勢洶＊

　　今個禮拜有唔少街坊復賽，股價表現大上大落坐足過山車，唔少缸友都比呢ｄ魚毛嚇餐死，
喺星洲搞建築工程嘅ＳＨＩＳ（０１６４７）喺今個禮拜宣布，公司老細折讓１２巴仙賣走佢手
上揸住超過７２巴仙股權後，今個禮拜三復賽即坐火箭爆升近８５巴仙。升到咁都仲未夠喉，噚
日再彈起７６巴仙。今朝似乎餘威未盡，最多彈起一成半，高見３﹒７銀兼係最新山頂位，若果
以山頂位計，自宣布易手以嚟已經爆升２﹒７倍。不過，帳面賺咁多自然有唔少缸友會散水，最
多跌咗近３２巴仙，低見２﹒２銀，埋單跌咗近２８巴仙，報２﹒３３銀。
　　之前搵咗香江歌神張學友做代言嘅天喔國際（０１２１９），似乎未反映到明星效應之餘，
仲要兼冇運行，事關公司噚晚發通告話，由於老細正協助神州某個部門調查而暫時返唔到工。雖
然公司話對而家業務冇乜影響，但缸友都係覺得心知不妙，掟貨走為上著，今日復牌就急插近
２４巴仙，報０﹒７４銀。
　　今個禮拜一（７日），先健科技（０１３０２）主要股東將佢其中揸住超過２２巴仙股權賣
畀神州光大控股（００１６５），其餘股權就賣畀其他投資者。有大國企入股，缸友收到風即刻
掃貨，今日嘅升勢係呢個禮拜入面最強勁，全日彈起超過８巴仙，報２﹒８５銀，成個禮拜升咗
超過１８巴仙，勁！周末愉快，請請！
　
　　《編者按》本欄搜羅即日熱門傳聞，惟消息未經證實，《經濟通》亦不保證內容之準確性
　　　　　　　本文只供參考之用，並不構成要約、招攬或邀請、誘使、任何不論種類或形式
　　　　　　　之申述或訂立任何建議及推薦，讀者務請運用個人獨立思考能力自行作出投資
　　　　　　　決定，如因相關建議招致損失，概與《經濟通》、編者及作者無涉。